04 Jan 2024, 18:49
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ޑިމޮކްރެޓުންގެ ޓިކެޓު ހޯދައިގެން ވާދަކުރުމަށް، އެ ޕާޓީގެ ޕްރައިމަރީގައި ކުރިމަތިލުމުގެ ފުރުސަތު ހުޅުވައިލައިފިއެވެ.
ޑިމޮކްރެޓުން އާންމުކޮށްފައިވާ ގޮތުގައި މިއަދުން ފެށިގެން އަންނަ މަހުގެ ހަތަރުވަނަ ދުވަހުގެ ހަވީރު 16:00އާ ހަމައަށް ވާދަކުރުމަށް ފޯމު ހުށަހެޅުމުގެ ފުރުސަތު އޮންނާނެ ކަމަށެވެ.
މީގެ ކުރިން ޑިމޮކްރެޓުން ބުނި ގޮތުގައި ޕްރައިމަރީގައި ވާދަކުރެވޭނީ ފެބްރުއަރީ ހަތަރުވަނަ ދުވަހުގެ ނިޔަލަށް އެ ޕާޓީގެ ދަފުތަރުގައި ތިބި މެމްބަރުންނަށެވެ. އަދި ގާނޫނުގައި، ރައްޔިތުންގެ މަޖިލީހުގެ މެމްބަރެއްގެ ކިބައިގައި ހުންނަންޖެހޭ ޝަރުތުތައް ކަމަށް ބަޔާންކުރާ ކަންކަން ފުރިހަމަ މެމްބަރުންނަށެވެ.
އަދި ޕްރައިމަރީއަށް ކުރިމަތިލާން އެދި ހުށަހަޅާ ފޯމާއެކު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން އެ މީހެއްގެ ކުށާއި ދަރަނީގެ ރިކޯޑު ސާފުކޮށްފައިވާ ފޯމާއި އަދި މޯލްޑިވްސް ކަރެކްޝަނަލް ސާވިސް އިން ޖިނާއީ ކުށްތަކާ ގުޅޭ ރިކޯޑް ސާފުކޮށްފައިވާ ފޯމު ހުށަހަޅަންވާނެކަމަށް ވެސް އެ ޕާޓީން ބުނެފައިވެއެވެ.
މި ޕްރައިމަރީގައި ވޯޓު ދެވޭނީ ވެސް ފެބްރުއަރީ ހަތަރެއްގެ ކުރިން ޕާޓީގެ ދަފްތަރުގައި ތިބި މެމްބަރުންނަށެވެ.
އިދިކޮޅު އެމްޑީޕީއާއި ސަރުކާރުގައި އޮތް ޕީޕީއެމް ޕީއެންސީން ވެސް އަންނަނީ މަޖިލިސް އިންތިޚާބަށް ތައްޔާރުވަމުންނެވެ.