05 Jan 2024, 07:30
އެޗްބީއޯއިން މިހާތަނަށް އެޅުވި އެންމެ ބޮޑު ޝޯ "ގޭމް އޮފް ތުރޯންސް"ގެ ސްޕިން އޮފް "ހައުސް އޮފް ދަ ޑްރެގަން"ގެ ދެވަނަ ސީޒަން ރިލީޒްކުރުމުގެ ކުރީން ތިންވަނަ ސީޒަންގެ މަސައްކަތް ފަށައިފިއެވެ.
އެމެރިކާގެ ނޫސްތަކުން ބުނާގޮތުގައި ތިންވަނަ ސީޒަންގެ އެކްޓިވް ޑިވެލޮޕްމެންޓް މަސައްކަތް މިހާރު ފަށައިގެން ކުރިއަށް އެބަ ގެންދެއެވެ. ނަމަވެސް މިހާރު ކުރެވެމުން ދަނީ ޝޯގެ ކޮން މަސައްކަތެއް ކަމެއް އަދި ހާމަވެފައެއް ނުވެއެވެ.
މި އަހަރަކީ ހައުސް އޮފް ޑްރެގަން ކާސްޓުންނަށް ބިޒީ ވާނެ އަހަރެެކެވެ. އެގޮތުން ޝޯގެ ދެވަނަ ސީޒަން މި އަހަރުގެ މެދުތެރޭގައި ދެއްކުމަށް ހަމަޖެހިފައިވާއިރު ޝޯގެ އިތުރު މަސައްކަތްތައް ކުުރިއަށް ގެންދާނެއެވެ. އެގޮތުން ތަފާތު އިންޓަވިއުތަކާއި ތިންވަނަ ސީޒަނަށް މަސައްކަތް ފެށުން ހިމެނެއެވެ.
ޝޯގެ ދެވަނަ ސީޒަންގެ ޝޫޓިން އެކި ޑިލޭތަކަށް ފަހު ފެށީ މިދިޔަ އަހަރުގެ އޭޕްރިލް މަހުގައެވެ. އަދި ޝޫޓިން ކުރިއަށް ގޮސްފައިވަނީ ސްޕެއިންގެ ކާސެރޭސްގައެވެ. މިހާރު ޝޫޓިން ނިންމާލާފައިވާއިރު ޕޯސްޓް ޕްރޮޑަކްޝަންގެ މަސައްކަތް ވެސް ވަނީ ގާތްގަނޑަކަށް ނިމިފައެވެ.
ގޭމް އޮފް ތުރޯންސްގެ ދުނިޔެއަށް ބިނާކޮށް އުފެއްދި ޕްރީކުއެލް ޝޯ 2022 ވަނަ އަހަރު ދައްކަން ފެށުމާ އެކު އެ ޝޯ ވެގެން ދިޔައީ ގިނަ ބައެއްގެ މެދުގައި މަގުބޫލުކަން ބޮޑުވި ޝޯއަކަށެވެ.
ޝޯގެ އާ ސީޒަންގެ ކާސްޓުންގެ ތެރޭގައި ހިމެނެނީ އެމާ ޑާސީއާއި މެޓް ސްމިތުގެ އިތުރުން އޮލިވިއާ ކުކް އަދި އެވަން މިޗެލްއެވެ. މިއީ ފުރަތަމަ ސީޒަންގެ ލީޑުން ވެސް ފެނިގެން ގޮސްފައިވާ ކާސްޓެވެ. މި ކާސްޓު ސީޒަން ދެއެއްގެ އިތުރުން ތިނަކުން ވެސް ފެނިގެންދާނެއެވެ.