05 Jan 2024, 07:09
މިދިޔަ ޑިސެމްބަރު މަހުގެ 26ވަނަ ދުވަހު ނެޓްފްލިކްސްގައި ރިލީޒްކުރި ޒުވާނުންނާ ގުޅޭ ފިލްމު "ކޯ ގަޔޭ ހަމް ކަހާ" ނެޓްފްލިކްސްއިން ބެލި މީހުންގެ އަދަދު 6.3 މިލިއަނަށް އަރައިފި ކަމަށް ރިޕޯޓުތަކުން ބުނެފިއެވެ.
މި ފިލްމު ރިލީޒް ކުރިތާ ހަފުތާއެއްގެ ތެރޭ މިހާ ބޮޑު އަދަދެއްގެ ވިއުސް ލިބިފައިވާއިރު ފިލްމުގައި ލީޑު ރޯލު ކުޅުނު ތިން ތަރިންގެ ހުށަހެޅުމަށް ވެސް ފިލްމު އިންޑަސްޓްރީގެ ގިނަ ބަޔަކު ވަނީ ތައުރީފު ކޮށްފައެވެ.
ބެލުންތެރިންގެ ގިނަ ބަޔަކަށް ފިލްމު ކަމުދިޔައިރު ނެޓްފްލިކްސްގެ މި ފިލްމު ވަނީ އިނގިރޭސި ބަސް ނޫން އެހެން ބަހަކުން ނެޓްފްލިކްސްގައި ރިލީޒްކުރާ ފިލްމު ކެޓަގަރީގެ އެންމެ ގަދަ ދިހަ ފިލްމުގެތެރޭ ވެސް ހިމެނިފައެވެ. އަލަށް ފިލްމު އުފެއްދުމުގެ މައިދާނަށް ނުކުތް އަރުޖުން ވަރައިން ސިންގްގެ މި ފިލްމަކީ ކާމިޔާބު ފިލްމުތައް އުފައްދާފައިވާ ފަރުޚާން އަޚްތަރާއި ޒޯޔާ އަޙްތަރުގެ އަމިއްލަ ފިލްމު ކުންފުނިން ގެނެސްދިން އުފެއްދުމެކެވެ.
ޑައިރެކްޓަރު އަރުޖުން ބުނެފައިވަނީ ފިލްމު "ކޯ ގަޔޭ ހަމް ކަހާ"އަކީ ވަރަށް ކުރީއްސުރެ އޭނާ ދެކެމުން އައި ހުވަފެނެއް ކަމަށެވެ. ވަރަށް ގާތް ތިން ރަޙުމަތްތެރިންގެ ދިރިއުޅުމުގެ ވާހަކަ މި ޒަމާނުގެ ދިރިއުޅުމުގެ ވައްޓަފާޅިއަށް ހުށަހަޅައިދިން ފިލްމު "ކޯ ގަޔޭ ހަމް ކަހާ" ވުޖޫދަށް ގެނެސްދިނީތީ ފަރްހާންގެ އެކްސެލް އެންޓަޓެއިންމަންޓާއި ޒިޔާގެ ޓައިގާ ބޭބީ ކުންފުންޏަށް ޑައިރެކްޓަރު ވަނީ ޝުކުރު އަދާކޮށްފައެވެ.
"ކޯ ގަޔޭ ހަމް ކަހާން"ގެ ތަރިން-- ފޮޓޯ/ އިންޓަނެޓް
ބަތަލާ އަނަނިޔާ ޕާންޑޭ، ސިދާތު ޗަތުރުވެދީ އަދި އާދަޝް ގޯރަވް މުހިއްމު ރޯލުތައް ކުޅެފައިވާ މި ފިލްމާ މެދު ފަޚުރުވެރިވާ ކަމަށް ފަރުހާން ވަނީ ބުނެފައެވެ.
ފިލްމެއް ކާމިޔާބުވުމުގެ އެންމެ ބޮޑު އެއް ސިއްރަކީ ސަމާލުކަމާ އެކު އެ ފިލްމު ބެލި މީހުންގެ އަދަދު އިތުރުވުން ކަމަށާއި ކުރިއަށް އޮތް ތަނުގައި މިފަދަ ގިނަ ވާހަކަތައް އޯޑިއަންސަށް ގެނެސްދޭނެ ކަމަށް ފަރުހާން ވަނީ ބުނެފައެވެ.