07 Jan 2024, 08:46
އަމީނީ މަގުގެ ފަހު ދެ ސެގްމެންޓުގައި ތާރު އެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ރޭ ފަށައިފިއެވެ.
އެކްސްގައި ކުރި ޕޯސްޓެއްގައި އާރްޑީސީން ބުނީ، އަމީނީމަގުގެ ސެގްމެންޓް 12 އަދި 13 ގެ މަސައްކަތް ޝެޑިއުލް ކުރެވިފައިވާ ގޮތަށް ކުރެވެމުންދާ ކަމަށެވެ.
އެގޮތުން އޭބީސީ ފަށަލައިގެ މަސައްކަތް ނިމި، ބިޓުމެން ސްޕްރޭ ޖެހުމަށް ފަހު، ރޭ ތާރު އެޅުމުގެ މަސައްކަތް ފަށާފައިވާ ކަމަށް އެ ކުންފުނިން ބުންޏެވެ.
"އަމީނީމަގު ހެދުމުގެ މަޝްރޫއުގެ ދަށުން އަޕްގްރޭޑް ކުރެވޭ ސްޓޯމް ވޯޓާ ޕަމްޕްތަކުގެ އައުޓް ފޯލް ހޮޅި އެޅުމާއި ޑީވޯޓަރިން އައުޓް ފޯލް ހޮޅި އެޅުމަށް ބޮޑުތަކުރުފާނު މަގުގެ ތާރު ކަނޑައިގެން ކުރަންޖެހޭ މަސައްކަތް މިހާރު އަންނަނީ ކުރަމުން،" އާރްޑީސީން ބުންޏެވެ.
'ސަން'އާ ވާހަކަދައްކަވަމުން އާރްޑީސީގެ އޮފިޝަލަކު ވިދާޅުވީ ފަހު ދެ ސެގްމެންޓްގެ މަސައްކަތް 50 ދުވަސްތެރޭ ނިންމައިލުމަށް މީގެ ކުރިން ވެސް ޓާގެޓު ކޮށްފައިވާ ކަމަށެވެ. އެގޮތުން ބާކީ މިހާރު އޮތް 20 ވަރަކަށް ދުވަސްތެރޭ ފަހު ދެ ސެގްމެންޓުގެ މަސައްކަތް އެއްކޮށް ނިންމައިލެވޭނެ ކަމަށް އޭނާ ވިދާޅުވިއެވެ.
ނަމަވެސް މޫސުން ގޯސްވެ، ކުރިމަތިވެދާނެ ދަތިތަކެއްގެ ސަބަބުން ލަސްކަމެއް އަތުވެދާނެ ކަމަށް އޭނާ ވިދާޅުވިއެވެ.
ނިމުނު ސަރުކާރުގައި މަސައްކަތް ފެށި، އަމީނީ މަގުގެ ނުނިމި އޮތް ދެ ސެގްމެންޓް ހެދުމުގެ މަސައްކަތް ފަށާފައިވަނީ މިދިޔަ މަހުގެ ނުވަވަނަ ދުވަހުއެވެ.
ކުރީ ސަރުކާރުގެ ޕްލޭނިން މިނިސްޓްރީން އާރުޑީސީއާ ހަވާލުކޮށްގެން އަމީނީ މަގު ޒަމާނީ ފެންވަރަކަށް ހެދުމުގެ މަސައްކަތް ފަށާފައިވަނީ މިދިޔަ އަހަރުގެ އޮގަސްޓު މަހުއެވެ. މި ޕްރޮޖެކްޓް ހަވާލުކުރީ 84.4 މިލިއަން ރުފިޔާއަށެވެ.