04 Jan 2024, 23:59
ފަރަންސޭސިވިލާތުގެ ޓްރޮފީ ޑި ޗެމްޕިއަންސްގެ ތަށި ފްރެންޗް ލީގު އާންގެ ޗެމްޕިއަން ޕެރިސް ސެއިންޓް ޖާމެއިން ކާމިޔާބުކޮށްފިއެވެ.
މި މުބާރާތުގެ ތަށި ޕީއެސްޖީއިން އުފުލައިފައިވަނީ އެންމެ ފަހުގެ ކޫޕް ޑި ފްރާންސްގެ ޗެމްޕިއަނުން ކަމަށްވާ ޓޮލޫސް އާއި ބައްދަލުކޮށް 2-0 އިން މެޗު ކާމިޔާބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ޕީއެސްޖީއިން ބޯޅަ ގެންގުޅުނުއިރު ގިނަ ހަމަލާ އުފައްދާފައިވަނީ ޓޮލޫސްއިންނެވެ.
މެޗުގެ ތިންވަނަ މިނެޓްގައި ޕީއެސްޖީއިން ވަނީ ލަނޑެއް ޖަހައި މެޗުގެ ލީޑު ނަގައިފައެވެ. މި ލަނޑު އެ ޓީމަށް ޖަހައިދިނީ ލީ ކާންގްއެވެ. އަދި ފުރަތަމަ ހާފް ނިމެން އެއް މިނެޓަށް ވެފައިވަނިކޮށް ކިލިއަން އެމްބާޕޭވަނީ ޕީއެސްޖީގެ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފުގައި އިތުރު ލަނޑެއް ފެނިގެންނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބިގެންދިޔައެވެ.
މި ކާމިޔާބީއާާއެކު އަހަރުގެ ފުރަތަމަ ތަށި ޕީއެސްޖީއިން ވަނީ ކާމިޔާބު ކޮށްފައެވެ.
ޕީއެސްޖީ އިން ވަނީ 2013 ވަނަ އަހަރުން ފެށިގެން މިހާތަނަށް ކުޅުނު ޓްރޮފީ ޑި ޝެމްޕިއަންސްގެ މެޗުތަކުގައި ވާދަކޮށްފައެވެ.
އަދި 2021 ވަނަ އަހަރުގެ ފައިނަލްގައި ލީލް އަތުން ބަލިވުން ފިޔަވާ އެހެން ހުރިހާ އަހަރެއްގެ މުބާރާތުގެ ތަށި އުފުލައިފައިވަނީ ވެސް ޕީއެސްޖީއިންނެވެ.