06 Jan 2024, 15:38
ކުރީ ސަރުކާރުން، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަން "އާބަންކޯ"އަށް ބަދަލުކޮށް، އެ ކުންފުނި ރީބްރޭންޑް ކޮށްފައިވަނީ ބަޔަކަށް ފައިސާގަނޑެއް ދޭން އުސޫލުން ކަމަށް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތުހުމަތުކުރައްވައިފިއެވެ.
ޕީއެންސީގެ ކެމްޕެއިން އިވެންޓެއްގެ ތެރެއިން ހުޅުމާލޭ ރައްޔިތުންނާ ބައްދަލު ކުރައްވައި ވާހަކަ ދައްކަވަމުން ރައީސް ވިދާޅުވީ އެ މަނިކުފާނު "އެޗްޑީސީ" އޭ ދަންނަވަނީ އެ ކުންފުންޏަށް ކިޔަނީ އެޗްޑީސީ ކަމަށް ވާތީ ކަމަށެވެ. އަދި، ކުރީ ސަރުކާރުން މަތި މަތިން "ސުޕާފިޝަލް" ގޮތަކަށް ނަން ބަދަލުކުރެއްވީ ކަމަށެވެ.
ޤާނޫނީ ގޮތުން ކުންފުނީގެ ނަން "އާބަންކޯ" އަށް ބަދަލުކުރުމުގެ އެއްވެސް މަސައްކަތެއް ނިމިދިޔަ އެމްޑީޕީގެ ސަރުކާރުން ކޮށްފައިނުވާކަން، ރައީސް ފާހަގަކުރެއްވިއެވެ.
"ޤާނޫނީ ގޮތުން ކުންފުންޏަށް ކިޔަނީ އެޗްޑީސީ. އެއްވެސް ބަދަލެއް ނެތް ގެނެސްފައި މިދިޔަ ސަރުކާރުން ނަން ބަދަލުކުރިއިރު. ބޮޑަށް ހީވަނީ ކޮންމެވެސް ފަރާތަކަށް، ކޮންމެވެސް ބޮޑު ފައިސާގަނޑެއް ދިނުމަށް ބްރޭންޑިން މަސައްކަތެއް ކޮށްލާފައި އޮތީކަމަށް. ޤާނޫނީ އެއްވެސް ކަމެއް ނެތް ކޮށްފައެއް." ރައީސް ވިދާޅުވިއެވެ.
އެޗްޑީސީގެ ނަން "އާބަންކޯ"އަށް ބަދަލުކޮށް އެ ކުންފުނި ރީބްރޭންޑް ކުރަން، 1.2 މިލިއަން ރުފިޔާ ޚަރަދު ކޮށްފައިވާ ކަމަށް އެ ކުންފުނިން ކުރިން ބުނެފައިވެއެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން މީހަކު ކުރި ސުވާލަކަށް ޖަވާބުދެމުން އެ ކުންފުނިން ކުރިން ބުނީ އެޗްޑީސީ ރީބްރޭންޑްކޮށް، ކުންފުނީގެ ނަން، މޯލްޑިވްސް އާބަން ޑިވެލޮޕްމަންޓް ކޯޕަރޭޝަނަށް ބަދަލުކޮށް، ބްރޭންޑް ނަމަކަށް އާބަންކޯ ކިޔަން ނިންމާފައިވަނީ 2021 ވަނަ އަހަރުގައި ކަމަށެވެ.
އޭރުގެ ތަފްސީލުތަކަށް ބަލާއިރު، އާބަންކޯއިން އެންމެ ބޮޑު ޚަރަދެއް ކޮށްފައިވަނީ އެ ކުންފުނީގެ ދިދަ ޓެންޓް އަދި ޑިސްޕްލޭ ބެނާ ސްޓޭންޑް ހެދުމަށެވެ. އެކަމަށް 353،008 ރުފިޔާ ޚަރަދު ކޮށްފައިވެއެވެ. ދެވަނައަށް އެންމެ ބޮޑު ޚަރަދެއް ކޮށްފައިވަނީ ގަލަމާއި، ނޯޓް ފޮތް އަދި ފެންބޯ މަގަށެވެ. އެކަމަށް ޚަރަދު ކޮށްފައިވަނީ 279،000 ރުފިޔާއެެވެ.
މާލެ ސިޓީގެ މުނިސިޕަލް ހުރިހާ ޚިދުމަތްތަކެއް، މާލެ ސިޓީ ކައުންސިލަށް ބަދަލުކުރެއްވުމަކީ ރައީސް ޑރ. މުއިއްޒު ރިޔާސީ އިންތިޚާބުގެ ތެރޭ ވެވަޑައިގެންނެވި ރިޔާސީ ވައުދުފުޅެކެވެ. އެ ކަން ތަންފީޒުކުރުމަށް ޓަކައި މިހާރު ކުރަމުން އަންނަނީ އިދާރީ މަސައްކަތްތަކެވެ.
މިހާތަނަށް ހުޅުމާލެ ފުރަތަމަ ފިޔަވައްސާއި، ދެވަނަ ފިޔަވަހީގެ މުނިސިޕަލް ޚިދުމަތްތައް ދެމުން ދިޔައީ އާބަންކޯއިންނެވެ.