06 Jan 2024, 17:33
ދުނިޔޭގެ އެންމެ ގިނަ ބަޔަކު ނެޓަށް ވަންނަން ބޭނުން ކުރަމުން އަންނަ ގޫގުލްއިން އެ ކުންފުނީގެ ކްރޯމް ވެބް ބްރައުޒާގައި ތާޑް ޕާޓީ ކުކީޒް ލިމިޓް ކުރަން ފަށައިފިއެވެ.
ތާޑް ޕާޓީ ކުކީސްއަކީ އެމީހަކު ޒިޔާރަތްކުރާ ވެބްސައިޓް ނޫން އެހެން ވެބްސައިޓަކުން އެމީހެއްގެ ޑިވައިސްގައި ހުންނަ ކޫކީސްއެވެ. އެފަދަ ކުކީސް ޖެނެރޭޓު ވަނީ، އެ މީހަކު ޒިޔާރަތް ކުރާ ވެބްސައިޓެއްގައި އެހެން ވެބްސައިޓެއްގެ އިޝްތިހާރާއި ފޮޓޯ ފަދަ އެއްޗެއް ހުރުމުންނެވެ.
ކޮންމެ ވެބްސައިޓަކުން ކުކީސް ޖެނެރޭޓުވުމުން، އެ މީހަކު އާންމުކޮށް ޒިޔާރަތްކުރާ ސައިޓުތަކާއި ޚިޔާރު ކުރާ މައުލޫމާތު ދެނެގަނެވި، އެ މީހަކަށް ކަމުދާނެހެން ހީވާ ތަކެތީގެ 'ޕާސަނަލައިޒްޑް' އިޝްތިހާރު ދެއްކުމަށް ކުންފުނިތަކަށް މައުލޫމާތު ލިބެއެވެ.
މިދިޔަ ބުރާސްފަތި ދުވަހު ގޫގުލްއިން ވަނީ ކްރޯމްގެ ގްލޯބަލް ޔޫޒާ ބޭސްގެ އެއް ޕަސެންޓަށް ތާޑް ޕާޓީ ކުކީޒް ޑިސެބަލްކޮށް، އިޝްތިހާރު ޕާސަނަލައިޒޭޝަން އަދި އެނަލިޓިކްސްއަށް ކުކީޒް ބޭނުންކުރާ ބޭރުގެ ސައިޓްތައް ލިމިޓްކުރާ "ޓްރެކިން ޕްރޮޓެކްޝަން" އާ ބެހޭ ގޮތުން އޮން-ސްކްރީން މެސެޖުތަކުން ޔޫޒަރުންނަށް ދައްކައިފައެވެ.
މިއީ ކްރޯމް ބޭނުންކުރާ ހުރިހާ ފަރާތްތަކުގެ މެދުގައި މި އަހަރުގެ މެދުތެރޭގައި، ތާޑް ޕާޓީ ކުކީ ސަޕޯޓް މުޅިން ނައްތާލުމަށް ގޫގުލްއިން ކަނޑައަޅާފައިވާ އަމާޒަށް ވާސިލުވުމަށް އެޅި ފިޔަވަޅެކެވެ.
ދެހާސް ނަވާރަ ވަނަ އަހަރު އެންމެ ފުރަތަމަ އިފްތިތާހުކުރި ޕްރައިވެސީ ސޭންޑްބޮކްސްގެ އަމާޒަކީ ވިޔަފާރިތަކަށް ގެއްލުން ނުވާނެ ގޮތަކަށް މީހުންގެ ޒާތީ މައުލޫމާތު ރައްކާތެރިކުރެވޭނެ ގޮތްތައް އިތުރަށް ފަހިކޮށްދިނުމެވެ.
ނަމަވެސް މިކަމުގެ ސަބަބުން އޮންލައިން އިޝްތިހާރުތަކުގައި ގޫގުލްގެ ބާރު އިތުރަށް ދަށަށް ދިއުމުގެ ފުރުސަތު އޮތުމުން ރެގިއުލޭޓަރީ އިދާރާތަކުން ވަނީ އެ ހުށަހެޅުން ދިރާސާކޮށްފައެވެ. އިޝްތިހާރުން އާމްދަނީ ހޯދުމަށް ގިނަ ޕަބްލިޝަރުން ވަރަށް ބޮޑަށް ބަރޯސާވަނީ ކުކީ ޓްރެކިންއަށެވެ.
އެއް ޕަސެންޓް މީހުންނަށް ފުރަތަމަ ކުރިއަށްގެންދާ ޓެސްޓަށް ފަހު، ގޫގުލް ބޭނުން ކުރާ އެންމެންނަށް ވެސް ތާޑް ޕާޓީ ކުކީސް ބްލޮކް ކުރުމުގެ ކުރިން ރަނގަޅު ކުރެވެން ހުރި ކަންތައްތައް އެ ކުންފުންޏަށް ދެނެގަނެވޭނެއެވެ. ނަމަވެސް އެ ފިޔަވަޅު ފުޅާ ކުރާނެ ގޮތުގެ ތާރީޚެއް ގޫގުލްއިން މިހާތަނަށް ހާމަކޮށްފައެއް ނުވެއެވެ.
އެހެން ނަމަވެސް، ތާޑް ޕާޓީ ކުކީސް ބޭނުން ނުކުރެވޭ ގޮތް ހަދަން މިހާރު ފަށައި، ގޫގުލް އާއި އިޝްތިހާރުކުރާ ފަރާތްތަކާއި އެހެނިހެން ޓެކްނޮލޮޖީގެ ބޮޑެތި ކުންފުނިތަކުން މީހުންގެ މައުލޫމާތު ބޭނުންކުރާނެ ގޮތްތަކަށް ބަދަލުތަކެއް ގެންނަން އެ ކުންފުނިން ވަނީ ފަށައިފިއެވެ.
މިއީ ޑިޖިޓަލް އިޝްތިހާރު މާހައުލާއި ވެބް ބްރައުޒިން ތަޖުރިބާއަށް މިހާތަނަށް އަންނަ އެންމެ ބޮޑު، ކުއްލި ބަދަލަށް ވާނެއެވެ.