05 Jan 2024, 10:53
އޮސްޓްރޭލިއާގެ ބްރިސްބަންގައި މިހާރު ކުރިއަށްދާ ބްރިސްބަން އިންޓަނޭޝަނަލް ޓެނިސް މުބާރާތުގެ ކުއާޓާ ފައިނަލުން ސްޕެއިންގެ ތަޖުރިބާކާރު ކުޅުންތެރިޔާ ރަފައެލް ނަޑާލް ޖާގަ ހޯދައިފިއެވެ.
މިއީ އަނިޔާގެ ސަބަބުން ގިނަ ދުވަހު ކުޅުމާ ދުރުގައި ހުރުމަށް ފަހު އެނބުރި އައިސް އޭނާ ކުޅޭ ސިންގަލްސް ފުރަތަމަ މުބާރާތެވެ.
އޭނާ މި މުބާރާތުގެ ކުއާޓާ ފައިނަލުން ޖާގަ ހޯދާފައިވަނީ އޮސްޓްރޭލިއާގެ ޖޭސަން ކުބްލާއާއި ބައްދަލުކުރި މެޗު ސިދާ ދެ ސެޓުން ކާމިޔާބު ކޮށްގެންނެވެ. މި މެޗުން ނަޑާލް ކުޅުމާ އެހާ ގިނަ ދުވަހު ހޭދަކޮށްފައިވާކަން އެއްވެސް ވަރަކަށް ދައްކައިފައެއް ނުވެއެވެ.
މިގޮތުން، ފުރަތަމަ ސެޓު 6-1 އިން ކާމިޔާބުކުރުމާ އެކު އަނެއްކާ ވެސް ނަޑާލް ކުރީގެ ފެންވަރުގައި އެނބުރި އައިކަމުގެ އިހްސާސް ކުރެވުނެވެ. މެޗުގެ ދެވަނަ ސެޓު އޭނާ ކާމިޔާބު ކޮށްފައިވަނީ 6-2 އިންނެވެ.
ނަޑާލް ބުނީ އޭނާ ކޮންމެ ދުވަހެއް ވެސް މިހާރު ނަގަނީ ފުރުސަތެއްގެ ގޮތުގައި ކަމަށެވެ. މާދަމާ ވެސް ވެގެންދާނީ އޭގެ ދުވަހެއްގެ ގޮތުގައި ކަމަށް އޭނާ ބުންޏެވެ. މި މުބާރާތުގެ ކުއާޓާ ފައިނަލްގައި ނަޑާލް ވާދަކުރާނީ އޮސްޓްރޭލިއާގެ އެހެން ކުޅުންތެރިއެއް ކަމަށްވާ ޖޯޑަން ތޮމްސަންއާއެވެ.
މުބާރާތުގައި ވައިލްޑް ކާޑެއްގެ ގޮތުގައި ކުޅެމުންދާ ނަޑާލް މި މުބާރާތް ބޭނުން ކުރަމުން މިދަނީ މި މަހުގެ 14 ވަނަ ދުވަހު ފެށުމަށް ހަމަޖެހިފައިވާ އަހަރުގެ ފުރަތަމަ ގްރޭން ސްލޭމް މުބާރާތް ކަމަށްވާ އޮސްޓްރޭލިއަން އޯޕަންއަށް ތައްޔާރުވުމުގެ ގޮތުންނެވެ.