03 Jan 2024, 23:46
ފުލުހުންގެ މުސާރަތައް މާޗު އެކެއްގައި ބޮޑުކުރާނެކަމުގެ ޔަގީންކަން ފިނޭންސް މިނިސްޓްރީން ދީފައިވާކަމަށް ފުލުހުންގެ ތަރުޖަމާނު ޗީފް ސްޕްރިންޓެންޑެންޓް އޮފް ޕޮލިސް އަހްމަދު ޝިފާން މިރޭ ވިދާޅުވެއްޖެއެވެ.
އޭނާ މިފަދައިން ވިދާޅުވީއިރު، ދެ މަހެއްހައި ދުވަހުގެ ތެރޭ މުސާރަތައް ބޮޑުވާނެކަމަށް ފުލުހުންގެ އިދާރާގެ އިސް ވެރިއަކު "ސަން"އަށް ވަނީ ޔަގީންކޮށްދީފައެވެ.
އޭނާ މި ކަން ހާމަކުރެއްވީ، ވެރިކަމުގެ އެންމެ ފަހު ރަސްމީ ދުވަހުގެ އެންމެ ފަހު ވަގުތު، ކުރީގެ ރައީސް އިބްރާހިމް މުޙައްމަދު ޞާލިހު ފުލުހުންނާއި ސިފައިންގެ މުސާރައިގެ އާ އޮނިގަނޑާ އެއްގޮތަށް ބޮޑުކުރަން ނިންމެވި ނިންމެވުމާ އެއްގޮތަށް މި ވަގުތު އެ ކަން ކުރެވެން ނެތުމުން މުސާރަތައް ބޮޑުކުރުން ފަސްކޮށްފައިވަނިކޮށެވެ.
ސަރުކާރާއި މި ދެ އިދާރާގެ ތެރެއިން "ސަން"އަށް ޔަގީން ކުރެވިފައިވާ ގޮތުގައި އެ މަސައްކަތް ފަސްކޮށްފައިވަނީ މި ވަގުތު އެ ކަން ކުރުމުގެ މާލީ ތަނަވަސްކަން ދައުލަތުގައި ނެތުމުންނެވެ.
ނަމަވެސް ކުރިއަށް އޮތް ދެ މަހެއްހައި ދުވަހުގެ ތެރޭ މުސާރަތައް ބޮޑުވާނެކަމަށް ބެލެވޭކަމަށް ވެސް މައުލޫމާތު ދެއްވި ބޭފުޅާ ވިދާޅުވިއެވެ. އެއީ އަަހަރުގެ ފުރަތަމަ ކުއާޓަރު ތެރެއެވެ.
މި ކަން ފަސްކުރިއިރު ރައީސް ޑރ. މުހައްމަދު މުއިއްޒު ވެސް ވަނީ ރިޔާސީ އިންތިޚާބުގެ ކެމްޕޭން ތެރޭގައި ފުލުހުންނާއި ސިފައިންގެ މުސާރަ ދެގުނައަށް ބޮޑު ކޮށްދޭން ވައުދުވެލައްވައިފައެވެ.