03 Jan 2024, 23:55
އިދިކޮޅު އެމްޑީޕީން ވަކިވެ ސަރުކާރު ހިންގާ މައި ޕާޓީ ޕީއެންސީއާ ބައެއް މެންބަރުން ގުޅުނީ، އެ ޕާޓީން ވަކިވުމުގެ ކުރިން ކުރިއަށް އޮތް މަޖިލިސް އިންތިޚާބަށް ޕްރައިމަރީއާ ނުލައި، ޕީއެންސީން ޓިކެޓު ދޭން ޝަރުތުކޮށްގެން ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް މިރޭ ވިދާޅުވެއްޖެއެވެ.
މިދިޔަ މަހުގެ 28ވަނަ ދުވަހު އެމްޑީޕީއަށް ނިސްބަތްވާ 13 މަޖިލިސް މެމްބަރަކު ވެރިކަން ކުރާ ޕީއެންސީއަށް ވަނީ ސޮއިކުރައްވައިފައެވެ.
އެކަމާ ގުޅިގެން މިރޭ ޓީވީ ޕްރޮގްރާމެއްގައި ވާހަކަދައްކަވަމުން ފައްޔާޒު ވިދާޅުވީ، ޕާޓީ ދޫކުރައްވައި ދާންޖެހޭ ވަރުގެ އެއްވެސް ކަންބޮޑުވުމެއް އެ މެންބަރުންގެ ފަރާތުން ހުށަހަޅުއްވައިފައިނުވާ ކަމަށެވެ.
ނަމަވެސް މަޖިލިސް އިންތިޚާބަށް ޕްރައިމަރީއަކާ ނުލައި އެމްޑީޕީގެ ޓިކެޓުގައި ވާދަކުރަން އެ ފަރާތްތަކުން ޝަރުތުކުރިކަމަށް ފައްޔާޒު ވިދާޅުވިއެވެ.
"ބައެއް ބޭފުޅުން އެބަ ބުނޭ ތިމަންނަމެންނަށް ޕްރައިމަރީއާ ނުލައި ދޭންޖެހޭނޭ ޓިކެޓު،" ފައްޔާޒު ވިދާޅުވިއެވެ.
"އޭގަ އެބައޮތް ރަނގަޅު ވާހަކައެއް ވެސް، އެއީ މަޖިލިސް މެންބަރެއްގެ ގޮތުގައި އެ ތަނުގައި ހަރަކާތްތެރިވެގެން އުޅުއްވާ ބޭފުޅަކަށް ކޮންމެ ވެސް ކަހަލަ ގޮތެއް އޮންނަން ޖެހޭކަން އަޅުގަނޑު ވެސް ޕާސަނަލީ ގަބޫލުކުރަން،" އޭނާ ވިދާޅުވިއެވެ.
ފައްޔާޒު ވިދާޅުވީ އެގޮތަށް ގަބޫލުކުރެއްވި ނަމަވެސް މި ވަގުތު އެމްޑީޕީގެ އަސާސީ ގަވައިދަކުން އެގޮތަށް އެކަން ކުރުމަށް އެއްވެސް ޖާގައެއް ނުދޭ ކަމަށެވެ. އަދި އެއީ ދުނިޔޭގައި ޑިމޮކްރެސީ އެންމެ ބޮޑެތި ގައުމުތަކުގައި ވެސް ކަންކުރަމުންދާ ގޮތް ކަމަށް ވިދާޅުވިއެވެ.
"އެހެންވީމަ މިވަގުތު އަޅުގަނޑަށް ކުރެވޭނެ ހަމައެކަނި ކަމަކީ ކުރިމަތިލައިފައި ތިބި މީހުންގެ ތެރެއިން ވާހަކަދައްކައިގެން އެކައްޗަކަށް ހަދައިގެން މަދުކުރެވޭތޯ ބެލުން،" ފައްޔާޒު ވިދާޅުވިއެވެ.
އޭނާ ވިދާޅުވީ އެ ނޫން ގޮތެއް ނެތް ކަމަށެވެ. ނަމަވެސް ގަސްތުކުރަނީ ކުރިއަށް އޮތް ތަނުގައި ޕާޓީގެ އަސާސީ ގަވައިދަށް އިސްލާހު ހުށަހަޅައި، ޕާޓީގައި ތިބެ ދައުރު ފުރިހަމަކުރާ މެންބަރުންނަށް ކޮންމެވެސް ކަހަލަ ޕޮއިންޓެއް ޕްރައިމަރީގައި ލިބޭގޮތް ހެދުން ކަމަށެވެ.
"އަދި ނޭނގޭ އެކަން ކުރާނީ ކިހިނެތް ކަމެއް. އެކަހަލަ ވިސްނުމެއް އެބަ ގެންގުޅެން،" ފައްޔާޒު ވިދާޅުވިއެވެ.
އެމްޑީޕީން ވަކިވި މެންބަރުން ޕާޓީން ވަކިވީ ރިޝްވަތަށް ކަމަށް ވެސް ގިނަ ބަޔަކު ތުހުމަތުކުރިއެވެ.
މި 13 މެމްބަރުން ޕީއެންސީއާ ގުޅިވަޑައިގަތުމާއެކު ޕީއެންސީގެ ޕީޖީ ގްރޫޕު މިވަނީ އިތުރަށް ވަރުގަދަ ވެފައެވެ. އަދި ޕީއެންސީވާނީ މަޖިލީހުގެ މައިނޯރިޓީ ޕާޓީއަށެވެ. ޕީޕީއެމްގެ ތިން މެމްބަރުން އެބަ ތިއްބެވިއެވެ. އަދި އެމްޑީޕީ މެމްބަރުންގެ އަދަދު ވަނީ 41 އަށް މަދުވެފައެވެ.