06 Jan 2024, 18:33
އަންނަ ހޮނިހިރު ދުވަހު އޮންނަ މޭޔަރު އިންތިޚާބުގައި އެއްވެސް ކެންޑިޑޭޓަކާ ވާދަނުކުރާ ކަމަށާއި، ހަމައެކަނި ވާދަކުރައްވަނީ މާލެ ސަރަހައްދަށް ދިމާވެފައިވާ މައްސަލަތަކާ ކަމަށް، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ޓިކެޓުގައި މާލޭ ސިޓީ ކައުންސިލްގެ މޭޔަރު ކަމަށް ވާދަކުރައްވާ އާދަމް އާޒިމް މިއަދު ވިދާޅުވެއްޖެއެވެ.
ރާއްޖެ ޓީވީގެ 'ފަށާއިރު' ޕްރޮގްރާމުގައި އާޒިމް ވިދާޅުވީ، ކޮންމެ ދުވަހަކު ހެނދުނު ހޭލަނީ، ކޮންމެވެސް މީހަކަށް ދިމާވެފައިވާ މައްސަލައެއް ހައްލުކޮށްދިނުމުގެ މަގުސަދުގައި ކަމަށާއި، އަބަދުވެސް ކުރައްވާނީ ރައްޔިތުންނަށް ދިމާވެފައިވާ މައްސަލަތައް ހައްލުކުރުމުގެ މަސައްކަތް ކަމަށެވެ.
މާލޭ ސަރަހައްދުގައި ދިރިއުޅޭ ހުރިހާ ރައްޔިތުންނަށް އުފާވެރިކަން ހޯއްދަވައި ދެއްވާނެކަމުގެ ޔަގީންކަން އަރުވަމުން އާޒިމް ވިދާޅުވީ، އަބަދުވެސް އިސްކަންދެއްވާނީ މާލެ، ވިލިމާލެ އަދި ހުޅުމާލޭ ރައްޔިތުންނަށް ކުރިމަތިވެފައިވާ ބޮޑެތި ގޮންޖެހުންތަކުގެ ހައްލު ހޯއްދަވައި ދެއްވުމަށް ކަމަށެވެ.
ގާނޫނު އަސާސީގައި ޖުމުލަކޮށް އޮތީ ރައްޔިތުންނަށް ހިތްފަސޭހަ، އުފާވެރި ދިރިއުޅުމެއް ހޯދައިދިނުންކަމަށާއި އެކަން ކުރުމަށް، ކުރަން ޖެހޭ އެއްވެސް ކަމަކަށް ހުރަސް ނާޅުއްވާނެކަމަށް އޭނާ ވިދާޅުވިއެވެ.
މާލޭ ސިޓީ ކައުންސިލަށް މިހާރު ލިބެމުންދާ އާމްދަނީ އެއަށް ވުރެ އެތައް ގުނައެއް އިތުރުކުރުމުގެ ހިލްމާއި ގާބިލުކަން ވެސް ހުރީ އޭނާގެ ކިބައިގައި ކަމަށް އާޒީމް ވިދާޅުވިއެވެ.
"ލާރިން ލާރި ހެދުމާއި ލާރިން ރަނގަޅަށް ބޭނުންކޮށްގެން ލާރިން ރަނގަޅު ތަންތަން ހަދައި މުސްތަގުބަލެއް ބިނާ ކުރެވޭނީ އެކަން ދަންނަ މީހުންނަށް، އެކަމުގެ ހުނަރު ހުރި މީހުންނަށް، އެކަމުގެ ނޮލެޖު ހުރި މީހުންނަށް،" އާޒިމް ވިދާޅުވިއެވެ.
އެގޮތުން، މިދިޔަ ދައުރުގައި މޯލްޑިވްސް ކޮންސްޓްރަކްޝަން ކޮމްޕެނީ (އެމްޓީސީސީ)ގެ ސީއީއޯ މަގާމާއި ހަވާލުވިއިރު، އެ ކުންފުނީގައި ހުރީ ދެ ބިލިއަން ރުފިޔާ ކަމަށާއި، ތިން އަހަރުތެރޭ އެ ކުންފުންޏަށް، ފަސް ބިލިއަން ރުފިޔާގެ އެސެޓު ހަދާފައިވާނެ ކަމަށް އޭނާ ވިދާޅުވިއެވެ.
އާޒިމް ވިދާޅުވީ އޭނާއަށް 10،000 އަށްވުރެ ގިނަ މުވައްޒަފުންނާއެކު، ތަފާތު ކުންފުނިތަކުގައި މަސައްކަތްކުރެވިއްޖެ ކަމަށާއި، ރަށެއް ތަރައްގީ ކުރުމަށް ބޭނުންވާ ހުރިހާ ޚިދުމަތެއް ދިނުމުގެ ތަޖުރިބާ އޭނާގެ ހުރި ކަމަށެވެ.
އާޒިމް ވަނީ އެމްޓީސީސީގެ ސީއީއޯގެ އިތުރުން، އެމްޑަބްލިއުއެސްސީ އާއި އެސްޓީއޯގެ މެނޭޖިން ޑިރެކްޓަރުގެ މަގާމު ވެސް އަދާކުރައްވާފައެވެ.
"ފެހި ތަނަވަސް މާލެ" ނަމުގައި އާޒިމްގެ މެނިފެސްޓޯ މިހާރު ވަނީ ލޯންޗު ކޮށްފައެވެ.
މާލޭ ސިޓީ މޭޔަރު ހޮވުމުގެ އިންތިޚާބު އޮންނާނީ އަންނަ ހޮނިހިރު ދުވަހުގައެވެ.
އެ އިންތިޚާބުގައި އާޒިމްއާ ވާދަކުރައްވަނީ ޕީއެންސީގެ ކެންޑިޑޭޓް އައިޝަތު އާޒިމާ ޝަކޫރާއި ދަ ޑިމޮކްރެޓްސްގެ ކެންޑިޑޭޓް ސައިފް ފާތިހާއި ކުރީގެ ރައީސް އަބްދުﷲ ޔާމީން އުފައްދާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދުގެ އިތުރުން އަމިއްލަ ގޮތުން ވާދަ ކުރައްވާ ޝުއައިބު އަލީ(ފުރަހަނި ޝުއައިބު) އެވެ.