06 Jan 2024, 09:46
ދެހާހުގެ އަހަރު ތަކުގައި ބޮލީވުޑްގެ ގިނަ ފިލްމު ތަކުން ފެނިފައިވާ އެކްޓަރު ތުޝާރު ކަޕޫރު ވެބް ސީރީސް އެއްގެ މަސައްކަތް ފެށުމަށް ތައްޔާރު ވެއްޖެއެވެ.
ފިލްމު "ގޯލްމާލް"ގެ ސީރީސް ތަކުން ގިނަ ބައެއްގެ މެދުގައި މަގުބޫލުކަން ހޯދި ތުޝާރަކީ ކުރީގެ މަޝްހޫރު އެކްޓަރު ޖީތެންދްރާގެ ހުރި ހަމައެކަނި ފިރިހެން ދަރިފުޅެވެ.
ގިނަ ފިލްމުތަކެއްގައި މަސައްކަތް ކުރުމަށް ފަހު ތުޝާރުގެ ފުރަތަމަ ވެބް ސީރީސް ރިލީޒްކޮށްފައި ވަނީ 2019ވަނަ އަހަރު ބާލާޖީ ޓެލެފިލްމްސް ގައެވެ.
ޖިއޯ ސިނަމާ އަދި ބާލާޖީ ޓެލެ ފިލްމްސްއާ ގުޅިގެން "ދަސް ޖޫން ކީ ރާތު"ގެ ނަމުގައި އުފައްދާ މި ވެބް ސިރީސްއިން ތުޝާރާއެކު ބަތަލާގެ ރޯލްއިން ފެންނާނީ ބޮލީވުޑްގެ ބަތަލާ ޕްރިޔަންކާ ޗާހަރު ޗޯދުރީއެވެ.
ފިލްމު ތަކުގެ އިތުރުން ބައެއް ވެބް ސީރީސްތައް ކުޅެފައިވާ ޕްރިޔަންކާ އަކީ ރިއަލިޓީ ޝޯވް 'ބިގް ބޮސް'ގެ ބައިވެރިވުމަށް ފަހު ބެލުންތެރިންގެ މެދުގައި ބޮޑު މަގުބޫލު ކަމެއް ހޯދި ބަތަލާއެކެވެ. ޕްރިޔަންކާއަށް ފިލްމުން ފުރުސަތު ލިބުނުކަން ބަތަލާ ވަނީ އަމިއްލަ އިންސްޓަގްރާމް މެދުވެރިކޮށް އާއްމުންނާ ހިއްސާކޮށްފައެވެ.
ތުޝާރު ކަޕޫރު ފިލްމު "ގޯލްމާލް"ގެ ތަރިންނާއެކު-- ފޮޓޯ/ ބޮލީވުޑް ހަންގާމާ
ފިލްމު "ކިޔާ ކޫލްހެ ހަމް"، "ކާކީ"،"ޖީނާ ސިރްފް މޭރޭ ލިޔޭ" އަދި "ޝޫޓް އައުޓް އެޓް ލޯކަންޑްވާލާ" ފަދަ ފިލްމު ތަކުން އާއްމުންގެ މަގުބޫލުކަން ލިބުނު ތުޝާރު ފަހުން ބޮޑަށް ފެނިފައި ވަނީ ކެމެރާގެ ފުރަގަހުން ޕްރޮޑިއުސަރެއްގެ ރޯލްއިންނެވެ.
ތުޝާރު ޕްރޮޑިއުސަރެއްގެ ގޮތުގައި މަސައްކަތް ކޮށްފައިވާ ފިލްމު ތަކުގެ ތެރޭ 2020ވަނަ އަހަރު ރިލީޒްވި ފިލްމު "ލަކްޝްމީ" އަދި 2022ވަނަ އަހަރު ރިލީޒްވި ފިލްމު "މާރިޗް" ހިމެނެއެވެ. ފިލްމު "ލަކްޝްމީ" އަކީ އެކްޓަރު އަކްޝޭ ކުމާރު އަދި ބަތަލާ ކިއާރާ އަދްވާނީ ލީޑް ރޯލް ކުޅެފައިވާ ފިލްމެކެވެ.