04 Jan 2024, 08:38
އަމިއްލަ މިއުޒިކު ރިލީޒްކުރުމާ ދުރުގައި ހުރެ ނެގި ބޮޑު ބްރޭކަށް ފަހު ޕޮޕްގެ ޕްރިންސެސްގެ މަގާމުގައި ހިމެނޭ އެއް ލަވަކިޔުންތެރިޔާ އާރިއާނާ ގްރާންޑޭގެ އާ މިއުޒިކް ރިލީޒް ކުރުމަށް ތައްޔާރުވެއްޖެއެވެ.
އާރިއާނާ އޭނާގެ އެންމެ ފަހުގެ ސްޓޫޑިއޯ އަލްބަމް "ޕޮޒިޝަންސް" ރިލީޒް ކުރުމަށް ފަހުން މިއުޒިކް އުފެއްދުމުން ބްރޭކެއް ނަގާފައިވަނީ 2020 ވަނަ އަހަރުގައެވެ. އެއަށްފަހު އޭނާގެ އަމިއްލަ މިއުޒިކެއް ރިލީޒްކޮށްފައެއް ނުވެއެވެ. އޭނާ މިއުޒިކުން ބްރޭކެއް ނަގާފައިވަނީ ބޮޑު ފިލްމު ޕްރޮޖެކްޓެއް ކަމަށްވާ "ވިކެޑް"ގެ މަސައްކަތްތަކަށް ވަގުތު ދިނުމަށެވެ.
މިއުޒިކަލް ފިލްމު ވިކެޑްގެ ލީޑް ރޯލުން އާރިއާނާ ފެންނަ އިރު މިއީ މިފަދަ ބޮޑު ޕްރޮޖެކްޓެއްގައި އާރިއާނާ ލީޑެއްގެ ގޮތުގައި މަސައްކަތް ކުރާ ފުރަތަމަ ފަހަރެވެ.
އާރިއާނާގެ އާ މިއުޒިކް ރިލީޒް ކުރަން އުޅޭ ކަމުގެ އިޝާރާތް ކޮށްފައިވަނީ މިދިޔަ މަހުގެ ފަހުކޮޅުގައެވެ. އަލުން ސްޓޫޑިއޯއަށް ގޮސް މިއުޒިކް ހަދަަން ފަށާފައިވާ ކަމަށް އިޝާރާތް ކުރާ ފޮޓޯތަކެއް އާރިއާނާ ވަނީ އާންމުކޮށްފައެވެ.
އޭނާގެ ހަތްވަނަ ސްޓޫޑިއޯ އަލްބަމްގެ އިންތިޒާރުގައި އެތައް ބަޔަކު އެބަ ތިއްބެވެ. އެންމެފަހުން މިއޮތީ އަލްބަމް އަޑު އަހާލެވޭ ދުވަހާ ގާތްވެފައެވެ. ލީކްތަކުން ހާމަވާ ގޮތުގައި އާރިއާނާގެ އާ އަލްބަމްގެ ފުރަތަމަ ސިންގަލް މާދަމާ ރިލީޒް ކުރާނެއެވެ. މި ސިންގަލް ރިލީޒް ކުރުމަށް ފަހު އާރިއާނާގެ އާ އަލްބަމް މި މަހުގެ 12 ވަނަ ދުވަހުގައި ރިލީޒް ކުރުމަށް ވަނީ ހަމަޖެހިފައެވެ. ނަމަވެސް އަލްބަމް ރިލީޒްގެ ތާރީހަކީ އަދި ކަށަވަރު ވެފައި ނުވާ ތާރީހެކެވެ.