05 Jan 2024, 23:58
މާލޭ ސިޓީ ކައުންސިލްގައި ތިއްބަވާ ދެ ކައުންސިލަރަކު ސަރުކާރު ހިންގާ މައި ޕާޓީ، ޕީއެންސީއަށް މިރޭ ސޮއިކުރައްވައިފިއެެވެ.
މި ދެ ކައުންސިލަރުން ވެސް ޕީއެންސީއަށް ސޮއިކުރައްވައި، ރައީސް ޑރ. މުޙައްމަދު މުއިއްޒާ ފޯމު ހަވާލުކުރެއްވީ މާލޭގެ މޭޔަރުކަމަށް ވާދަކުރައްވާ އައިޝަތު އާޒިމާގެ މެނިފެސްޓޯ ލޯންޗުކުރުމަށް މިރޭ އޮތް ޖަލްސާގައެވެ.
އެގޮތުން ޕީއެންސީއަށް ސޮއިކުރެއްވީ، ހެންވޭރު އުތުރު ދާއިރާގެ އެމްޑީޕީ ކައުންސިލަރު، އައިޝަތު ނިޒްލީ ރަޝީދާއި، ގަލޮޅު މެދު ދާއިރާ ތަމްސީލްކުރައްވާ ޑިމޮކްރެޓް ކައުންސިލަރު މަރިޔަމް ރީހާން ނާޒިމެވެ.
އެއާއެކު މިހާރު ކައުންސިލްގެ މެޖޯރިޓީ އޮތީ، ވެރިކަން ކުރާ ޕީއެންސީ، ޕީޕީއެމަށެވެ.
ސަރުކާރުގެ މަގާމުތަކާ ހަވާލުވެ، ހުސްވެފައިވަނީ ތިން ގޮނޑިއެވެ. އެއީ ހެންވޭރު ދެކުނު ދާއިރާގެ ގޮނޑިއާއި، މެދު ހެންވޭރު ދާއިރާއާއި، މާފަންނު ދެކުނު ދާއިރާގެ ގޮނޑިއެވެ.
އަންނަ ހޮނިހިރު ދުވަހު މޭޔަރުގެ އިންތިޚާބާއެކު މި ތިން ކައުންސިލަރުކަމަށް ވެސް ބޭފުޅަކު ހޮވުން އޮންނާނެއެވެ.
މިރޭގެ ޖަލްސާގައި، ޑިމޮކްރެޓްސްއާއި އެމްޑީޕީގައި ކުރިން އުޅުނު އެހެން ބައެއް ޒުވާނުން ވެސް ވަނީ ޕީއެންސީއަށް ސޮއިކޮށްފައެވެ. ހަމައެއާއެކު މީގެ ކުރިން ރައްޔިތުންގެ މަޖިލީހުގެ 13 މެމްބަރުން ވެސް އެމްޑީޕީން ވަކިވެ، އެ ޕާޓީއާ ގުޅިފައިވެއެވެ.
އަލަށް ގިނަ މެމްބަރުން ގުޅެމުން އަންނައިރު މިހާރު އެ ޕާޓީގެ ދަފްތަރުގައި ތިބި މެމްބަރުންގެ އަދަދު 40،000 އިން މައްޗަށް އަރާނެކަމަށް ވެސް އެ ޕާޓީގެ ޗެއާޕާސަަަން އަބްދުއްރަހީމް އަބްދުﷲ މީގެ ކުރިން ވިދާޅުވެފައިވެއެވެ.