06 Jan 2024, 16:41
ޕޯސްޓު މެދުވެރިކޮށް ރާއްޖެ އެތެރެ ކުރަން އުޅުނު އެއް ކިލޯއަށް ވުރެ ގިނަ މަސްތުވާތަކެތި ކަސްޓަމްސްއިން އަތުލައިގަނެފިއެވެ.
މިކަމާ ގުޅިގެން ކަސްޓަމްސްއިން ބުނީ، މި ތަކެތި އަތުލައިގަތީ، މި މަހުގެ ދެ ވަނަ ދުވަހު، ޕޯސްޓު މެދުވެރިކޮށް ރާއްޖެ ގެނައި ޕެކޭޖެއް ބަލާ ފާސްކުރަމުން ދަނިކޮށް ކަމަށެވެ.
މި ތަކެތީގެ ބަރުދަނުގައި މުޅި ޖުމްލަ 1.132 ކިލޯގްރާމު ހުރި ކަމަށްވެސް ކަސްޓަމްސްއިން މައުލޫމާތު ދެއެވެ.
އަދި ކަސްޓަމްސްއިން އެ ޕެކޭޖު އިތުރަށް ބަލާ ފާސް ކުރީ، އޭގެ ތެރޭގައި މަސްތުވާތަކެތި ފޮރުވައިފައި ހުރި ކަމަށް ކަސްޓަމްސް އަށް ޝައްކު ކުރެވިގެން ކަމަށްވެސް އެ އިދާރާއިން ވަނީ ބުނެފައެވެ.
އެ ގޮތުން ބަލާ ފާސް ކުރެވުނު ޕެކޭޖުގެ ތެރެއިން ފެނުނު މަސްތުވާތަކެތި ކަމަށް ޝައްކު ކުރެވޭ ތަކެތި، ފުރަތަމަ މަރުހަލާގައި ތަޙުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯންއަށް ޕޮސިޓިވް ވެފައިވާ ކަމަށްވެސް ކަސްޓަމްސްއިން ވަނީ ބުނެފައެވެ.
އިތުރަށް މި މައްސަލަ ތަހުގީގު ކުރުމަށްޓަކައި، މި ޕެކޭޖު ބަލައި ކަސްޓަމްސްއަށް އައި 20 އަހަރުގެ ދިވެހި ފިރިހެނަކު، މިހާރު ފުލުހުންނާ ހަވާލު ކޮށްފައިވާ ކަމަށްވެސް ކަސްޓަމްސްއިން މައުލޫމާތު ދެއެވެ.