04 Jan 2024, 08:43
ބޮލީވުޑްގެ ތަޖުރިބާކާރު ދެ ފިލްމީ ތަރިން ކަމަށްވާ ކޮންކޮނާ ސެން ޝަރުމާ އާއި މަނޯޖް ބަޖްޕަޔީ މުހިއްމު ރޯލްއިން ފެންނަ ވެބް ސީރީސް "ކިލާ ސޫޕް"ގެ ޓްރެއިލާ ރިލީޒް ކޮށްފިއެވެ.
މި މަހުގެ 11ވަނަ ދުވަހު ނެޓްފްލިކްސްގައި ރިލީޒް ކުރުމަށް ތައްޔާރު ވަމުން އަންނަ "ކިލާ ސޫޕް"އަކީ ގޮތް ނޭނގޭ ކަންތައްތަކެއް ހިނގާ ކޮމެޑީ ތުރިލާއެކެވެ.
އެންމެ ފުރަތަމަ "ސޫޕް"ގެ ނަމުން އެކަނި ނަން ދެވުނު މި ސީރީސްއަކީ، "އޮމްކާރާ"، "އިޝްކިޔާ" އަދި "އުޅްތާ ޕަންޖާބު" ފަދަ ފިލްމުތައް ގެނެސްދިން ޑައިރެކްޓަރު އަބީޝެކް ޗޯބޭގެ ފިލްމެކެވެ. ޖުމްލަ އަށް އެޕިސޯޑު އެކުލެވޭ މި ވެބް ސީރީސްގެ ފުރަތަމަ ސީޒަންއިން މަނޯޖް އާއި ކޮންކަނާގެ އިތުރުން ސައުތު ސިނަމާގެ ގިނަ ފިލްމުތަކުގައި ވިލެންގެ ރޯލް ކުޅެފައިވާ އެކްޓަރު ނައްސަރު ވެސް ފެންނާނެއެވެ.
ކޮންކަނާ ކައްކާ މީހެއްގެ ރޯލް އިން ފެންނައިރު މަނޯޖް މި ސީރީސްގައި ކުޅެފައި ވަނީ ޑަބަލް ރޯލެވެ.
ބަތަލާ ކޮންކޮނާ ސެން އަދި އެކްޓަރު މަނޯޖް-- ފޮޓޯ/ޓެލެގްރާފްއިންޑިއާ
ފިލްމު "ޕޭޖް3"، "އޯމްކާރާ" އަދި "ލައިފް އިން އަ މެޓްރޯ" ފަދަ ފިލްމުތައް ކުޅެފައިވާ ބަތަލާ ކޮންކަނާ އަކީ ދެހާހުގެ އަހަރުތަކުގައި ވަރަށް ތަފާތު މައުޟޫއުތަކަށް ބިނާކޮށް އުފެއްދި ފިލްމުތަކުން ފެނުނު ބަތަލާއެކެވެ.
އެކްޓަރު ރަންވީރު ޝޯރޭއާ ކައިވެނި ކުރުމަށްފަހު ފުރަތަމަ ދަރިފުޅު ލިބުމުން ކޮންކޮނާ ވަނީ އަހަރަކު ކުޅޭ ފިލްމުތަކުގެ މިންވަރު މަދުކޮށްފައެވެ. ކޮންކަނާ އަންނަނީ ކެރިއަރުގެ ބޮޑު މަޝްހޫރު ކަމެއް ހޯދި ފިލްމު "ލައިފް އިން އަ މެޓްރޯ"ގެ ސީކުއަލްގައި ވެސް މަސައްކަތް ކުރަމުންނެވެ.
މިދިޔަ އަހަރު ޑިޒްނީ ޕްލަސް ހޮޓް ސްޓާގައި ރިލީޒް ކުރި ފިލްމު "ގުލް މޯހަރު"ގެ އެކްޓަރު މަނޯޖް ބަޖްޕައީ އެންމެ ފަހުން ފެނިފައި ވަނީ މިދިޔަ ޑިސެމްބަރު މަހުގެ އަށް ވަނަ ދުވަހު ރިލީޒް ކުރި ތުރިލާ ފިލްމު "ޖޯރަމް" އިންނެވެ.