05 Jan 2024, 22:17
ސަރުކާރު ހިންގާ ޕާޓީގެ ކެންޑިޑޭޓަކު ހޮވައިގެން މާލެ ތަރައްގީކުރެެވެން އޮއްވައި، ސަރުކާރަށް ޖެއްސުން ކުރާނެ އިދިކޮޅު ޕާޓީއަކުން މާލޭ މޭޔަރުކަމަށް ކެންޑިޑޭޓަކު ހޮވައިފިނަމަ ހުރަސް އެޅޭނީ މާލޭގެ ތަރައްގީއަށް ކަމަށާއި އެއީ ކުރުން ބުއްދިވެރި ކަމެއް ނޫންކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެެވެ.
ސަރުކާރު ހިންގާ ޕީއެންސީގެ ފަރާތުން މާލޭ މޭޔަރުކަމަށް ވާދަކުރައްވާ އައިޝަތު އާޒިމާ ޝަކޫރުގެ މެނިފެސްޓޯ ލޯންޗުކުރުމަށް އޮތް ހަފްލާގައި ވާހަކަފުޅުދައްކަވަމުން އެ މަނިކުފާނު ވިދާޅުވީ، 2021ވަނަ އަހަރު އޮތް ލޯކަލް ކައުންސިލް އިންތިޚާބުގައި މާލޭގެ ރައްޔިތުން އެ މަނިކުފާނު މޭޔަރުކަމަށް އިންތިޚާބު ކުރެއްވީ އިތުބާރާއެކު ކަމަށެވެ.
އަދި ކައުންސިލްގެ ގިނަ ގޮނޑިތަކެއް ޕީޕީއެމް ޕީއެންސީއަށް ދެއްވުމާއެކު ވަރަށް ބުރަކޮށް ގިނަ މަސައްކަތްތަކެއް ކުރެއްވި ކަމަށެވެ.
އެގޮތުން މިދިޔަ އަހަރު އޮތް ރިޔާސީ އިންތިޚާބާ ހަމައަށް އޮތް ދެ އަހަރާއި ބައިގެ ތެރޭގައި، ސިޓީ ކައުންސިލުން އެކުލަވައިލި ޕްލޭނާ އެއްގޮތަށް، ކައުންސިލަށް އަމިއްލައަަށް ކުރެވެން ހުރި ހުރިހާ ކަމެއް ކުރެވިފައިވާކަމަށެވެ.
ނަމަވެސް އެއިރު ބޮޑެތި ބައެއް ކަންކަން ނުކުރެވި ހުރީ، މާލޭގެ ކައުންސިލްގެ ފިކުރާ ތަފާތު ސަރުކާރެއް އޮވެ، ކައުންސިލަށް ޖެއްސުންކުރުމުގެ ކަންކަން ކުރަމުން އައުމުން ކަމަށެވެ.
އެހެންވެ، ސަރުކާރުން މަގުފަހިކޮށްދެއްވުމުން ނޫނީ، ނުކުރެވޭނެ ކަންކަން ނޫން އެހެން ހުރިހާ ކަމެއް އެ މަނިކުފާނު މާލޭގެ މޭޔަރުކަމުގައި ހުންނަވައިގެން ކުރެއްވިކަމަށް ވިދާޅުވިއެވެ.
"ސަރުކާރުން ކޮންމެވެސް ކަހަލަ މަގެއް ކޮއްޓަވައިދެއްވީމާ ނުވަތަ ކޮންމެވެސް ކަހަލަ މަގެއް ފަހިކޮށްދެއްވީމާ ވާން ހުރި ކަންކަން ފިޔަވައި ދެން އަޅުގަނޑުމެން ކުރަން ނިންމި ހުރިހާ ކަމެއް ކުރެވުނު،" ރައީސް ވިދާޅުވިއެވެ.
ރައީސް ވިދާޅުވީ މިއަދު މުޅި ރާއްޖޭގެ ރައްޔިތުން އެ މަނިކުފާނަށް އިތުބާރުކުރަައްވައި، ވެރިކަން ހަވާލުކޮށް، ރާއްޖެ ތަރައްގީކުރުމަށް ކަމަށެވެ.
އެއާއެކު ވެރިރަށް މާލޭގެ ތަރައްގީއަށް ކުރައްވާ ކަންކަން ވެސް ކުރައްވާނީ މާލޭ ސިޓީ ކައުންސިލްގެ ތެރެއިން ކަމަށާއި، އިސްކުރައްވާނީ ލާމަރުކަޒީ ނިޒާމު ކަމަށް ވިދާޅުވިއެވެ.
ނަމަވެސް، އެ މިސްރާބުން މަސައްކަތްކުރައްވާއިރު، ސަރުކާރަށް ޖެއްސުންކޮށް، ޕާޓީން އެދޭގޮތަށް ސަރުކާރަށް އުނދަގޫކުރާ ކެންޑިޑޭޓަކާއެކު ހޮވައިގެން ލިބޭނެ ކުރިއެރުންތައް އަނެއްކާ ވެސް މަޑުޖެހުމުގެ ފުރުސަަތު އޮންނާނެކަމަށް ރައީސް ވިދާޅުވިއެވެ.
"ސަރުކާރަށް ޖެއްސުންކުރަން ނޫނިއްޔާ ސަރުކާރާ އެކީގައި މަސައްކަތްކުރުމުގެ ވިސްނުން ނެތް ޕާޓީއަކުން މީހަކު ހޮވައިފިޔާ ކިހިނެއްތޯ ވާނީ. އަނެއްކާ މާލޭގެ ރައްޔިތުން ތަކުރާރު ކުރަންޖެހޭނީ ކަންކަން ނުވެދާ ދުވަސްތައް. އަޅުގަނޑު ބޭނުންވަނީ ލާމަރުކަޒީ ނިޒާމުގެ ތެރެއިން ކަންކަން ކުރަން،" ރައީސް ވިދާޅުވިއެވެ.
އެހެންކަމުން ވެރިކަން ކުރާ ޕާޓީން ކެންޑިޑޭޓަކު ހޮވައިގެން، ތަރައްގީ ގެނައުމަށް ފުރުސަތު އޮއްވައި އެ މަގު އިސްކުރުމަށް ރައީސް ވަނީ މާލޭގެ ރައްޔިތުންނަށް އިލްތިމާސްކުރައްވައިފައެވެ.
އަދި ސަރުކާރުން މަސައްކަތްކުރާނީ ރައްޔިތުންނަށް ޓަކައި އިޚްލާސްތެރިކަމާއެކީ ކަމަށް ވެސް ވިދާޅުވިއެވެ.