06 Jan 2024, 12:19
އިނގިރޭސި އެފްއޭ ކަޕްގެ ހަތަރު ވަނަ ބުރުން ޓޯޓްނަމް ހޮޓްސްޕާ ޖާގަ ހޯދައިފިއެވެ.
މި މުބާރާތުގެ ހަތަރު ވަނަ ބުރުން ސްޕާސް ޖާގަހޯދީ ތިން ވަނަ ބުރުގައި ބާންލީ އާ ބައްދަލުކުރި މެޗު އެއް ލަނޑު ސުން ލަނޑުން ކާމިޔާބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕާސްއިންނެވެ. މި މެޗަށް ސްޕާސްއިން ޓީމު ނެރެފައިވަނީ އޭޝިއާ ކަޕާއި އެފްރިކަން ކަޕް އޮފް ނޭޝަންސްގައި ވާދަކުރުމަށްޓަކައި ގޮސްފައިވާ ޓީމްގެ މުހިންމު ދެ ކުޅުންތެރިންކަމަށްވާ ދެކުނު ކޮރެއާގެ ކެޕްޓަން ސޮން ހެއުން މިން އާއި ސެނެގާލްގެ ޕެޕޭ މަޓާ ސާ އާއި ނުލައެވެ.
މި ދެ ކުޅުންތެރިން ފިޔަވާ ސްޕާސްއިން ވަނީ ވަރުގަދަ ޓީމެއް ނެރެ އެފްއޭ ކަޕްގެ މުހިންމުކަން ސްޕާސްއަށް އޮތް ވަރު ހާމަކޮށްދީފައެވެ. ބާންލީއަށް ބަލާލާއިރު އެ ޓީމުން ވަނީ އެންމެ ފަހުން ޕްރިމިއާ ލީގުގައި ކުޅުނު ޓީމަށް ފަސް ބަދަލެއް ގެނެސްފައެވެ.
މި މެޗުގެ ފެށުން ރަނގަޅުވީ ބާންލީގެއެވެ. މިގޮތުން ފުރަތަމަ ހަތް މިނެޓްގެ ތެރޭގައި އެ ޓީމުން ވަނީ ސްޕާސްގެ ގޯލަށް ނުރައްކާތެރި ދެ ހަމަލާއެއް ފޮނުވާލާ ލަނޑެއް ޖެހުމާ ގާތަށް ގޮސްފައެވެ. ސްޕާސްއަށް ބަލާލާއިރު މި މެޗުގައި ސޮން ނެތްތައް ކުރީގައި ވަރަށް ބޮޑަށް ދެއްކިއެވެ. މި ގޮތުން ލަނޑު ޖެހުމަށް ލިބުނު ގިނަ ފުރުސަތުތަކެއް ބޭކާރުވިތަން ފެނިގެންދިޔައެވެ.
މި މެޗުގައި ސްޕާސްއިން ކާމިޔާބު ކުރި ހަމައެކަނި ލަނޑު މެޗުގެ 78 ވަނަ މިނެޓްގައި ކާމިޔާބުކޮށްދިނީ ޕެޑްރޯ ޕޯރޯއެވެ. މިއީ އޭނާ މި ސީޒަންގައި ސްޕާސްއަށް ކާމިޔާބު ކޮށްދިން ފުރަތަމަ ލަނޑެވެ. މި ކާމިޔާބީއާއެކު ސްޕާސްއިން މި މުބާރާތުގެ ހަތަރު ވަނަ ބުރުން ޖާގަހޯދާފައިވާއިރު ހަތަރު ވަނަ ބުރުގައި އެ ޓީމް ބައްދަލުކުރާ ޓީމެއް އެނގިގެންދާނީ މި އަންނަ ހޯމަ ދުވަހު ރޭ ނެގުމަށް ހަމަޖެހިފައިވާ ގުރުއަތުލުމަށްފަހުއެވެ.
މި މުބާރާތުން ކެޓުމާއެކު ބާންލީއަށް މިހާރު މި ވަނީ ޕްރިމިއާ ލީގުގައި ރެލިގޭޝަނުން މި ސީޒަންގައި ސަލާމާތްވުމަށްޓަކައި ކުރަން ޖެހޭ މަސައްކަތް ތަކަށް އިތުރަށް ފޯކަސް ކުރުމުގެ ފުރުސަތު ލިބިގެން ގޮސްފައެވެ.