07 Jan 2024, 19:08
ނިމިދިޔަ ސަރުކާރު ނިމެން ގާތްގަނޑަކަށް ދެ ދުވަހަށްވެފައި އޮއްވައި ފުލުހުންގެ ގިނަ އިސް ބޭފުޅުންތަކަކަށް ދޭން ނިންމި ޕްރޮމޯޝަންތަކުގެ މައްސަލައިގައި، އެ ކަން ހުއްޓުވުމަށް ޓަކައި ވަގުތީ އަމުރެއް ނެރެދެވެން ނެތް ކަމަށް ސިވިލް ކޯޓުން ނިންމާފައި ވަނިކޮށް، އެންޓި ކޮރަޕްޝަން ކޮމިޝަން (އޭސީސީ)އިން އެ މައްސަލަ އިސްތިއުނާފުކުރަން ހައި ކޯޓަށް ހުށަހަޅައިފިއެވެ.
އެ ޕްރޮމޯޝަންތައް ދޭން ނިންމީ، އެއިރު ހިނގަމުން އައީ ވެރިކަން ބަދަލުވުމުގެ މަރުހަލާކަމުން، އެއްވެސް ޕްރޮމޯޝަނެއް ނުދިނުމަށް އިންތިޚާބީ ރައީސްގެ ހައިސިއްޔަތުން، މިހާރުގެ ރައީސް ޑރ. މުޙައްމަދު މުއިއްޒު އެއިރުގެ ރައީސް އިބްރާހީމް މުޙައްމަދު ޞާލިޙުގެ އަރިހުން އެދިވަޑައިގެންފައިވަނިކޮށެވެ.
އެއާއެކު އެކަން ހުއްޓުވުމަށް އެދި އެންޓި ކޮރަޕްޝަން ކޮމިޝަން (އޭސީސީ)އިން ސިވިލް ކޯޓަށް މައްސަލަ ހުށަހެޅިއެވެ.
ނަމަވެސް އެ ކޯޓުން ނިންމީ"ކޯޓު އަމުރު އޮންނަން އެދޭގޮތް ބަޔާންކުރާ ލިޔުން" ހުށަހަޅާފައި ނުވާތީއާއި، ފުލުހުން އޭސީސީގެ އަމުރަށް އަމަލުނުކުރުމަކީ، އެ ކޮމިޝަނަށް ގާނޫނުން ދީފައިވާ ތަހުގީގު ކުރުމުގެ ބާރަށް ހުރަސް އެޅޭނެ ކަމަކަށް ނުވާތީ ވަގުތީ އަމުރެއް އެ މައްސަލައިގައި ނެރެދެވެން ނެތް ކަމަށެވެ.
"ސަން"އަށް މީގެކުރިން އެނގިފައިވާ ގޮތުގައި ސަރުކާރު ނިމެން ކުޑަތަންވެފައި އޮއްވައި މުޅިން އަލަށް އެސިސްޓެންޓް ކޮމިޝަނާ އޮފް ޕޮލިސްގެ މަގާމަށް ހަ ބޭފުޅަކު ޕްރޮމޯޓް ކޮށްދީފައިވެއެވެ. އެހާތަނަށް އެ މަގާމުގައި ފަސް ބޭފުޅުން ތިއްބެވިއެވެ. އަދި ޗީފް ސުޕްރިޑެންޓުންގެ މަގާމަށް އަށް ބޭފުޅަކު ޕްރޮމޯޓް ކޮށްފައިވެއެވެ.
އެ ކަމާ ގުޅިގެން މީގެ ކުރިން ފުލުހުން ބުނީ އެއީ މި އަހަރުގެ އޭޕްރީލް މަހުން ފެށިގެން އިއުލާނުކޮށް، ހަމަޖެހިފައިވާ ޕްރޮމޯޝަންތަކެއް ކަމަށެވެ.
އަދި އެ ޕްރޮމޯޝަންތަކަކީ އެ ޚިދުމަތުގެ މަގާމުގެ ކުރިއެރުން ދިނުމުގެ ގަވާއިދާ އެއްގޮތްވާ ގޮތުގެ މަތިން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ދެމުން ގެންދާ ޕްރޮމޯޝަންތަކެއް ކަމަށް ވެސް ބުނެފައިވެއެވެ.