06 Jan 2024, 16:54
ބްރެޒިލް ދުށް އެންމެ ފާހަގަ ކޮށްލެވޭ އެއް ކުޅުންތެރިޔާ އަދި ކޯޗް ކަމަށްވާ މާރިއޯ ޒަގަލޯ އުމުރުން 92 އަހަރުގައި މަރުވެއްޖެއެވެ.
ޒަގަލޯ މަރުވިކަން އޭނާގެ އާއިލާއިން ހާމަކޮށްފައިވަނީ އޭނާގެ އިންސްޓަގްރާމް ޕޭޖްގައި އާންމު ކުރި ބަޔާނެއްގައެވެ.
ޒަގަލޯ ވަނީ ބްރެޒިލް ޤައުމީ ޓީމާއެކު ހަތަރު ފަހަރު ފީފާ ވޯލްޑް ކަޕް ކާމިޔާބު ކުރުމުގެ ނަސީބު ލިބިފައެވެ. އަދި އޭނާ ވެފައިވަނީ ކުޅުންތެރިއެއްގެ އިތުރުން ކޯޗެއްގެ ހައިސިއްޔަތުން ވޯލްޑް ކަޕް ކާމިޔާބު ކުރި ފުރަތަމަ މީހާއަށެވެ.
ޒަގަލޯއަކީ ބްރެޒިލްއިން 1958 އަދި 1962 ވަނަ އަހަރު ޖެހިޖެހިގެން ދެފަހަރު ވޯލްޑް ކަޕް ކާމިޔާބު ކުރި ޓީމްގެ ވިންގާއެކެވެ. އަދި އޭނާވަނީ 1970 ވަނަ އަހަރު ދުނިޔެ ދުށް އެންމެ މޮޅު ފުޓްބޯޅަ ކުޅުންތެރިޔާކަމަށް ގިނަ ބަޔަކު ގަބޫލް ކުރާ އެއް ކުޅުންތެރިޔާ ކަމަށްވާ ޕެލޭ ވޯލްޑް ކަޕް ކާމިޔާބު ކުރި ޓީމްގެ ކޯޗް ކަންވެސް ކޮށްފައެވެ.
ގިނަ ބަޔަކު ގަބޫލް ކުރާ ގޮތުގައި ޒަގަލޯ އޭރު ކޯޗް ކޮށްދިން ބްރެޒިލްގެ ޓީމަކީ ދުނިޔޭ ދުށް އެންމެ ފާހަގަ ކޮށްލެވޭ ޤައުމީ ޓީމެވެ. އެ ޓީމްގައި ޕެލޭގެ އިތުރުން ޖާޒީނިއޯ އާއި ކާލޯސް އާލްބާޓޯ ފަދަ ކުޅުންތެރިން ކުޅެފައިވެއެވެ.
އޭނާ އެންމެ ފަހުން ވޯލްޑް ކަޕް ކާމިޔާބު ކުރުމުގެ ނަސީބު ލިބިފައިވަނީ 1994 ވަނަ އަހަރު ކާލޯސް އަލްބާޓޯ ޕެރެއިރާގެ އެސިސްޓަންޓް ކޯޗެއްގެ ގޮތުގައި މަސައްކަތް ކުރި ފަހަރުއެވެ. ނަމަވެސް އޭގެ ފަހުން ޒަގަލޯގެ ކޯޗް ކަމުގެ ދަށުން އޭނާ ވަނީ 1998 ވަނަ އަހަރުގެ ވޯލްޑް ކަޕްގެ ފައިނަލަށް ވެސް ބްރެޒިލް ގެންގޮސްދިފައެވެ.
ޒަގަލޯ ބްރެޒިލް ޤައުމީ ޓީމަށް ކުޅެން ފަށާފައިވަނީ އުމުރުން 26 އަހަރުގައެވެ. އެއީ 1958 ވަނަ އަހަރުގެ ވޯލްޑް ކަޕްގެ ކުޑަ ދުވަސް ކޮޅެއް ކުރިންނެވެ. އޭނާ ވަނީ އެ ފަހަރުގެ ވޯލްޑް ކަޕްގައި ވާދަކޮށް ސްވިޑަން އަތުން މޮޅުވި ފައިނަލްގައި ބްރެޒިލްގެ ހަތަރު ވަނަ ލަނޑުވެސް ޖަހާދީފައެވެ.
ބުނެވޭގޮތުގައި އޭނާއަކީ އެ މުބާރާތުގެ ފައިނަލްގައި ކުޅުނު ކުޅުންތެރިންގެ ތެރެއިން ދުނިޔޭގައި މިހާތަނަށް ހުރި ހަމައެކަނި ކުޅުންތެރިޔާއެވެ. އަދި 1962 ވަނަ އަހަރުގެ ވޯލްޑް ކަޕް ކާމިޔާބު ކުރުމުގައިވެސް ޒަގަލޯ ވަނީ މުހިންމު ދައުރެއް އަދާކޮށްފައެވެ.
ޒަގަލޯ ފުޓްބޯޅަ ކުޅުން ހުއްޓާލައިފާވަނީ 1965 ވަނަ އަހަރުއެވެ. އޭރު އޭނާވަނީ ޤައުމީ ޓީމަށް 33 މެޗް ކުޅެދީފައެވެ. މީގެ އިތުރުން އޭނާ ކުލަބް ލެވެލްގައި ކުޅެފައިވަނީ އެމެރިކާ، ފްލެމެންގޯ އަަދި ބޮޓަފޯގޯއަށެވެ. އޭނާ ކޯޗް ކޮށްދޭން ފަށާފައިވަނީ ބޮޓަފޯގޯއިންނެވެ. އަދި އުމުރުން 38 އަހަރުގައި 1970 ވަނަ އަހަރުގެ ވޯލްޑް ކަޕްގެ ކުޑަ ދުވަސް ކޮޅެއް ކުރިން އޭނާ ވަނީ ބްރެޒިލް ޤައުމީ ޓީމްގެ ކޯޗްކަމާ ހަވާލުވެފައެވެ. އެ ފަހަރުގެ ވޯލްޑް ކަޕް ބްރެޒިލް ކާމިޔާބު ކުރީ އެއްވެސް މެޗަކުން ބަލިނުވެއެވެ.
މީގެ އިތުރުން އޭނާވަނީ 2002 ވަނަ އަހަރު ޖަޕާނާއި ދެކުނު ކޮރެއާގައި ބޭއްވި މުބާރާތުގައިވެސް ހާއްސަ އެޑްވައިޒަރެއްގެ ދައުރު އަދާކޮށްފައެވެ. އެހެން ކަމުން ބްރެޒިލްއިން މިހާތަނަށް ކާމިޔާބު ކޮށްފައިވާ ވޯލްޑް ކަޕްގެ ފަސް ތަށި ކާމިޔާބު ކުރުމުގައިވެސް ޒަގަލޯގެ ދައުރު އެބައޮތެވެ.
ޒަގަލޯ ކޯޗް ކޮށްދިނުމުން ރިޓަޔާ ކޮށްފައިވަނީ 2006 ވަނަ އަހަރުގެ ވޯލްޑް ކަޕްގައި ޕެރެއިރާގެ އެސިސްޓަންޓް ކޯޗެއްގެ ގޮތުގައި މަސައްކަތް ކުރުމަށްފަހުއެވެ.