07 Jan 2024, 22:13
ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތާއި އިސްރާއީލާ ދެމެދު ހިނގަމުންދާ ހަނގުރާމައިގެ ސަބަބުން އިސްރާއީލުގެ 12،500 ސިފައިން ނުކުޅުދުންތެރިކަން ހުންނަ މީހުންނަށް ވެފައިވާކަމަށް ބެލެވޭކަމަށް އިސްރާއީލްގެ ނޫހެއް ކަމަށްވާ ޔެޑިއޮތު އަހްރޮނޮތުން ރިޕޯޓުކޮށްފިއެވެ.
އެކަން ހޯދީ، އިސްރާއީލު ސިފައިންގެ ތެރޭގައި ލިބުނު އަނިޔާތަކުގެ އެސެސްމަންޓެއް ހެދުމަށް އިސްރާއީލުގެ އަސްކަރީ ވުޒާރާއިން ހޯދި ކުންފުންޏަކުންނެވެ.
އެ ކުންފުނިން އާންމުކޮށްފައިވާ ރިޕޯޓަކަށް ހަވާލާދީ ޔެޑިއޮތު ނޫހުން ބުނާ ގޮތުން 12،500 ސިފައިންނަކީ އަންދާޒާ ކުރެވޭ އަދަދެކެވެ. ނަމަވެސް އެ އަދަދު 20،000 ހުން މަތިވާނެކަމަށް ބެލެވޭކަމަށް އެ ނޫހުން ބުނެއެވެ.
އިސްރާއީލުގެ އަސްކަރީ ވުޒާރާގެ ރިހެބިލިޓޭޝަން ޑިޕާޓްމަންޓުން މިހާރު ވެސް ދަނީ ނުކުޅެދުންތެރިކަން ހުންނަ އިސްރާއީލުގެ 60،000 ސިފައިންނަށް ފަރުވާ ދެމުންނެވެ.
2023ވަނަ އަހަރު އެ ޑިޕާޓްމަންޓުގައި މަދުވެގެން 5،000 މީހުން އެޑްމިޓްކޮށްފައިވާއިރު އޭގެ ތެރޭގައި ހަތެއް އޮކްޓޯބަރުން ފެށިގެން އެޑްމިޓްކޮށްފައިވާ 3،400 މީހުން ހިމެނެއެވެ. މި އަދަދުތަކުގައި ހިމެނެނީ ހަމައެކަނި ސިފައިންނެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ޒަހަމްވި އިސްރާއީލު ސިފައިންގެ އަދަދު 3000 އަށް އަރައިފައިވާ ކަމަށް ޑިސެމްބަރު މަހުގެ ފަހުކޮޅު އަސްކަރީ ވުޒާރާއިން ހާމަކޮށްފައިވެއެވެ.