04 Jan 2024, 13:03
ބިންހިއްކުމުގެ މަޝްރޫއުތަކަށް މަހާޖައްރާފު ބޭނުންކޮށްގެން ވެލި ނަގަމުން ދާތީ އެންވެރިކަމަށް ނޭދެވޭ އަސަރު ކުރާ ކަމަށް ބުނެ ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ)އިން ކަންބޮޑުވުން ފާޅުކޮށްފިއެވެ.
އެ ޔޫނިއަނުން ފޭސްބުކްއާއި އެކްސްގައި ކުރި ޕޯސްޓުތަކެއްގައި ވަނީ، ކަންނެލި މަސްވެރިން އެންމެ ރަނގަޅަށް އެންވެރިކަން ކުރަމުން އަންނަ އިހުރު ވައްބިންފަރު ކައިރިން ކޮންމެދުވަހަކު މަހާޖައްރާފު ވެލިނަގަމުން އަންނަނ ކަމަށެވެ. އެހެންވެ، އެ ސަރަހައްދުގެ އެންވެރިކަން 'ހަލާކުވެފައިވާ' ކަމަށް އެ ޕޯސްޓުގައިވެއެވެ.
އެ ޔޫނިއަން ރައީސް ހުސައިން ނަޝީދު 'ސަން'އާ ވާހަކަދައްކަވަމުން ވިދާޅުވީ އެ ސަރަހައްދަކީ އެންވެރިކަން ތިޔާގި، ވަކިން ޚާއްޞަކޮށް ބޮޑު ކަންނެލީގެ މަސްވެރިކަމުގެ މަންފާ މަސްވެރިންނަށް ވަރަށް ބޮޑަށް ލިބޭ ސަރަހައްދެއް ކަމަށެވެ.
"މި ސަރަހައްދުން ވެލި ނުނަގާ ކޮންމެވެސް އެހެން ސަރަހައްދަކުން ވެލިނެގުމަށް ކުރީ ސަރުކާރަށް ވެސް އަޅުގަނޑުމެން އިލްތިމާސްކުރިން. އެކަމަކު، މިކަމާ ގުޅޭ ބަހެއް އެއްވެސް ސަރުކާރަކުން ލިބިފައެއް ނުވޭ. އެހެންވެ، މިކަން އާއްމުންގެ ސަމާލުކަމަށް ގެންނަން ބޭނުންވީ،" އޭނާ ވިދާޅުވިއެވެ.
މިކަމާ ގުޅޭގޮތުން އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ)އިން 'ސަން'އަށް ބުނީ، މި މައްސަލައާ ގުޅޭގޮތުން އެއްވެސް ފަރާތަކުން ރަސްމީކޮށް މައްސަލަ ހުށަހަޅައިފައި ނުވާކަމަށެވެ.
މާލެ ސަރަހައްދުގައި ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލުހޯދައިދިނުމަށް ސަރުކާރުން ކުރިއަށްގެންދާ މަޝްރޫއުތަކުގެ ދަށުން، ހުޅުމާލެގެ ފޭސް ތިނެއް، ގުޅީފަޅު، ގިރާވަރު ފަޅު އަދި ފުށިދިއްގަރުފަޅު ހިއްކުމުގެ މަސައްކަތް އަންނަނީ ކުރަމުންނެވެ.