05 Jan 2024, 14:36
އީރާނުގެ އިރުދެކުނުގައިވާ ކަރްމާންގައި ދެ ބޮން ގޮއްވައިލައިގެން ބުދަ ދުވަހު ދިން ހަމަލާ އދ އިން ކުށްވެރިކޮށްފިއެވެ.
އެ ހަމަލާގައި އާންމުންގެ 100 އަށްވުރެ ގިނަ މީހުން ވަނީ މަރުވެފައެވެ.
ބޮމުގެ ހަމަލާތައް އަމާޒުކޮށްފައިވަނީ އަވަހާރަ ކޮށްލާފައިވާ އީރާނުގެ އިސްލާމީ ރިވޮލިޔުޝަނަރީ ގާޑުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރީގައެވެ. ބޮންތައް ގޮއްވައިލާފައި ވަނީ ސުލައިމާނީގެ މަރަށް ހަތަރު އަހަރު ފުރުން ފާހަގަ ކުރުމަށް އޭނާއަށް އިހުތިރާމު އަދާ ކުރުމުގެ ގޮތުން ގިނަ އަދަދެއްގެ ބަޔަކު މަޤުބަރާ ކައިރިއަށް ޖަމާވެފައިވާ ވަގުތެއްގައެވެ.
ސުލައިމާނީ އަވަހާރަ ކޮށްލާފައި ވަނީ 2020 ވަނަ އަހަރު އެމެރިކާއިން އިރާގުގައި ދިން ޑްރޯން ހަމަލާއެއްގައެވެ.
"ސަލާމަތީ މަޖިލީހުން ކަރްމާން ސިޓީގައި ދިން ބިރުވެރި ޓެރަރިސްޓް ހަމަލާ އެންމެ ހަރުކަށި އިބާރާތުން ކުށްވެރިކުރަން،" އދ.ގެ ސަލާމަތީ މަޖިލީހުގެ މެންބަރުން ނެރުނު ބަޔާނެއްގައި ބުނެފައިވެއެވެ.
ޓެރަރިޒަމަކީ ހުރިހާ ގޮތަކުން ވެސް ބައިނަލްއަގުވާމީ ސުލްހައާއި ސަލާމަތަށް އޮތް އެންމެ ބޮޑު އެއް ނުރައްކާ ކަމަށް ސަލާމަތީ މަޖިލީހުގެ ބަޔާނުގައިވެއެވެ. ސަލަމާތީ މަޖިލީހުގެ މެންބަރުންގެ ފަރާތުން ހަމަލާގައި މަރުވި މީހުންގެ އާއިލާތަކަށް ހަމްދަރްދީއާ ތައުޒިޔާ ވެސް ފޮނުވައިފައިވެއެވެ.
އޭގެ އިތުރުން ޓެރަރިޒަމްގެ އެ ހަމަލާގައި ބައިވެރިވި އެންމެން ޖަވާބުދާރީ ކުރުވުމަށް ގައުމުތަކުން އީރާނަށް އެއްބާރުލުން ދިނުމަށް ވެސް އެ ބަޔާނުގައި ގޮވައިލައިފައިވެއެވެ.
އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލާއި ފަލަސްތީނުގެ ޣައްޒާގެ ވެރިކަންކުރާ ހަމާސް ޖަމާއަތާ ދެމެދު ހަނގުރާމަ ފެށިފަހުން މެދުއިރުމަތީގެ ހަމަޖެހުމަށް ވަނީ ލޮޅުން އަރައިފައެވެ.