07 Jan 2024, 12:31
ރިޕަބްލިކް އޮފް މޮންޓެނޭގްރޯއަށް ނައިބު ރައީސް ޙުސައިން މުޙައްމަދު ލަތީފު ކުރެއްވި ރަސްމީ ދަތުރުފުޅަށް 589,736.65 ރުފިޔާ ޚަރަދުވި ކަމަށް ރައީސް އޮފީހުން މިއަދު ހާމަކޮށްފިއެވެ.
އެއީ ނައިބު ރައީސް، މޮންޓެނޭގްރޯގެ ޑަނިލޮވްގްރަޑްގައި ބޭއްވި، ތިންވަނަ ކޮންގްރެސް އޮފް ޑިމޮކްރެޓިކް މޮންޓެނޭގްރޯގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.
އެ މަނިކުފާނު ފުރާވަޑައިގަތީ މިދިޔަ މަހުގެ 23ގައެވެ. އަދި ދަތުރުފުޅަށް ފަހު ރާއްޖެ ވަޑައިގަތީ މިދިޔަ މަހުގެ 28ގައެވެ.
މޮންޓަނޭގްރޯއަށް ރައީސުލްޖުމްހޫރިއްޔާގެ ނައިބު ކުރެއްވި މި ދަތުރުފުޅުގައި އެމަނިކުފާނުގެ އަރިހުގައި މިނިސްޓްރީ އޮފް ފޮރިން އެފެއާޒްގެ އެމްބެސެޑަރު-އެޓް-ލާޖް މުޙައްމަދު ޙުސައިން ޝަރީފް ބައިވެރިވެވަޑައިގެންނެވިއެވެ.
އެ ދަތުރުފުޅުގައި އެ މަނިކުފާނު ތުރުކީގެ އިސްތަންބޫލުގައި ޓްރާންސިޓް ކުރެއްވި ކަމަށް ޚަރަދުން ދައްކައެވެ.
ދަތުރުފުޅުގެ ޚަރަދުގެ ތަފުސީލު:
ފަސް ބޭފުޅުންގެ ބިޒްނަސް ކުލާސް ޓިކެޓް - 492،746.10 ރުފިޔާ
- ފަސް ބޭފުޅުންގެ ޕޮކެޓް މަނީ ޚަރަދު - 64،638.00 ރުފިޔާ
- މޮންޓިނީގްރޯގައި ފަސް ބޭފުޅުންގެ ފަރިއްކޮޅު ޙަރަދު - 23،823.72 ރުފިޔާ
- ވިސާ ޚަރަދު - 633.76 ރުފިޔާ
މީގެ އިތުރުން، އިސްތަންބޫލްގައި ފަސް ބޭފުޅުން ފަރިއްކުޅުއްވުމަށް، 7،895.07 ރުފިޔާ ޚަރަދުވިއެވެ.
މޮންޓިނީގްރޯގެ ކޮންގްރެސްގައި ވާހަކަފުޅު ދައްކަވަމުން ނައިބު ރައީސް ހުސައިން ވަނީ، ރައްޔިތުން ބާރުވެރިކޮށް އެ މީހުންގެ ބައިވެރިވުމާއެކު ގައުމުގެ މިސްރާބު ބައްޓަންކުރުމަށްޓަކައި ހުރިހާ ފަރާތްތަކުން ވެސް ބަހާއި އަމަލުން ޑިމޮކްރަސީގެ ރޫހަށް ތަބާވުމަށް ގޮވާލައްވާފައެވެ.
ދިވެހިރާއްޖެއާއި މޮންޓަނޭގްރޯއާ ދެމެދު ސިޔާސީ ގުޅުން ގާއިމްކޮށްފައި ވަނީ ނޮވެންބަރު 24، 2009 ގައެވެ.