04 Jan 2024, 09:48
ވައިގެ މަގުން ރާއްޖެ އައި ދިވެހި ޒުވާން ދެމަފިރިން ރާއްޖެއަށް މަސްތުވާތަކެތި އެތެރެ ކުރިކަމުގެ ތުހުމަތުގައި ހައްޔަރުކޮށްފިއެވެ.
ކްރިމިނަލް ކޯޓުގެ އަމުރުން އެނގޭގޮތުގައި ހައްޔަރުކޮށްފައިވަނީ މާލެއަށް ނިސްބަތްވާ 27 އަހަރުގެ ދިވެހި ފިރިހެނަކާއި ހދ. ނެއްލައިދޫއަށް ނިސްބަތްވާ 20 އަހަރުގެ އަންހެނެކެވެ.
އިއްޔެ ނެރުނު އަމުރުގައި ފުލުހުންނާ ހަވާލާދީ ބުނެފައިވަނީ އެ ދެމަފިރިން ރާއްޖެ އައިއިރު ގެނައި ލަގެޖުން ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ.
އެ ދެމަފިރިންގެ ކުޑަކަމުދާ ތަކެތި ޓެސްޓް ކުރިއިރު ސީއޯސީ، ޓީއެޗްސީ، އަދި ބެންޒޯއަށް ޕޮޒިޓިވް ވެފައިވާ ކަމަށް ވެސް އަމުރުގައި ބުނެފައިވެއެވެ.
ކޯޓުން ވަނީ މި ދެ މީހުން 15 ދުވަހަށް ޖަލުގައި ބަންދު ކުރުމަށް އަމުރު ދީފައެވެ.
މި ދެމަފިރިންނަށް ކުރާ ތުހުމަތުތަކުގެ ތެރޭގައި ޚާއްސަ އުކުޅެއް ބޭނުންކޮށްގެން ރާއްޖެއަށް މަސްތުވާތަކެތި އެތެރެ ކުރަން އުޅުމާއި އެ މީހުންގެ އަތުން ގިނަ އަދަދެއްގެ މަސްތުވާތަކެތި ފެނިފައިވުން ހިމެނެއެވެ. މަސްތުވާތަކެތި ގެނައި ލަގެޖަކީ މީހަކު ބުނެގެން ގެނައި އެއްޗެއް ކަމަށް މި މީހުން ބުނެފައިވާއިރު މިކަމުގައި އިތުރު ބައެއްގެ ބައިވެރިވުން ވާކަމަށް ބުރަވެވޭ ކަމަށް ވެސް އަމުރުގައި ބުނެފައިވެއެވެ.