04 Jan 2024, 10:37
މާލެއިން ކާށި ބަސްތާއަކާއި އަނބުތަކެއް ވަގަށް ނެގި ބަޔަކު ފުލުހުން ހައްޔަރު ކުރުމުން، ކްރިމިނަލް ކޯޓުން އެ މީހުންގެ ބަންދުގެ މުއްދަތު އިއްޔެ އިތުރުކޮށްފިއެވެ.
ކާށި ބަސްތާއެއް ވަގަށް ނެގި ކަމުގެ ތުހުމަތުގައި ހައްޔަރުކޮށްފައިވަނީ މާލޭ ފިރިހެނަކާއި ކުޅުދުއްފުށީ ފިރިހެނެކެވެ. އުމުރުން 33 އަހަރުގެ އެ ދެ މީހުންގެ ބަންދަށް ވަނީ ފަސް ދުވަސް ޖަހައިފައެވެ.
ކޯޓު އަމުރުގައި ބުނެފައިވަނީ އެ މީހުން ހައްޔަރުކުރީ ސައިކަލެއްގައި ކާށި ބަސްތާއެއް ހިފައިގެން ދިޔައިރު އެ މީހުންގެ އަމަލުތައް ހުރިގޮތުން ޝައްކު ކުރެވިގެން ހުއްޓުވާ ސުވާލު ކުރުމަށް ފަހު ކަމަށެވެ.
އެ މީހުން ނެގި ކާށި ބަސްތާއަކީ ސައިކަލް ޕާކްކުރިއިރު އެ ތަނުގައި ބަހައްޓާފައި ހުރި އެއްޗެއް ކަމަށް ބުނެފައިވާ ކަމަށް އަމުރުގައި ވެއެވެ.
އެ ދެ މީހުންގެ ތެރެއިން މާލެއަށް ނިސްބަތްވާ މީހާ މީގެ ކުރިން ނުވަ ފަހަރު ހައްޔަރުކޮށް ހަތަރު ފަހަރު ބަންދުކޮށްފައިވާ ކަމަށް އަމުރުގައިވެއެވެ. ކުޅުދުއްފުށީ މީހާ 15 ފަހަރު މީގެ ކުރިން ހައްޔަރުކޮށް ހަ ފަހަރު ބަންދުގެ މުއްދަތު އިތުރު ކޮށްފައިވާ ކަމަށް އަމުރުގައިވެއެވެ.
އަނބުތަކެއް ވަގަށް ނެގި ކަމުގެ ތުހުމަތުގައި ހައްޔަރު ކޮށްފައިވަނީ ހއ. ތަކަންދުއަށް ނިސްބަތްވާ 35 އަހަރުގެ ފިރިހެނެކެވެ.
ފުލުހުން ބުނީ އޭނާ އާއި އިތުރު މީހަކު ދަބަހެއް ހިފައިގެން މަގުމަތިން ދަނިކޮށް ފުލުހުން ފެނިގެން ފިލަން މަސައްކަތް ކޮށްފައިވާ ކަމަށެވެ. އެ މީހާ ހުއްޓުވައި ދަބަސް ޗެކްކުރިއިރު އެ ދަބަހުގައި ހުރީ ވަގަށް ނަގާފައިވާ އަނބުތަކެއް ކަމަށާއި އޭނާއާ ސުވާލު ކުރުމުން އެތަކެއްޗާ ހަވާލު ވެފައި ނުވާ ކަމަށް އަމުރުގައިވެއެވެ.
އިއްޔެ ކްރިމިނަލް ކޯޓުން އަމުރުކުރީ މީނާ ހަތް ދުވަހަށް ޖަލުގައި ބަންދު ކުރުމަށެވެ.
އެ މީހާ މިހާތަނަށް 39 ފަހަރު ހައްޔަރުކޮށް 22 ފަހަރު ބަންދުގެ މުއްދަތު އިތުރު ކޮށްފައިވާ ކަމަށް އަމުރުގައިވެއެވެ.