04 Jan 2024, 10:20
އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުގެ ފައުޖުތަކުން ފަލަސްޠީނުގެ ޣައްޒާގެ އާންމުންނަށް އަމާޒުކޮށް ދެމުންދާ ހަމަލާތަކުގައި މިހާތަނަށް 22،313 ފަލަސްތީނު މީހުން ޝަހީދުކޮށްލައިފިއެވެ.
ފަލަސްތީނުގެ ސިއްހީ ވުޒާރާއިން ހާމަކުރާ ގޮތުގައި އިސްރާއީލުގެ ހަމަލާތަކުގައި ޒަހަމްވި މީހުންގެ އަދަދު މިހާރު ވަނީ 57،296އަށް އަރައިފައެވެ.
ޒަހަމްވި މީހުންގެ އަދަދު 57،296 އަށް އަރާފައިވާއިރު، ސުންނާފަތިވެފައިވާ އިމާރާތްތައް ދަށުގައި މިހާރު ވެސް ގިނަ ބަޔަކު ތިބި ކަމަށް މިނިސްޓްރީން ވަނީ އަންދާޒާ ކޮށްފައެވެ. މިއާއެކު ޝަހީދުވި މީހުންގެ އަދަދާއި ޒަހަމްވެފައިވާ މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.
މިނިސްޓްރީން ހާމަ ކުރި ގޮތުގައި ފާއިތުވި 24 ގަޑިއިރު ތެރޭގައި ވެސް އިސްރާއީލުން ވަނީ ޣައްޒާގެ 128 މީހަކު ޝަހީދު ކޮށްލައި، 261 މީހަކަށް އެކިވަރުގެ އަނިޔާތައް ދީފައެވެ.
ހަމަލާތަކުގެ ސަބަބުން، 2.3 މިލިއަން މީހުންގެ އާބާދީއެއް އޮންނަ ޣައްޒާގެ ދެބައިކުޅަ އެއްބަޔަށްވުރެ ގިނަ މީހުންނަށް ވަނީ އެމީހުންގެ ގެދޮރު ދޫކޮށްލުމަށް މަޖުބޫރުވެފައެވެ.