06 Jan 2024, 20:22
އެންބީއޭ ބާސްކެޓް ބޯޅަ މުބާރާތުގައި މިސީޒަންގައި މޮޅު ކުޅުމެއް ދައްކަމުން އަންނަ ބޮސްޓަން ސެލްޓިކްސް އާއި ޔޫޓާ ޖޭޒް ބައްދަލުކުރި މެޗު ސެލްޓިކްސް ކާމިޔާބުކޮށްފިއެވެ.
ބޮސްޓަންގެ ޓީޑީ ގާޑެންގައި ކުޅުނު މި މެޗު ސެލްޓިކްސް ކާމިޔާބު ކޮށްފައިވަނީ 126 ޕޮއިންޓް 97 ޕޮއިންޓުންނެވެ. މިމެޗުގައި ސެލްޓިކްސްގެ ޖޭސަން ޓެޓުމްވަނީ 30 ޕޮއިންޓް ހޯދައިދީ ނުވަ ރީބައުންޑް ނަގައިދީ ފަސް އެސިސްޓް ކޮށްފައެވެ. އަދި ޖޭޒްއަށް އެންމެ ރަނގަޅު ކުޅުމެއް ދެއްކީ 17 ޕޮއިންޓް ހޯދައިދީ ފަސް ރީބައުންޑް ނަގައިދިީ ފަސް އެސިސްޓް ދިން ލައުރީ މާކަނެންއެވެ.
މިމުބާރާތުގައި އޯލާންޑޯ މެޖިކް އާއި އެންމެ ފަހުގެ ޗެމްޕިއަން ޑެންވާ ނަގެޓްސް ބައްދަލުކުރިމެޗު 122 ޕޮއިންޓް 120 ޕޮއިންޓްގެ ކުޑަ ތަފާތަކުން ކާމިޔާބު ކުރީ މެޖިކްއެވެ.
އެ މެޗުގައި މެޖިކްގެ ޕޯލޯ ބަންޗޭރޯ ވަނީ 32 ޕޮއިންޓް ހޯދައިދީ 10 ރީބައުންޑް ނަގައިދީ 11 އެސިސްޓް ކޮށް ޓްރިޕްލް ޑަބަލްއެއް ހަދައިފައެވެ. އަދި ގަނެޓްސްއަށް އެންމެ ރަނގަޅު ކުޅުމެއް ދެއްކީ 29 ޕޮއިންޓް ހޯދައިދީ ހަތަރު ރީބައުންޑް ނަގައިދީ އަށް އެސިސްޓް ދިން ނިކޮލާ ޔޮކިޗްއެވެ.
މީގެ އިތުރުން ސެކްރެމެންޓޯ ކިންގްސް އާއި ޓޮރޮންޓޯ ރެޕްޓާސް ބައްދަލުކުރި މެޗު 135 ޕޮއިންޓް 130 ޕޮއިންޓުން ކާމިޔާބުކުރީ ކިންގްސްއެވެ. މިމެޗުގައި ކިންގްސްގެ ޑޮމަންޓާސް ސަބޮނިސްވަނީ 24 ޕޮއިންޓް ހޯދައިދީ 15 ރީބައުންޑް ނަގައިދީ 11 އެސިސްޓް ކޮށް ޓްރިޕްލް ޑަބަލްއެއް ހަދައިފައެވެ. އަދި ރެޕްޓާސްއަށް އެންމެ ރަނގަޅު ކުޅުމެއް ދެއްކީ 20 ޕޮއިންޓް ހޯދައިދީ ފަސް ރީބައުންޑް ނަގައިދީ އަށް އެސިސްޓް ދިން އިމަނުއެލް ކުއިކްލީއެވެ.
މިމުބާރާތުގައި ކުޅުނު އެހެން މެޗުތަކަށް ބަލައިލާއިރު އިންޑިއާނާ ޕޭސާސް އާއި އެޓްލާންޓާ ހޯކްސް ބައްދަލުކުރިމެޗު 150 ޕޮއިންޓް 116 ޕޮއިންޓުން ޕޭކާސް ކާމިޔާބު ކުރިއިރު ނިއުޔޯކް ނިކްސް އާއި ފިލަޑެލްފިއާ ސެވަންޓީ ސިކްސާސް ބައްދަލުކުރިމެޗު 128 ޕޮއިންޓް 92 ޕޮއިންޓުން ކާމިޔާބު ކޮށްފައިވަނީ ނިކްސްއެވެ. ކްލީވްލަންޑް ކެވެލިއާސް އާއި ވޮޝިންޓަން ވިޒަޑްސް ބައްދަލުކުރިމެޗު 114 ޕޮއިންޓް 90 ޕޮއިންޓުން ކެވެލިއާސް ކާމިޔާބު ކުރިއިރު ބްރޫކްލިން ނެޓްސް އާއި އޮކްލޮހޯމާ ސިޓީ ތަންޑާ ބައްދަލުކުރި މެޗު 124 ޕޮއިންޓް 115 ޕޮއިންޓުން ކާމިޔާބު ކޮށްފައިވަނީ ނެޓްސްއެވެ.
މީގެއިތުރުން ލޮސް އެންޖަލިސް ކްލިޕާސް އާއި ނިއުއޯލިއަންސް ޕެލިކަންސް ބައްދަލުކުރި މެޗު 111 ޕޮއިންޓް 95 ޕޮއިންޓުން ކްލިޕާސް ކާމިޔާބު ކުރިއިރު މިނެސޯޓާ ޓިމްބާވުލްވްސް އާއި ހިއުސްޓަން ރޮކެޓްސް ބައްދަލުކުރި މެޗު 122 ޕޮއިންޓް 95 ޕޮއިންޓުން ކާމިޔާބު ކޮށްފައިވަނީ ޓިމްބާވުލްވްސްއެވެ.
ޝިކާގޯ ބުލްވްސް އާއި ޗާލޮޓް ހޯނެޓްސް ބައްދަލުކުރި މެޗު 104 ޕޮއިންޓް 91 ޕޮއިންޓުން ބުލްސް ކާމިޔާބު ކުރިއިރު ޑެލަސް މެވްރިކްސް އާއި ޕޯޓްލަންޑް ޓްރެއިލް ބްލޭޒާސް ބައްދަލުކުރި މެޗު 139 ޕޮއިންޓް 103 ޕޮއިންޓުން ކާމިޔާބު ކޮށްފައިވަނީ މެވްރިކްސްއެވެ.
ފީނިކްސް ސަންސް އާއި މައޭމީ ހީޓް ބައްދަލުކުރި މެޗު 113 ޕޮއިންޓް 97 ޕޮއިންޓުން ސަންސް ކާމިޔާބު ކުރިއިރު މެމްފިސް ގްރިޒްލީސް އާއި ލޮސް އެންޖަލިސް ލޭކާސް ބައްދަލުކުރި މެޗު 127 ޕޮއިންޓް 113 ޕޮއިންޓުން ކާމިޔާބު ކޮށްފައިވަނީ ގްރިޒްލީސްއެވެ. އަދި ގޯލްޑަން ސްޓޭޓް ވޮރިއާސް އާއި ޑެޓްރޮއިޓް ޕިސްޓަންސް ބައްދަލުކުރި މެޗު 113 ޕޮއިންޓް 109 ޕޮއިންޓުން ކާމިޔާބު ކޮށްފައިވަނީ ވޮރިއަސް އެވެ.