04 Jan 2024, 18:28
އަލްއުސްތާޛު އިބްރާހީމް ޝިހާބުގެ ހަނދާނީ ވާދައިގެ ތައްޓަށް ބާއްވާ ވާހަކަދެއްކުމުގެ 37ވަނަ ގައުމީ މުބާރާތުގައި ބައިވެރިވުމުގެ ފުރުސަތު ދިވެހި ބަހުގެ އެކެޑަމީން ހުޅުވާލައިފައެވެ.
މި މުބާރާތް ބެހިފައިވަނީ ދެ ބަޔަކަށެވެ. އެއީ ވާހަކަދެއްކުމުގެ ބަޔާއި ބަހުސްކުރުމުގެ ބައެވެ.
ވާހަކަދެއްކުމުގެ ބައިގައި ސްކޫލްތަކުގެ ކެޓަގަރީއާއި އަމިއްލަ ފަރާތްތަކުގެ ކެޓަގަރީ ހިމެނެއެވެ. އެގޮތުން:
ސްކޫލުތަކުގެ ކެޓަގަރީ:
ދަށު ސާނަވީ ގިންތި (ކީ ސްޓޭޖް 3)
- ސާނަވީ ގިންތި (ކީ ސްޓޭޖް 4)
- މަތީ ސާނަވީ ގިންތި (ކީ ސްޓޭޖް 5)
އަމިއްލަ ފަރާތްތަކުގެ ކެޓަގަރީ:
18 އަހަރުން ދަށުގެ އުމުރުފުރާ
- 18 އަހަރުން މަތީގެ އުމުރުފުރާ
މި މުބާރާތުގައި ބަހުސްކުރުމުގެ ބައިގައި ބައިވެރިވެވޭނީ 16 އަހަރުން މަތީގެ ފަރާތްތަކަށެވެ. އެގޮތުން އޮފީސް، ކުންފުނި، ކުލަބު، ޖަމިއްޔާ ޖަމާއަތްތައް، ޔުނިވަސިޓީ، ކޮލެޖު، އިންސްޓިޓިއުޓް، އެކެޑަމީ އަދި އަމިއްލަ ޓީމުތަކަށް ބައިވެރިވެވޭނެއެވެ.
ދިވެހި ބަހުގެ އެކެޑަމީން ބުނީ މި މުބާރާތް ބޭއްވުމަށް ތާވަލުކުރެވިފައިވާ ތާރީޚަކީ އަންނަ މަހުގެ 10ވަނަ ދުވަހުން ފެށިގެން ކަމަށެވެ. އަދި މުބާރާތުގެ ދާއިރާތަކުން ވާހަކަދައްކާނެ މައުޟޫތައް މުބާރާތް ފެށުމުގެ މަދުވެގެން ހަތް ދުވަސް ކުރިން އެކެޑަމީގެ ވެބްސައިޓުން ލިބެން ހުންނާނެކަމަށް އެ އެކެޑަމީން ބުންޏެވެ.
މި މުބާރާތުގައި ބައިވެރިވާން އެދޭ ފަރާތްތަކުން އެ ކަމަށް އެދި،ފޯމުފުރިހަމަކުރުމަށްފަހު އަންނަ މަހުގެ އެކެއް ވާ ބުރާސްފަތި ދުވަހުގެ 13:00 ގެ ކުރިން ހުށަހެޅުމަށް އެ އެކެޑަމީން ވަނި އެދިފައެވެ.
މި މުބާރާތުގެ ގަވާއިދާއި، މުބާރާތާ ގުޅުންހުރި އެހެނިހެން ލިޔެކިޔުންތައް،އެކެޑަމީގެ ވެބްސައިޓުންލިބެން ހުންނާނެއެވެ.
އަދި އިތުރު މައުލޫމާތު އެކެޑަމީގެ ނަންބަރު 7986230 އަށް ގުޅުމުން ލިބޭނެއެވެ.