06 Jan 2024, 13:26
އިނގިރޭސި އެފްއޭ ކަޕްގެ ތިން ވަނަ ބުރުގައި ބްރެންޓްފަޑް އާއި ވުލްވަހެމްޕްޓަން ވޮންޑަރާސް ބައްދަލުކުރި މެޗް އެއްވަރުވެއްޖެއެވެ.
ބްރެންޓްފަޑްގެ ދަނޑުގައި ކުޅުނު މި މެޗު ނިމުނީ އެއް ލަނޑު އެއް ލަނޑުން ދެ ޓީމް އެއްވަރު ވެގެންނެވެ. އަދި މިއާއެކު ހަތަރު ވަނަ ބުރުން ޖާގަ ހޯދާ ޓީމެއް ކަށަވަރު ކުރުމަށްޓަކައި މި ދެ ޓީމްގެ މެދުގައި ރީޕްލޭ ކުޅެވޭނެއެވެ.
މި މެޗު ދެން ކުޅެވޭނީ ވުލްވްސްގެ ދަނޑުގައެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބްރެންޓްފަޑްއިންނެވެ. ނަމަވެސް މިކަން މިހެން ވުމުގައި މެޗްގެ ނުވަ ވަނަ މިނެޓްގައި ވުލްވްސްގެ މެދުތެރެއަށް ކުޅެމުންދާ ޖޯ ގޯމޭޒްއަށް ދެއްކި ރަތް ކާޑު މުހިންމު ދައުރެއް އަދާކޮށްފައިވެއެވެ.
މި ރަތްކާޑު ދައްކާފައިވަނީ ބްރެންޓްފަޑްގެ ކެޕްޓަން ކްރިސްޓިއަން ނޯގާޑަށް ކުރި ނުރައްކާތެރި ފައުލަކާއި ގުޅިގެންނެވެ. މިހާދިސާ އާއި ގުޅިގެން ނޯގާޑަށް އިތުރަށް ކުޅެވޭގޮތް ނުވެގެންވަނީ ބާލާފައެވެ. މިއާއެކު ވުލްވްސްއިން މެޗްގެ ބޮޑު ބައި ކުޅެފައިވަނީ އެއް ކުޅުންތެރިއެއް މަޑުކޮށެވެ.
މި މެޗުގައި ބްރެންޓްފަޑްއިން ކާމިޔާބު ކުރި ހަމައެކަނި ލަނޑު ޖަހައި މެޗްގެ ލީޑު އެ ޓީމަށް ނަގައިދިނީ މެޗްގެ 41 ވަނަ މިނެޓްގައި ނީލް މޯޕޭއެވެ. މި ލަނޑާއެކު މި މެޗުން ބްރެންޓްފަޑް މޮޅުވެދާނެ ކަމަށް ހީވި ނަމަވެސް މެޗްގެ 64 ވަނަ މިނެޓްގައި ޓޮމީ ޑޮއިލް ޖަހައިދިން ލަނޑާއެކު މެޗުގެ ނަތީޖާ ހަމަހަމަ ވެގެން ދިޔައެވެ. މި މެޗުގައި އިތުރު ލަނޑެއް ޖެހޭތޯ ދެ ޓީމުން މަސައްކަތް ކުރި ނަމަވެސް އެކަން ކާމިޔާބު ވާގޮތެއް ނުވިއެވެ.
މެޗަށް ފަހު ވާހަކަ ދައްކަމުން ވުލްވްސްގެ ކޯޗް ގެރީ އޯނީލް ވަނީ އޭނާގެ ކުޅުންތެރިންގެ ފަރާތުން މި މެޗުގައި ފެނިގެންދިޔަ ކުޅުމަށް ތައުރީފް ކޮށްފައެވެ.
އޭނާ ހާމަކުރިގޮތުގައި މެޗުގެ ބޮޑު ބައި އެއް ކުޅުންތެރިއެއް މަދުން ރަށުން ބޭރުގައި ކުޅުމަކީ ފަސޭހަ ކަމެއް ނޫނެވެ. ނަމަވެސް އޭނާގެ ކުޅުންތެރިން މި މެޗުގައި އެއް ކުޅުންތެރިއެއް މަދުއިރު ފަހަތުން އަރާ މެޗުގެ ނަތީޖާ ހަމަހަމަ ކުރުމަކީ ރަނގަޅު ކާމިޔާބީ އެއް ކަމަށް ބުންޏެވެ. އަދި ގޯމޭޒްއަށް ދެއްކި ރަތް ކާޑަކީ ރަނގަޅު ކާޑެއް ކަމަށާއި ނަމަވެސް އޭގެ އިތުރުން މި މެޗުގައި ބްރެންޓްފަޑްގެ ދެ ކުޅުންތެރިއަކަށް ރާތް ކާޑު ދައްކަން ޖެހޭ ދެ ހާދިސާއެއްގައި ރަތް ކާޑު ނުދެއްކި ކަމުގެ ޝަކުވާ އޭނާ ކުރިއެވެ.
ބްރެންޑްފަޑްގެ ކޯޗު ތޯމަސް ފްރޭންކް ހާމަކުރިގޮތުގައި މި މެޗުގައި އޭނާގެ ކުޅުންތެރިންގެ ފަރާތުން ފެނިގެންދިޔައީ މިފެންވަރުގެ މެޗެއްގައި ފެނިގެން ދާންވާނެފަދަ ކުޅުމެއް ނޫނެވެ.
އޭނާ ހާމަކުރިގޮތުގައި އަމިއްލަ ދަނޑުގައި މެޗްގެ 80 މިނެޓަށް ވުރެ ގިނައިރު 10 ކުޅުންތެރިންނާ ދެކޮޅަށް ކުޅެ މެޗުން މޮޅުނުވެވުމަކީ ކުޅުންތެރިންގެ ކިބާގައި ފެންވަރު ނެތުމެވެ.