05 Jan 2024, 07:19
ބޮލީވުޑްގެ އުއްމީދީ ބަތަލާ ޖާންވީ ކަޕޫރުގެ އާއިލާގެ މެންބަރުންގެ ތެރެއިން އެންމެ ހިތްވަރު ގަދައީ އާއިލާގެ އެންމެ ހަގު ޚުޝީ ކަޕޫރު ކަމަށް ޖާންވީ ބުނެފިއެވެ.
ޖާންވީއާއި ޚުޝީ ކަޕޫރު އެކީގައި ފުރަތަމަ ފަހަރަށް ބައިވެރިވި ކަރަން ޖޯހަރުގެ ޓޯކް ޝޯގައި ދެބެއިން ވަނީ އަމިއްލަ ދިރިއުޅުމުގެ ގިނަ ވާހަކަތަކެއް ބެލުންތެރިންނާ ހިއްސާކޮށްފައެވެ.
ދާދި ފަހުން ފިލުމީ ދާއިރާއަށް ނުކުތް ޚުޝީ ކަޕޫރާ އެކު ޖާންވީ ބައިވެރިވި "ކޮފީ ވިތު ކަރަން"ގެ ޝޯގައި ދެ މީހުން ވެސް ވަނީ ދިރިއުޅުމުގައި ކުރިމަތިވި އެންމެ ހިތްދަތި ދުވަސް ކަމަށްވާ މަންމަ ސްރީދޭވީގެ ވަކިވުމާ ގުޅޭގޮތުން ވާހަކަ ދައްކާފައެވެ.
ދުބާއީގައި އޮތް ބޮނީ ކަޕޫރުގެ އާއިލީ ކައިވެންޏަކަށް ސްރީދޭވީގެ ދެމަފިރިން ދިޔައީ ނުހަނު ހިތްހަމަޖެހިގެން ކަމަށާއި މަންމަގެ މަރުގެ ޚަބަރު ލިބުނު ފޯން ކޯލް ޖާންވީއަށް ލިބުނީ އާދައިގެ މަތިން އަމިއްލަ ކޮޓަރީގައި އޮއްވާ ކަމަށް ބަތަލާ ވަނީ ބުނެފައެވެ. އެ ވަގުތު އަވަހަށް ދުއްވައި ގަނެވުނީ ކޮއްކޮ ޚުޝީގެ ކޮޓަރިއާ ދިމާލަށް ކަމަށާއި އޭރު ޚުޝީ ބާރަށް ރޯ އަޑު ޖާންވީއަށް އިވޭ ކަމަށް ބަތަލާ ވަނީ ބުނެފައެވެ. ނަމަވެސް ޖާންވީ ފެނުމާ އެކު ޚުޝީގެ ރުއިމުގެ އަޑު ކެނޑުނު ކަމަށާއި ޚުޝީ މަސައްކަތް ކުރީ ޖާންވީ ހަމައަކަށް އެޅުވޭތޯ ކަމަށް ބަތަލާ ވަނީ ބުނެފައެވެ.
އޭގެ ފަހުން މިއަދާ ހަމައަށް ވެސް ޚުޝީ އެއްވެސް ކަމެއް ދިމާވެގެން ރުއި ތަނެއް ޖާންވީ ނުދެކޭ ކަމަށް 26 އަހަރުގެ ބަތަލާ ވަނީ ބުނެފައެވެ.
ބަތަލާ ޖާންވީ ކަޕޫރު އަދި ކޮއްކޮ ހުޝީ ކަޕޫރު-- ފޮޓޯ/ އިންޓަނެޓް
ފިލްމު "ދަ އާޗީސް"ގެ ބަތަލާ ޚުޝީ ބުނީ މަންމަގެ ވަކިވުމާ އެކު އާއިލާއަށް ވަރަށް ބޮޑު އެކަނިވެރިކަމާ ކުރިމަތިވި ކަމަށާއި ހާއްސަކޮށް ބައްޕަ ބޮނީ ކަޕޫރުގެ ދިރިއުޅުމަށް ވަރަށް ބޮޑު ފަޅުކަމެއް އައި ކަމަށެވެ.
އެހެންވެ، ޚުޝީއަށް ވިސްނުނު ގޮތުގައި ކޮންމެ ވެސް އެއް މެންބަރަކު ހިތްވަރާ އެކު އާއިލާގެ އެހެން މެންބަރުންނަށް އަޅައިލާ ލޯބި ދޭން ހުންނަންޖެހޭ ކަމަށް ގަބޫލު ކުރެވުނު ކަމަށް ޚުޝީ ވަނީ މި ޝޯވްގައި ބުނެފައެވެ. ސްރީދޭވީއާއި ބޮނީ ކަޕޫރުގެ ދޮށީ ދަރިފުޅު ޖާންވީ މި ޝޯވްގައި ބުނެފައިވަނީ މަންމައާ އެންމެ އެއްގޮތް ކަންތަކެއް ހުންނަނީ ޚުޝީގެ ކަމަށް ގަބޫލު ކުރެވޭ ކަމަށެވެ.
ޚުޝީ ކަޕޫރަކީ ވަރަށް މަޑުމައިތިރި މިޒާޖެއްގެ މީހެއް ކަމަށާއި އެއީ މަންމަ ސްރީދޭވީގެ ވެސް އެންމެ ފާހަގަކޮށްލެވޭ ސިފަ ކަމަށް ޖާންވީ ވަނީ ބުނެފައެވެ. އިންޑިއާގެ ސިނަމާއަށް ދިގު މުއްދަތެއް ވަންދެން ޚިދުމަތް ކުރި ކުރީގެ ބަތަލާ މަރުވެފައި ވަނީ 2018ވަނަ އަހަރު ދުބާއީގައެވެ.