04 Jan 2024, 14:00
ސްޕެނިޝް ލަލީގާގައި ތާވަލްގެ އެއް ވަނައިގައި އުޅޭ ރެއާލް މެޑްރިޑާއި ރެއާލް މަޔޯކާ ބައްދަލުކުރި މެޗް ވަރަށް އުނދަގުލުން ރެއާލް ކާމިޔާބުކޮށްފިއެވެ.
ރެއާލްގެ ދަނޑުގައި ކުޅުނު މި މެޗް އެ ޓީމް ކާމިޔާބު ކޮށްފައިވަނީ އެއްލަނޑު ސުން ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައި ވަނީ ރެއާލް އިންނެވެ. ނަމަވެސް މި މެޗްގައި މަޔޯކާއިން ޑިފެންޑް ކުރަމުން ދިޔަލެން ވަރުގަދަ ކަމުން އެ ޓީމްގެ ޑިފެންސް ފޫއަޅުވާލުމުގައި ރެއާލްއަށް ގިނަ މައްސަލަތަކާ ކުރިމަތިވިއެވެ.
މި މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ. މި މެޗްގެ ދެވަނަ ހާފްގައި ރެއާލްއިން ހަމަލާއަށް އިސްކަން ދީގެން ކުޅުނު އިރު މަޔޯކާއިން ދިޔައީ ޑިފެންސް ކުރަމުން ލިބޭ ފުރުސަތުގައި ކުރިއަށް އަރާ ރެއާލްގެ ގޯލަށް ނުރައްކާ ކުރެވޭތޯ މަސައްކަތް ކޮށްފައެވެ.
މި ގޮތުން މިހާފުގައި ލަނޑު ޖަހާނެ އެންމެ ރަނގަޅު ދެ ފުރުސަތުވެސް ލިބިގެންދިޔައީ މަޔޯކާއަށެވެ. މިގޮތުން އެ ޓީމުން ފޮނުވާލި ދެ ހަމަލާއެއް ވަނީ ރެއާލްގެ ގޯލް ދަނޑިއަށް އަމާޒުވެފައެވެ.
މި މެޗުގައި ރެއާލްއިން ކާމިޔާބުކުރި ހަމައެކަނި ލަނޑު މެޗްގެ 78 ވަނަ މިނެޓްގައި ލިބުނު ކޯނަރަކުން ކާމިޔާބު ކޮށްފައިވަނީ އެންޓޯނިއޯ ރުޑިގާއެވެ. މިއީ ރެއާލްގެ ކޯޗް ކާލޯ އެންޗެލޯޓީ ރެއާލްގައި މަޑުކުރަން ނިންމާ އެ ޓީމާއެކު ހަދާފައިވާ އެއްބަސްވުން އާކުރިފަހުން އެ ޓީމް ކުޅުނު ފުރަތަމަ މެޗެވެ. މި މެޗަށް ރެއާލް ނިކުންއިރު އެ ޓީމަށް ލިބިގެންދިޔަ އެންމެ ބޮޑު ހިތްހަމަ ޖެހުމަކީ ރެއާލްގެ އެންމެ ފާހަގަ ކޮށްލެވޭ އެއް ކުޅުންތެރިޔާ ކަމަށްވާ ވިނީޝިއަސް ޖޫނިއާ އަނިޔާއިން އެނބުރި އައިސް މި މެޗްގައި ކުޅެފައިވުމެވެ.
މި ކާމިޔާބީއާއެކު ރެއާލް މިހާރު އުޅެނީ ކުޅުނު 19 މެޗުން ލިބިފައިވާ 48 ޕޮއިންޓާއެކު ތާވަލްގެ އެއްވަނައިގައެވެ. ނަމަވެސް އެއީ ދެވަނައިގައި އުޅޭ ޖިރޯނާ އާއި ގޯލްގެ ތަފާތުން ކުރި ހޯދައިގެންނެވެ. މި މެޗުން ބަލިވުމުން މަޔޯކާ އުޅެނީ 18 ޕޮއިންޓާއެކު ތާވަލްގެ 14 ވަނައިގައެވެ.