07 Jan 2024, 12:54
އިދިކޮޅު އެމްޑީޕީން އިލެކްޝަންސް ކޮމިޝަން (އީސީ)އަށް ފޮނުވި ސިޓީއަކާ ގުޅިގެން، ރައްޔިތުންގެ މަޖިލިސް އިންތިޚާބު ބާއްވާނެ ތާރީޚު ކަނޑައެޅުން ފަސްކޮށްފައިވާ ކަމަށް އެ ކޮމިޝަނުން މިއަދު ބުނެފިއެވެ.
ގާނޫނު އަސާސީން ބުނާ ގޮތުން ނަމަ މިއަހަރު ބާއްވާ މަޖިލިސް އިންތިޚާބު ބާއްވަން ޖެހޭނީ ރޯދަ މަހުއެވެ.
އީސީން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ މަޖިލިސް އިންތިޚާބު ބާއްވާނެ ތާރީޚު މިއަދު ކަނޑައަޅާ ގޮތަށް މީގެ ކުރިން ނިންމައިގެން އައި ކަމަށެވެ.
ނަމަވެސް ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީން މިދިޔަ ބުރާސްފަތި ދުވަހު އެ ކޮމިޝަނަށް ފޮނުވި ސިޓީއަކާ ގުޅިގެން އިންތިޚާބު ބާއްވާނެ ތާރީޚު ކަނޑައެޅުން ފަސްކުރީ ކަމަށް ހަބީބް ވިދާޅުވިއެވެ.
"އަޅުގަނޑުމެން ކޮމިޝަނުން ނިންމީ އެކަމާ ގުޅޭގޮތުން އެމްޑީޕީއާ ވެސް ހަމަ މަޝްވަރާ ކުރުމަށްފަހު ތާރީޚު ކަނޑައަޅަން،" ހަބީބް ވިދާޅުވިއެވެ.
"އަޅުގަނޑުމެންގެ ނިންމުން އިރާދަކުރެއްވިއްޔާ މި ހަފްތާތެރޭ އާންމުކުރާނަން."
ހަބީބް ވިދާޅުވީ އިންތިޚާބުގެ ތާރީޚާ ގުޅޭގޮތުން އެމްޑީޕީއާއެކު މާދަމާ 11:30ގައި މަޝްވަރާ ބައްދަލުވުމެއް ބާއްވަން ހަމަޖެހިފައިވާ ކަމަށެވެ.
ހަބީބް ވިދާޅުވީ މަޖިލިސް އިންތިޚާބު ބާއްވާނެ ތާރީޚެއް ކަނޑައަޅާނީ ވަރަށް ގިނަ ކަންކަމަށް ވިސްނައި، ގިނަ ބަޔަކާ މަޝްވަރާކުރުމަށް ފަހު ކަމަށެވެ.
އެގޮތުން ތާރީޚު ކަނޑައަޅާނީ ރައްޔިތުންނަށާއި ކެންޑިޑޭޭޓުންގެ އިތުރުން އީސީއަށް ވެސް އެންމެ ފަސޭހަ ވާނެ ގޮތް ބެލުމަށް ފަހު ކަމަށް އޭނާ ވިދާޅުވިއެވެ.
ހަމައެއާއެކު ވޯޓުލާ މީހުންގެ އަދަދު ގިނަވުމާއި ޚާއްސަގޮތެއްގައި ވޯޓުލުމުގެ ހައްގު ލިބިގެންވާ ވީހާވެސް ގިނަ ބަޔަކަށް ވޯޓު ލުމުގެ ފުރުސަތު ލިބިގެން ދިޔުމަކީ އެ ކޮމިޝަނުން ތާރީޚެއް ކަނޑައެޅުމުގައި ބަލާނެ ކަމެއް ކަމަށް ހަބީބް ވިދާޅުވިއެވެ.
މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހަޅައިފައި ވަނީ ރޯދަ މަހުގެ ކުރިން މަޖިލިސް އިންތިޚާބު ބާއްވާށެވެ. ނަމަވެސް އެ ކޮމިޓީން ފަހުން ވަނީ ރޯދައަށް ފަހު އިންތިޚާބު ބާއްވަން އީސީއަށް ލަފާ ދީފައެވެ.
ނަމަވެސް އިންތިޚާބު ރޯދައަށްފަހު ބާއްވާނަމަ ދަތިތަކެއް ދިމާވާނެ ކަމަށާއި، އެކަމަކު މަޖިލީހުގެ ނިންމުމަށް ވެސް އިހުތިރާމް ކުރާނެ ކަމަށް މީގެ ކުރިން އީސީން ބުނެފައިވެއެވެ.
އެގޮތުން ހަބީބް މީގެ ކުރިން ވިދާޅުވީ، ރޯދައިގެ ފަހަށް ބާއްވާ ކަމަށް ވާނަމަ އެ ދިމާވަނީ އީދު ބަންދާކަމަށެވެ. އަދި ރޯދަ މަސް ނިމޭއިރަށް އެކި މީހުން އެކި ދިމަ ދިމާލަށް ފުރާނެ ކަމަށް އޭނާ ވިދާޅުވިއެވެ.
ހަމައެއާއެކު އިންތިޚާބު ރޯދައިގެ ތެރޭ ބާއްވާ ކަމަށް ތުހުމަތުކޮށް އެމްޑީޕީން ބުރާސްފަތި ދުވަހު އީސީއަށް ފޮނުވާފައިވާ ސިޓީގައި ވަނީ އެ ނިންމުން ނިންމުމުގައި ސަރުކާރުގެ ނުފޫޒު އޮތްކަމަށް ބުނެފައެވެ.