05 Jan 2024, 08:02
ޕޮޕް މިއުޒިކްގެ ތާރީހުގެ ވެސް އެންމެ ފާހަގަކޮށްލެވޭ ތަރިންގެ ލިސްޓުގައި ހިމެނޭ ބްރިޓްނީ ސްޕިއާސް އެނބުރި މިއުޒިކް އިންޑަސްޓްރީއަށް ދުވަހަކު ވެސް ނުދާނެ ކަމަށް އޭނާ ހާމަކޮށްފިއެވެ.
ބްރިޓްނީގެ މިއުޒިކްގެ ކެރިއަރުގެ އެންމެ އުހަށް ފޯރިއިރު އޭނާގެ ނަފުސާނީ ދުޅަހެޔޮކަން ވަނީ ގޯސްވެފައެވެ. ބައްޕަގެ ކޮންސަވޭޓަޝިޕްގެ އަޅުވެތިކަމުގައި ޖެހިފައިވާއިރު މީޑިއާއިން ވެސް ކަންތައް ކުރީ އޭނާއަށް ވަރަށް ގޯސްކޮށެވެ.
ނަމަވެސް އެންމެ ފަހުން އަމިއްލަ މިނިވަނަކަށްވެ، އަމިއްލަ ބޭނުންވާ ކަންތައްތައް ކުރުމުގައި ބްރިޓްނީ ވަގުތުތައް ހޭދަކުރަމުން އެބަ ގެންދެވެ. އޭނާގެ ހަޔާތުގެ ވާހަކަ ކިޔައިދޭ ފޮތެއް އޭނާ ވަނީ ލިޔެ ދާދި ފަހުން ނެރެފައެވެ.
މި ފޮތް ނެރުނުތާ މާ ގިނަ ދުވަސްތަކެއް ވެފައިނުވަނީސް ދެން އިވެން ފެށީ ބްރިޓްނީ އަލުން މިއުޒިކް އިންޑަސްޓްރީއަށް ދާން އުޅޭ ކަމުގެ ވާހަކައެވެ.
އެކަމަށް ރައްދެއް ދެމުން ސޯޝަލް މީޑިއާއަށް އާންމުކުރި ޕޯސްޓެއްގައި ބްރިޓްނީ ބުނެފައިވަނީ ދުވަހަކު ވެސް މިއުޒިކް އިންޑަސްޓްރީއަށް އެނބުރި ނުދާނެ ކަމަށެވެ.
މިހާރު ވަގުތު ހޭދަކުރަން ބޭނުންވަނީ އަމިއްލައަށް ކުރަން ބޭނުންވާ، ޝައުގުވެރިކަން ހުރި ކަންތައްތަކަށް ކަމަށާއި އިންޑަސްޓްރީއަށް އެނބުރި ދިއުމަކީ އޭގެ ތެރޭގައި ހިމެނޭ ކަމެއް ނޫން ކަމަށް ބްރިޓްނީ ބުނެއެވެ.
ނަމަވެސް މިއުޒިކަށް އަދިވެސް ލޯބިކުރާ ކަމަށް ބްރިޓީ ފާހަގަކުރިއެވެ. އެއާ އެކު މިހާރު ވެސް މިއުޒިކް ލިޔަމުން ގެންދާ ކަމަށް އޭނާ ބުންޏެވެ. ގިނަ ލަވަތަކަކީ އެކުވެރިންނާއި ގާތް މީހުންނަށް ލިޔާ އެއްޗެހި ކަމަށް އޭނާ ބުންޏެވެ.
އެހެން ގޮތަކަށް މިއުޒިކް ލިޔަނީ މިހާރު ގޯސްޓް ރައިޓަރެއްގެ ގޮތުގައި ކަމަށް އޭނާ ފާހަގަކުރެއެވެ. އެގޮތުން ވިޔަފާރިއަށް ލިޔާ މިއުޒިކުން އެއްވެސް ކްރެޑިޓެއް ހޯދަން ބޭނުންނުވާ ކަމަށް އޭނާ ފާހަގަކުރެއެވެ. މިއީ އޭނާ މިހާރު ދިރިއުޅުން ބަހައްޓަން ބޭނުންވާ ގޮތް ކަމަށް ވެސް އޭނާ ފާހަގަކުރެއެވެ.