04 Jan 2024, 16:06
އޮސްޓްރޭލިއާގެ ޕާތުގައި މިހާރު ކުރިއަށްދާ ޔުނައިޓެޑް ކަޕް ޓެނިސް މުބާރާތުގެ ސެމީ ފައިނަލުން އޮސްޓްރޭލިއާ ޖާގަ ހޯދައިފިއެވެ.
މި މުބާރާތުގެ ސެމީ ފައިނަލުން އޮސްޓްރޭލިއާ ޖާގަ ހޯދީ ސާބިއާ އާ ބައްދަލު ކުރި ކްއާޓާ ފައިނަލް މެޗު ކާމިޔާބު ކޮށްގެންނެވެ.
މި ކުއާޓާ ފައިނަލްގައި ކުޅުނު ފުރަތަމަ މެޗުގައި ދުނިޔޭގައި 12 ވަނައަށް ރޭންކް ކުރެވިފައިވާ އެލެކްސް ޑި މިނޯ އާއި ދުނިޔޭގައި އެއް ވަނައަށް ރޭންކް ކުރެވިފައިވާ ސާބިއާގެ ނޯވަކް ޖޯކޮވިޗް ބައްދަލުކުރި މެޗު ސީދާ ދެ ސެޓުން ކާމިޔަބު ކޮށްފައިވަނީ ޑި މިނޯއެވެ.
މި މެޗުގެ ސެޓްތައް އޭނާ ކާމިޔާބު ކޮށްފައިވަނީ ހައެއް ހަތަރެއް އަދި ހައެއް ހަތަރަކުންނެވެ. މި މެޗުގައި ޖޯކޮވިޗްގެ ކަނާތު ކުޑަހުޅަށް އަނިޔާވެގެން ވަނީ ފުރަތަމަ ސެޓަށް ފަހު ފަރުވާވެސް ހޯދައިފައެވެ. ނަމަވެސް ފަރުވާއަށްފަހު ވެސް އޭނާއަށް މި މެޗު ކާމިޔާބު ކުރެވޭގޮތެއް ނުވިއެވެ.
މިއީ 2018 ވަނަ އަހަރަށް ފަހު ޖޯކޮވިޗް އޮސްޓްރޭލިއާގައި ކުޅެ ބަލިވި ފުރަތަމަ ފަހަރެވެ. މި ކުއާޓާ ފައިނަލްގައި އޮސްޓްރޭލިއާގެ އައިލާ ޓޮމްލިޔާނޮވިޗް ވަނީ ސާބިއާގެ ނަޓާލިއާ ސްޓެވަނޮވިޗް ބަލިކޮށްފައެވެ.
މި މުބާރާތުގެ ސެމީ ފައިނަލްގައި އޮސްޓްރޭލިއާ ބައްދަލު ކުރާނީ ޖަރުމަނުވިލާތާއި ގްރީސް ބައްދަލު ކުރާ ކްއާޓާ ފައިނަލް ކާމިޔާބު ކުރާ ޓީމަކާއެވެ.
މި މުބާރާތުގައި ޕޯލަންޑާއި ޗައިނާ ބައްދަލުކުރި ކުއާޓާ ފައިނަލް ކާމިޔާބުކޮށް ޕޯލަންޑްވެސް ވަނީ މި މުބާރާތުގެ ސެމީފައިނަލުން ޖާގަ ހޯދައިފައެވެ. މި ކުއާޓާ ފައިނަލްގެ ފުރަތަމަ މެޗްގައި ޕޯލަންޑްގެ ހާބާޓް ހޫކާޗް އާއި ޗައިނާގެ ޒާން ޒީޒެން ބައްދަލުކުރި މެޗު ހައެއް ތިނެއް އަދި ހައެއް ހަތަރަކުން ކާމިޔާބު ކޮށްފައިވަނީ ޒީޒެންއެވެ. އަދި އަންހެން މެޗުގައި ދުނިޔޭގައި އެއްވަނައަށް ރޭންކް ކުރެވިފައިވާ ޕޯލަންޑްގެ އީގާ ޝްވާޓެކް އާއި ޗައިނާގެ ޒެން ގިންވެން ބައްދަލުކުރި މެޗު ހައެއް ދެއެއް އަދި ހައެއް ތިނަކުން ކާމިޔާބު ކޮށްފައި ވަނީ ޝްވާޓެކްއެވެ.