05 Jan 2024, 21:51
މާލޭގައި ދިރިއުޅޭ އަންހެނުންނަށް ޚާއްސަކޮށްގެން 1،500 ވަޒީފާ އުފެއްދުމުގެ ވައުދާއެކު މާލޭގެ މޭޔަރުކަމަށް ސަރުކާރު ހިންގާ ޕާޓީ ޕީއެންސީގެ ކެންޑިޑޭޓް އައިޝަތު އާޒިމާ ޝަކޫރުގެ މެނިފެސްޓޯ މިރޭ އިފްތިތާހުކޮށްފިއެވެ.
މެނިފެސްޓޯ އެކުލަވައިލައިފައިވަނީ މިހާރު، ކައުންސިލުގައި އެކުލަވައިލައިފައި އޮތް ސްޓްރެޓެޖިކް އެކްޝަން ޕްލޭނާއި، ޕީޕިއެމް ޕީއެންސީގެ ރިޔާސީ މެނިފެސްޓޯއާ އެއްގޮތްވާ ގޮތަށެވެ.
މެނިފެސްޓޯ ހުށަހަޅުއްވަމުން އާޒިމާ ވިދާޅުވީ، އަންހެނުންނަށް، ޚާއްސަކޮށް މާލީ ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގަވައި، އެކި މަސައްކަތްތަކަށް އަންހެނުންނަށް ވަސީލަތްތައް ގާއިމްކޮށްދެއްވާނެ ކަމަށެވެ.
އާޒިމާ ވިދާޅުވީ އޭނާގެ ތަސައްވުރަކީ މާލެއަކީ ހުރިހާ ރައްޔިތުންނަށް ވެސް ދިރިއުޅެވޭ އަމާން ތަނަކަށް ހެދުން ކަމަށެވެ.
"އަޅުގަނޑުމެންގެ ކޮންސެޕްޓަކީ ޑައިވާސިޓީ. އަޅުގަނޑުމެންގެ ކޮންސެޕްޓަކީ ތަފާތުތަކާއެކުގައި ވެސް މާލޭގައި އެންމެންނަށް ދިރިއުޅެވެންވާނޭ،" އާޒިމާ ވިދާޅުވިއެވެ.
މި މެނިފެސްޓޯގައި ހުރި މުހިންމު ބައެއް ކަންކަމުގެ ތެރޭގައި މާލެ އެންމެނަށް "ހުޅުވައިލުން" ހިމެނެއެވެ.
އާޒިމާގެ މެނިފެސްޓޯގައި ހުރި މައިގަނޑު ކަންކަން
ހިތްހަމަޖެހިގެން ހިނިތުންވުމާއެކު
- ގުޅިގެން އެކުގައި ތަރައްގީކުރުމުގައި ބައިވެރިވުން
- ގްރޭޓާ މާލޭގެ ކަނޑުފަޅު ފަރުގެ ފުރިހަމަ ނަފާއަށް
- ފަޚުރުވެރި އަންހެނުން
- އިލްމާއި ހުނަރުގެ ވެށި
- 21ވަނަ ޤަރުނަށް ފައްކާ ކުރެވިފައި
- ދިވެހިންގެ އިޤްތިޞާދުގެ ވިންދު
- ހަމަޖެހިގެން ދިރިއުޅެވޭނެ މާހައުލެއް
މި ކަންކަމުގެ ތެރެއިން، ޒުވާނުންނާއި، ފްރީލާންސަރުންނަށް ބޭނުންވާ ވަސީލަތްތައް ގާއިމްކުރުމާއި، ކުޅިވަރު ކުޅޭނެ ތަންތަން ގާއިމްކުރުން ހިމެނެއެވެ. އަދި ސިވިލް ޑިފެންސްގެ އެކި ކަންކަން ތައާރަފްކުރުން ހިމެނެއެވެ.
ހަމައެއާއެކު މާލޭގައި ފެހިކަން އިތުރުކުރުމަށް ރާއްޖޭގައި ހެދޭ ހުރިހާ މާމެލާމެލީގެ ބަގީޗާއެއް ހެދުން ވެސް އާޒިމާގެ މެނިފެސްޓޯގައި ހިމެނެއެވެ.
އަދި އިސްރަށްވެެހިންނަށް ޚާއްސަ މަރުކަޒުތަކާއި، ޚާއްސަ އެހީއަށް ބޭނުންވާ މީހުންނަށް ކަންކަން ފަހިކޮށްދިނުމަށް ޚާއްސަަ ސަމާލުކަމެއް ދިނުން ހިމެނެއެވެ.
މީގެ އިތުރުން އާޒިމާ ވިދާޅުވީ މާލޭގައި ބޮއްސުންލައިފައި އޮތް ބުޅަލުގެ މައްސަލަ ހައްލުކޮށްދެއްވުމަށް ޓަކައި ވެެސް މަސައްކަތްކޮށްދެއްވާނެ ކަމަށެވެ.
އޭނާ ވިދާޅުވީ ސަރުކާރުގެ ކެންޑިޑޭޓަކު މާލޭ މޭޔަރުކަމަށް ހޮވަންވީ، ސަރުކާރާ ގުޅިގެން ޚިދުމަތް ކުރުމަށް ކަމަށެވެ.
އަދި އޭނާއަށް މަގު ދައްކަވަން ހުންނެވީ ރައީސް ޑރ. މުޙައްމަދު މުއިއްޒު ކަމަށާއި، އެ މަނިކުފާނަކީ މާލޭ މޭޔަރުކަމުގައި ހުންނަވައި ގިނަ ކާމިޔާބުތަކެއް ހާސިލްކުރެއްވުމަށްފަހު ރާއްޖޭގެ ވެރިކަމާ ހަވާލުވެވަޑައިގެން ހުންނެވި ބޭފުޅެއްކަމަށް ވެސް އާޒިމާ ވިދާޅުވިއެވެ.