04 Jan 2024, 23:19
މި އަހަރު ބާއްވަން ހަމަޖެހިފައިވާ މަޖިލިސް އިންތިޚާބު ރޯދަ މަހުގެ ފަހުން ބާއްވަން އިދިކޮޅު އެމްޑީޕީއިން މިއަދު ގޮވައިލައިފިއެވެ.
މިކަމާ ގުޅިގެން އިލެކްޝަންސް ކޮމިޝަން (އީސީ) އަށް އެމްޑީޕީން ފޮނުވި ސިޓީއެއްގައި ބުނެފައިވަނީ، ރޯދަ މަހުގެ ތެރޭގައި މަޖިލިސް އިންތިޚާބު ބޭއްވުމަށް އީސީން ނިންމަން އުޅޭކަމުގެ މައުލޫމާތު އެ ޕާޓީއަށް ލިބިފައިވާ ކަމަށެވެ. އަދި އެ ނިންމުން ނިންމުމުގައި ސަރުކާރުގެ ނުފޫޒު އޮތްކަމަށް ތުހުމަތުކޮށްފައިވެއެވެ.
އަދި މީގެ ކުރިން މަޖިލިސް އިންތިޚާބު ބާއްވާނެ، ތާރީޚެއް ކަނޑައެޅުމަށް ޓަކައި، އީސީން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ ލަފައަށް އެދުމުން، އެ ކޮމިޓީން ރޯދަ މަހުގެ ފަހުން އިންތިޚާބު ބާއްވަން ލަފާދީފައިވާ ކަމަށް އެ ޕާޓީން ވަނީ ބުނެފައެވެ.
އަދި މަޖިލިސް އިންތިޚާބަށް އީސީން އެކުލަވައިލައިފައިވާ ގައުމީ ލަފާދޭ ކޮމިޓީން ވެސް އެދުނީ ރޯދަ މަހުގެ ފަހުގެ ތާރީޚެއްގައި ބާއްވަންކަން އެ ޕާޓިން ވަނީ ފާހަގަކޮށްފައެވެ.
މީގެ އިތުރުން ސިޔާސީ ޕާޓީތަކުންނާއި، އެންޓި ކޮރަޕްޝަން ކޮމިޝަނުންނާއި، ހިއުމަން ރައިޓްސް ކޮމިޝަނުގެ އިތުރުން ޓްރާންސްޕޭރެންސީ މޯލްޑިވްސް ފަދަ ކޮމިޝަންތަކުން ވެސް އެދިފައިވަނީ އެގޮތަށް ކަމަށް އެ ޕާޓީން އީސީއަށް ފޮނުވި ސިޓީގައި ބުނެފައިވެއެވެ.
ނަމަވެސް އެ ހުރިހާ ލަފައަކާ ޚިލާފަށް، ސަރުކާރުގެ ނުފޫޒާއެކު، ރޯދަ މަހުގެ ތެރޭގައި އިންތިޚާބު ބާއްވަން އުޅޭކަމުގެ މައުލޫމާތު ލިބިފައިވާ ކަމަށް އެ ޕާޓީން ވަނީ ބުނެފައެވެ.
އަދި އެ ޕާޓީން ވަނީ، އެ ނުފޫޒުތަކަށް ބޯ ނުލަނބައި، ރޯދައިގެ ފަހުގެ ތާރީޚެއްގައި މަޖިލިސް އިންތިޚާބު ބޭއްވުމަށް ގޮވައިލައިފައިވެއެވެ.
މީގެ ކުރިން ވެސް އީސީން ވަނީ މަޖިލިސް އިންތިޚާބު ރޯދައިގެ ފަހުން ބާއްވަން ދަތިވާނެކަމަށް ފާހަގަ ކޮށްފައެވެ.
އެގޮތުން އީސީގެ ނައިބު ރައީސް އިސްމާއިލް ހަބީބް ވިދާޅުވީ، ރޯދައިގެ ފަހަށް ބާއްވާ ކަމަށް ވާނަމަ އެ ދިމާވަނީ އީދު ބަންދާކަމަށެވެ. އަދި ރޯދަ މަސް ނިމޭއިރަށް އެކި މީހުން އެކި ދިމަ ދިމާލަށް ފުރާނެ ކަމަށް އޭނާ ވިދާޅުވިއެވެ.
އެހެން ކަމުން ވޯޓުލާ މީހުންގެ އަދަދުތައް ވަރަށް ބޮޑަށް މަދުވާނެ ކަމުގެ ކަންބޮޑުވުން ވެސް ހަބީބް ވަނީ މީގެ ކުރިން ފާޅުކުރައްވައިފައެވެ.
މަޖިލިސް އިންތިޚާބު ބާއްވާނެ ތާރީޚެއް އިލެކްޝަނުން ހާމަކުރާނީ އަންނަ އާދިއްތަ ދުވަހެވެ.