06 Jan 2024, 12:06
ކޮޕާ އިޓާލިއާ ފުޓްބޯޅަ މުބާރާތުގެ ކުއާޓާ ފައިނަލުން ޔުވެންޓަސް ޖާގަ ހޯދައިފިއެވެ.
މި މުބާރާތުގެ ކުއާޓާ ފައިނަލުން ޔޫވޭ ޖާގަ ހޯދާފައިވަނީ ރައުންޑް އޮފް ސިކްސް ޓީންގައި ސެރީއާގެ ތާވަލްގެ އެންމެ ފުލުގައި އުޅޭ ސަލެރްނިޓާނާ އާ ބައްދަލުކޮށް ފަހަތުން އަރާ ހަ ލަނޑު އެއް ލަނޑުން މެޗު ކާމިޔާބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔޫވޭއެވެ. ނަމަވެސް މި މެޗުގެ ފެށުން ރަނގަޅުވީ ސަލެރްނިޓާނާގެއެވެ. މި ގޮތުން މެޗުގެ ފުރަތަމަ މިނެޓްގައި ސަލެރްނިޓާނާއިން ވަނީ ލަނޑެއް ޖަހާ ޔޫވޭއަށް ސިހުން ގެނުވާފައެވެ.
މި ލަނޑު އެ ޓީމަށް ޖަހައިދިނީ ޗުކްޗުއުކެމް އިކްވުއޭމެސީއެވެ. ނަމަވެސް ސަލެރްނިޓާނާއަށް މި ލީޑު ދެމެހެއްޓޭވަރުވީ 11 މިނެޓް ވަންދެނެވެ. މި ގޮތުން ޔޫވޭއިން ވަނީ މެޗްގެ 12 ވަނަ މިނެޓްގައި ފަބިއޯ މިރޭޓީ ޖަހާދިން ލަނޑުން މެޗްގެ ނަތީޖާ ހަމަހަމަ ކޮށްފައެވެ.
އަދި މެޗުގެ 34 ވަނަ މިނެޓްގައި އަންޑްރިއާ ކެމްބިއާސޯ ޖަހާދިން ލަނޑުން ޔޫވޭއިން މި މެޗްގެ ލީޑު ނެގިއެވެ. ޔޫވޭގެ ތިން ވަނަ ލަނޑު މެޗްގެ 54 ވަނަ މިނެޓްގައި ޖަހައިދީ އެ ޓީމްގެ ލީޑު ފުޅާކޮށްދިނީ ޑެނިއެލް ރިގާނީއެވެ.
މި މެޗުގައި ޔޫވޭއިން ކާމިޔާބު ކުރި ހަތަރު ވަނަ ލަނޑަކީ ސަލެރްނިޓާނާގެ ޑިލަން ބްރޮން އަތުން ބައިކޮޅަށް ވަން ލަނޑެކެވެ. ޔޫވޭއިން މިމެޗުގައި ކާމިޔާބުކުރި ފަހު ދެ ލަނޑު މެޗްގެ 88 ވަނަ މިނެޓާއި އިތުރު ވަގުތުގެ ފުރަތަމަ މިނެޓްގައި ޖަހައިދިނީ ކެނާން ޔިލްޑީޒް އަދި ޓިމޮތީ ވެއާއެވެ.
މި ކާމިޔާބީއާއެކު ޔޫވޭއަށް މިމުބާރާތުގެ ކުއާޓާ ފައިނަލްގެ ޖާގައެއް ކަށަވަރު ވެފައިވާއިރު ކުއާޓާ ފައިނަލްގައި ބައްދަލުކުރުމަށް ހަމަޖެހިފައިވަނީ ނަޕޯލީގެ މައްޗަށް ކުރި ހޯދި ފްރޮސިނޯން އާއެވެ. ކުއާޓާ ފައިނަލްގެ އެހެން މެޗްގައި ވާދަކުރުމަށް ހަމަޖެހިފައިވަނީ ފިއޮރެންޓީނާ އާއި ބޮލޯނިއާ، ލާޒިއޯ އާއި އޭއެސް ރޯމާ އަދި އޭސީ މިލާން އާއި އެޓަލާންޓާއެވެ.