05 Jan 2024, 18:37
އެންބީއޭ ބާސްކެޓް ބޯޅަ މުބާރާތުގައި އެންމެ ފަހުގެ ޗެމްޕިއަން ޑެންވާ ނަގެޓްސް އާއި ގޯލްޑަން ސްޓޭޓް ވޮރިއާސް ބައްދަލުކޮށް، ނަގެޓްސްއިން މެޗު ކާމިޔާބު ކޮށްފިއެވެ.
ސެން ފްރަންސިސްކޯގެ ޗޭސް ސެންޓާގައި ކުޅުނު މި މެޗު ނަގެޓްސްއިން ކަމިޔާބުކޮށްފައިވަނީ 130 ޕޮއިންޓުންނެވެ. މި މެޗު ނަގެޓްސް އިން ކާމިޔާބު ކޮށްފައިވަނީ އެންމެ ފަހު ސިކުންތު ކޮޅުގެ ތެރޭގައި ނިކޮލާ ޔޮކިޗް ކާމިޔާބު ކުރި ތްރީ ޕޮއިންޓާ އަކާއެކުއެވެ.
ވަރަށް ވާދަވެރި ކުޅުމެއް ފެނުނު މި މެޗުގެ ފުރަތަަމަ ދެ ކުއާޓާގައި ނަގެޓްސްއިން މޮޅަށް ކުޅުނު ނަމަވެސް ތިންވަނަ ކުއާޓާގައި ވޮރިއާސް އިން ވަނީ މޮޅު ކުޅުމެއް ދައްކައި ލީޑު ނަގައިފައެވެ.
މި މެޗުގެ ހަތަރު ވަނަ ކުއާޓާވީ ނަގެޓްސްއިން އަނެއްކާ ވެސް ފަހަތުން އަރައި ވޮރިއާސްއާ ޕޮއިންޓްގެ ގޮތުން އަރައި ހަމަހަމަ ކުރި ކުއާޓަރަކަށެވެ. މިގޮތުން މެޗު ނިމެން ތިން ސިކުންތައްވީއިރު ދެ ޓީމު އޮތީ 127 ޕޮއިންޓުން އެއްވަރު ވެފައެވެ.
އެހެން ކަމުން ނަގެޓްސްގެ ކޯޗް މައިކަލް މެލޯން ކުޅުން ރޭވީ އެ ވަގުތުކޮޅުގެ ތެރޭގައި ޕޮއިންޓެއް އަޅައި މެޗު ކާމިޔާބު ކުރެވޭތޯއެވެ. ނަމަވެސް މިކަމަށް ބެލިއިރު ފުރަތަމަ ޗޮއިސްކަމުގައިވި ޖަމާލް މަރީ އާއި ދެވަނަ ޗޮއިސް ކެންޓަވިއަސް ކޯލްޑްވެލް ޕޯޕް ވެސް ހުސްކޮށް ނެތުމާއެކު ޖެހުނީ ޔޮކިޗްއަށް ބޯޅަ ދޭށެވެ.
ނަމަވެސް ގިނަ ބަޔަކު ހީކުރި ގޮތާއި ހިލާފަށް ޔޮކިޗް ނިންމީ 40 ފޫޓު ދުރުން ވޮރިއާސްގެ ކެވޮން ލޫނީ ބޯމަތިން ޕޮޓަށް ޝޫޓް ކުރާށެވެ. މިޕޮޓާއެކު މި މެޗު ނަގެޓްސް ކާމިޔާބު ކުރިއެވެ.
މި މެޗުގައި ޔޮކިޗްވަނީ 34 ޕޮއިންޓް ހޯދައިދީ ނުވަ ރީބައުންޑް ނަގައިދީ 10 އެސިސްޓްކޮށްފައެވެ.
މި މެޗުގައި ވޮރިއާސްއަށް އެންމެ ރަނގަޅު ކުޅުމެއް ދެއްކީ 30 ޕޮއިންޓް ހޯދައިދީ ހަތަރު ރީބައުންޑް ނަގައިދީ ހަ އެސިސްޓް ކޮށްދިން ސްޓެފަން ކަރީއެވެ.