09 Jan 2024, 09:15
ޝަފާޒް ހުއްޓުވަން ލިޝާ ބޭނުންވިއެވެ. އެމޭގައި މޫނު ފޮރުވާލައިގެން އޮވެ ރޯލަން ހިތް އެދުނެވެ. އެހެނަސް، އެ ހިތްވަރު އޭނާ ހޯދާނީ ކޮންތާކުން ހެއްޔެވެ؟ އޭނާގެ ދިރިއުޅުމުން ޝަފާޒް ބޭރުކުރަނީވެސް ހުދު އަމިއްލައަށެވެ. ޝަފާޒް ނުކުމެގެން ދިޔުމުންވެސް ލިޝާއަށް ހުރެވުނީ އެދިމާއަށް ބަލަހައްޓައިގެންނެވެ.
*********
"މިތާ ދޯ ތިހުރީ.... މަންމަ ހާދަ ވަރަކަށް ހޯދައިފީމޭ....." ލިޝާއަށް ގޮވަމުން ބަގީޗާއަށް ނުކުތް މަދީހާއަށް ލިޝާ ފެނުމުން ހަމަޖެހުމުގެ ނޭވާއެއް ދޫކޮށްލެވުނެވެ.
"އެމީހުން އައިސް އެބަތިބި.... ދަރިފުޅު ނުފެނިގެން ސުވާލުވެސް ކޮށްފި މިހާރު.... ހިނގާއަވަހަށް...." މަދީހާ ހިނގައިގަތީ ލިޝާގެ އަތުގައި ހިފައިގެންނެވެ. ފަހު ފަހަރަށް ބަލައިލާހެން، ޝަފާޒް ދިޔަ ދިމާއަށް ލިޝާއަށް ބަލައިލެވުނެވެ. ޝަފާޒްގެ ލޯތްބަށް އަލްވަދާއު ކިޔާކަށް އޭނާ އަދިވެސް ތައްޔާރެއް ނޫނެވެ.
ލިޝާގެ ހިތުގައި ރިއްސަމުންދިޔައެވެ. ދަރިއެއްގެ ހިތުގެ ވޭން މަޔަކަށް ސިއްރުނުވާނެއޭ ބުނާތީ އޭނާ އަޑު އަހައެވެ. އެކަމަކު ލިޝާގެ ދެލޮލުގައި ވިދަމުންދިޔަ ކަރުނަތައް އޭނާގެ މަންމައަށް ނުފެންނަނީ ކީއްވެ ހެއްޔެވެ؟ އެ ހިތުގައި އަޅަމުން ދާ ވޭން އެމަންމައަށް އިހުސާސް ނުކުރެވެނީ ކީއްވެ ހެއްޔެވެ؟ ނޫނީ އެ މަންމައަށް ހުރިހާ ކަމެއް އެނގިހުރެ، އެއްވެސް ކަމެއް އެނގޭކަމަށް ނުހަދަނީ ހެއްޔެވެ؟
ބަސްއަހާ ކިޔަމަންތެރި ދަރިއަކު ފަދައިން ލިޝާ އޭނާގެ މަންމައާއިއެކު ހިނގައިގަތީ އެއްވެސް ޝަކުވާއެއް ދުލުން ބޭރުކޮށްލުމެއް ނެތިއެވެ. ލިޝާ ފެނުމާއިއެކު ސިޓިންގްރޫމުގައި ތިބި އެންމެން އެއްކޮށް ކަހަލަ ގޮތަކަށް ހިމޭންވިއެވެ. އޭރު އެ އެންމެންގެ ނަޒަރު ވެސް ވަނީ ކައިވެނި ވެވެން އުޅޭ އަންހެންކުއްޖާއަށް ހުއްޓިފައެވެ. ލިޝާއަކީ ހެޔޮވަރު އިސްކޮޅަކާއި، ލޫޅާފަތި ހަށިގަނޑެއް ލިބިފައިވާ ޒުވާނެކެވެ. ހަމުގެ ކުލަ މާ އަލި ނޫނަސް، ލިޝާއަކީ ރީތި ކުއްޖެކެވެ. ގުދުރަތީގޮތުން ލިބިފައިވާ މުށިކުލައިގެ ފަން ދިގު އިސްތަށިގަނޑުން އެ ރީތިކަން އިތުރުކޮށްދެއެވެ.
ދެފަރާތުގެ އާއިލާ ވާހަކަ ދެއްކުމަށްފަހު ކައިވެނީގެ ތާރީހު އިއުލާނުކުރެވިގެން ދިޔައެވެ. ކައިވެނި ކުރެވެން ބާކީ އޮތީ އެންމެ ހަފުތާއެކެވެ. ހުރިހާ ކަމެއް ނިމެމުން ދިޔައީ، ލިޝާ ހީކުރި ވަރަށްވުރެ އަވަހަށެވެ. އަމިއްލަ ނަފުސު ތައްޔާރުކުރަންވެސް އޭނާއަށް ވަގުތެއް ނެތެވެ.
"ދަރިފުޅާ!..... މިހާރު އަކްރަމް އާ ވާހަކަ ދައްކާލައިފިންތަ؟..." ލިޝާ ގޮވައިގެން މީހުންތަކާއި ދުރަށްޖެހިލަމުން މަދީހާ ސުވާލުކުރިއެވެ.
"ކޮން އަކްރަމެއް؟...." ލިޝާ ބޯ ހޫރައިލީ ނޭނގެއޭ ބުނާ ފަދައިންނެވެ.
"އެކަމަކުވާ ދަރިފުޅާ.... ރަންކީ އިރުވެސް ދަރިފުޅަށް ނަން ނޭނގޭ؟... ތިހެން ހެދީމަ ކަމަކު ނުދާނެއެއްނު... އެމީހުން ކީކޭ ހީކުރާނީ؟..." މަދީހާ ހިތްހަމަނުޖެހުނެވެ. "ދަރިފުޅު ނުކުމޭ އެފަޅިއަށް... މަންމަ އަކްރަމް ފޮނުވާނަން..."
ރޭގަނޑުގެ ވަގުތެވެ. ލިޝާ އުޅުނީ މަދީހާއަށް ފިލައިގެންނެވެ. ބޮޑުސުވާލު ކުރިމަތިވާނެކަން އެނގޭތީއެވެ. މަދީހާ އަކްރަމާއި ބައްދަލުކުރަން އެދުނަސް، ލިޝާ އެކަމެއް ނުކުރެއެވެ. އަކްރަމްގެ ސޫރަ ފެންނާކަށްވެސް އޭނާ ބޭނުމެއް ނުވެއެވެ.
"ކޮބާތަ އެތަނުން އަކްރަމަކީ؟...." ސުމާގެ އަޑަށް ބަދިގެތެރޭގައި ހުރި ލިޝާ ދިޔައީ ސިއްސައިގެންނެވެ.
"ނޯ އިންޓްރެސްޓް..." ލިޝާގެ މޫނުން ފެނުނީ ފޫހިކަމެވެ.
"ރަންކީއިރުވެސް ބަލައިނުލަން؟..." ސުމާ އުޅުނީ ލިޝާ ހެއްވާލާށެވެ.
"ފައި ފެނުނު..." ލިޝާ އިސްޖަހައިލިއެވެ.
"ލިޝް އޯކޭތަ؟..." ސުމާ ދެރަވީ ލިޝާއަށް ވީގޮތް ފެނުމުންނެވެ.
"ސުމް..." ލިޝާ ކުއްލިއަކަށް ސުމާގެ ގައިގައި ބައްދައިލިއެވެ. "ޝަފް ނޫން މީހަކާ ދިމާއަށް ނުބެލޭނެ... ބަލާކަށް ބޭނުމެއްވެސް ނޫން... ހިތަށް އަރުވާކަށްވެސް..."
"ތިހެން ހެދީމަ ކަމަކުނުދާނެ... ކޮންމެގޮތެއްވިޔަސް، ކައިވެންޏަށްފަހު އަކްރަމް ވާނީ ލިޝްގެ ފިރިމީހާއަށް... އަބަދު ތިހެން ނޫޅެވޭނެއެއްނު...." ސުމާ މަސައްކަތްކުރީ ލިޝާއަށް ވިސްނައިދޭށެވެ.
ކައިވެނީގެ ދުވަސް އައިސްޖެހުނުއިރު، ލިޝާ ހުރީ ކުޑަކޮށް ހަމަޖެހިފައެވެ. ކައިވެނި ކުރެވެން އުޅޭ މީހާދެކެ ލޯބިނުވިޔަސް އެއީ މައްސަލައެއް ކަމަށް އޭނާ ނުދެކުނީ އަމިއްލަ މައިންބަފައިންގެ އުފާވެރި ދިރިއުޅުން މިސާލެއްގެ ގޮތުގައި ބަލައިގެންނެވެ. އެ ދެމީހުންގެ ކައިވެންޏަކީވެސް މައިންބަފައިން ކުރުވި ކައިވެންޏެކެވެ. މިއަދާއި ހަމައަށްވެސް ދެގޮތެއްނުވެ ކައިވެނީގެމަތީގައި ތިބެވުނީ ކައިވެނީގެ ބިންގާ ރަނގަޅުވުމުންނެވެ.
"ސުމް.... ނޭނގެ ކީއްވެކަމެއް ވަރަށް ހިތްބިރުގަނޭ އެބަ...." ކައިވެނީގެ ހެދުމުގައި ހުރިއިރު، ލިޝާގެ ހިތް ނުތަނަވަސްވާން ފެށިއެވެ. ކޮންމެވެސް ކަމެއް ގޯސްވާން އުޅޭހެން އޭނާއަށް ހީވަނީއެވެ.
"ހުރިހާ ކަމެއްވެސް ރަނގަޅުވާނެ..." ސުމާ ހިތްވަރުދިނެވެ.
"ދަރިފުޅާ.... ހިނގާ އަވަހަށް...." މަދީހާ ކޮޓަރީގެ ދޮރު ހުޅުވާލިއެވެ. އެވަގުތު މަދީހާ އާއިއެކު ނައީމުވެސް ކޮޓަރިއަށް ވަނެވެ.
"ބައްޕަ އުއްމީދު މިކުރަނީ ދަރިފުޅަށް އުފާވެރި ހަޔާތެއް ހޯދާ ދެވުނުކަމަށް... ދަރިފުޅު ވާނެ ވަރަށް ރަނގަޅަށް އުޅެން... ފިރިމީހާއަށް ކިޔަމަންތެރިވާތި!... ކުދިކުދި ކަންކަން މައްސަލައަކަށް ނުހަދާތި!..." ނައީމު ނަސޭހަތްތެރިވިއެވެ.
ލިޝާއަށް ހާއްސަކުރެވިފައިވާ ގޮނޑީގައި އިށީންއިރުވެސް އޭނާ ހުރީ އިސްޖަހައިގެންނެވެ. މީހަކު ކައިރީގައި އިށީންކަމުގެ އިހުސާސާއިއެކު، ލިޝާއަށް އިސްއުފުލައިލެވުނީ ނުވިސްނާ އިނދެއެވެ. އަކްރަމްގެ ސޫރަ ފުރަތަމަ ފަހަރަށް ލިޝާއަށް ފެނުނީ އެވަގުތުއެވެ. އަކްރަމަކީ ޒުވާނެކެވެ. ހުތުރެއް ނޫނެވެ. ހަމުގެ ކުލަ ލިޝާއާއި ދާދި އެއްވަރެވެ. ހެޔޮވަރު އިސްކޮޅަކާއި، ހަށިގަނޑެއް ލިބިފައިވިއެވެ.
"ކިހިނެއްވީ؟...." އަކްރަމް ސުވާލުކުރިއެވެ.
"ކަ..ކަމެއް ނުވޭ..." ލިޝާ އަވަސްއަވަހަށް ބުނެލިއެވެ.
"އަހަރެން ތި ފެނުނީ އަލަށްތަ؟..." އަކްރަމް ލާނެތް ގޮތަކަށް ބުންޏެވެ.
ކައިވެނީގެ މަޖިލިސް ފެށުނެވެ. ލިޝާގެ ނުތަނަވަސްކަން އިތުރުވާންފެށީ، ކައިރީގައި އިން އަކްރަމްގެ ކުދި ގޯނާތައް ލިބެން ފެށުމުންނެވެ. ކަންފަތް ކައިރީގައި ސިއްރެއް ބުނެލައިފިއްޔާ، ގައިގެ ކޮންމެވެސް ތަނެއްގައި އަތް ޖައްސައިލައެވެ. އަދަބު އަހުލާގެއް ހުރިނަމަ، އެފަދަ ގޯނާތައް ކުރާކަށް ނުކެރޭނެއެވެ.
"އަނބި ގަބޫލުކޮށްފިން...." ފިކުރުތަކުގެ ތެރޭގައި އިން ލިޝާގެ އަތުގައި ހިފާލަމުން އަކްރަމް ބުންޏެވެ.
ބޭއިހުތިޔާރުގައި ލިޝާއަށް އޭނާގެ އަތް ދަމައިގަނެވުނެވެ. ހަޑި އެއްޗެއް ޖެހުމުން ދަމައިގަންނަ ފަދައިންނެވެ. ދެންވެސް އަކްރަމްގެ ގޯނާތަކެއް ނުހުއްޓުނެވެ. ލިޝާގެ އަތަށް އޮބައިލައެވެ. ފައިގެ ފަލަމަސްގަނޑުމަތީގައި އަތް ބާއްވައެވެ. ފެންކަޅިވަމުންދިޔަ ދެލޯ ފޮރުވުމަށް ލިޝާ އިސްޖަހައިލިއެވެ. ޝަފާޒާއިއެކު އެހާ ދުވަހު އެކީގައި އުޅުނުއިރުވެސް ލިޝާގެ ނުރުހުމުގައި ޝަފާޒު އޭނާގެ ގައިގައި އިނގިލިކުރިވެސް ޖައްސާލާފައިނުވެއެވެ. އަތުގައި ހިފާލުން ފިޔަވާ އިތުރުކަމެއް ނުކުރެއެވެ. އެ ތަފާތު ފެނުނީ އަކްރަމް އުޅެބޮޑުވި މާހައުލުގެ ސަބަބުން ހެއްޔެވެ؟ އެމީހުންނަށް އެފަދަ ކަންކަން އެއީ މާބޮޑު މައްސަލައަކަށް ނުވަނީ ހެއްޔެވެ؟ ލިޝާ މަސައްކަތްކުރީ، ކޮންމެ ކަމެއްވެސް "ޕޮޒިޓިވް"ކޮށް ވިސްނުމަށެވެ.
"ކީއްވެތަ ތިހާ ހާސްވެފަ ތީނީ؟... މިހާރު ތީ އަހަރެންގެ އަނބިމީހާއޭ..." އަކްރަމް ވައި އަޑުން ބުނެލިއެވެ.
ލިޝާ ނުވިސްނާ އިންދާ، އެންމެންގެ ތެރޭގައި އަކްރަމް ދެން ކޮށްލި ކަމަކުން އޭނާ ލަދުން މަރުވާވަރުވިއެވެ. އެންމެންގެ ތެރޭގައި އަކްރަމް ލިޝާގެ ކޯތާފަތަށް ބޮސްދިނީއެވެ. އެވަގުތުވީ، ޝަފާޒްވެސް ގޭތެރެއަށް ވަން ވަގުތަށެވެ. ފެނުނު މަންޒަރުން ޝަފާޒް ހުރީ ހަރަކާތް ހުއްޓިފައެވެ. ސުމާ ބުނިގޮތުންނަމަ، ލިޝާ ކައިވެނިކުރަނީ މަޖުބޫރުވެގެންނެވެ. އެކަމަކު، ޝަފާޒަށް ފެނުނު މަންޒަރުން ވިސްނުނީ، އަކްރަމާއި ލިޝާއާއި ދެދުގައި ލޯބީގެ ގުޅުމެއް އުފެދިފައިވާކަމެވެ. ޝަފާޒް އައީ ލިޝާއަށް ހިތް ސާފުކޮށް މައާފަށް އެދޭށެވެ. އެހެނަސް، ފެނުނު މަންޒަރުން އޭނާގެ ހިޔާލު ބަދަލުވިއެވެ.
ޝަފާޒް ގެއިން ނުކުންނަންދިޔަ މަންޒަރު ބަލަން ލިޝާ އިނީ ގޮތް ހުސްވެފައެވެ. ޝަފާޒްގެ ފަހަތުން ގޮސް ހުރިހާ ވާހަކައެއް ކިޔައިދޭން އޭނާ ބޭނުންވިއެވެ. އެކަމަކު މިހާރު އޭނާއަކީ އެހެން މީހެއްގެ ހައްގެކެވެ. ލިޝާގެ ހިތް ފޮތިފޮތިވަމުން ދިޔައެވެ. ދުނިޔޭގެ އެންމެންނަށް ފެނުނަސް އޭނާއަށް ވަރިހަމައެވެ. އެމަންޒަރު ޝަފާޒަށް ފެންނާކަށް އޭނާ ބޭނުމެއް ނުވެއެވެ.
"ޝަފް ވެއިޓް..." ޝަފާޒްގެ ފަހަތުން ދުވެފައި ނުކުތް ސުމާ ތަންކޮޅެއް ބާރަށް ގޮވައިލިއެވެ.
"މިހާރު އެނގިއްޖެ އޭނަ އަހަންނަށް ބޭވަފާތެރިވީކަން..." ޝަފާޒް ހުރީ ލިބުނު ދެރައާއި އެއްވަރަށް ހިތްހަމަނުޖެހިފައެވެ.
"ޝަފްއަށް ހަގީގަތް ނޭނގޭތީއޭ ތިހެން..." ސުމާ އެއްޗެއް ބުނަން އުޅުނު ނަމަވެސް ޝަފާޒް އެވާހަކަ ހުއްޓުވިއެވެ.
"ހަގީގަތް އެނގުނަސް ކުރެވޭނެ ކަމެއް އެބައޮތްތަ؟... އޭނަ... ސުމާއަށް ނުފެންނަނީތަ؟...." ޝަފާޒް ހިފަހައްޓައިގެން ހުރި ކަރުނަތައް ކޯތާފަތް މައްޗަށް ފޭބުމާއިއެކު އަވަސް އަވަހަށް ފޮހެލިއެވެ.
ކައިވެނީގެ މަޖިލިސް ނިމުމާއިއެކު، އަކްރަމްގެ މައިންބަފައިން ބޭނުންވީ އެރެއިން އެރެއަށް މާލެދާން ފުރުމަށެވެ. އަންހެންކުއްޖާގެ މައިންބަފައިންނާއި ވާހަކަ ދައްކާލުންވެސް އެމީހުންނަށް މުހިއްމެއް ނުވިއެވެ. ލިޝާގެ ކައިރީގައި ފޮށްޓަށް އެއްޗެހި އަޅަން އެދެފައި އަކްރަމް ބޭރަށް ނުކުތެވެ. މަދީހާ ނުކުތްއިރު، އަކްރަމް ހުރީ ބޭރުގައި ސިނގިރޭޓް ބޯށެވެ. މުޅި ތަނުގައި ދުމުގެ އަސަރެވެ. އޭގެ ނުބައި ވަހުން މަދީހާގެ ބޮލަށް އެނބުރުން އަރައިގަތެވެ. ބޭރަށް ނުކުތް ބާރުމިނުގައި މަދީހާ އެތެރެއަށް ވަނެވެ. ނޭވާހިއްލާ ބަލި ހުންނާތީ، ދުމުގެ ސަބަބުން މަދީހާ ކޮށިއަރާ ކެއްސަން ފަށައެވެ.
"އަހަރެން ހިތަށް އަރާ ވިޔަފާރި ސަލާމަތްކުރަންވެސް މިކުރެވުނީ ރަނގަޅުކަމެއް ބާއޭ..." ކޮޓަރިއަށް ވަންގޮތަށް މަދީހާ ނައީމާއި ކުރިމަތިލިއެވެ.
"ކީއްވެ ތިހެން ތިބުނީ؟..." ނައީމުގެ ސަމާލުކަން މަދީހާއަށް ހުއްޓުނެވެ.
"ނުފެނޭތަ އެމީހުން އުޅުނުގޮތެއް؟..." މަދީހާ ހިތްހަމަނުޖެހިފައި ބުންޏެވެ. "އެ އަކްރަމެއް ސިނގިރޭޓުވެސް ބޮއޭ..."
"މަދީހާ!... އިންސާނުންގެ ހުރިހާ ކަމެއް ފުރިހަމައެއް ނުވާނެއޭ... ފިރިމީހާގެ ހުންނަ ގޯސް ކަންކަން ރަނގަޅު ކުރާނީ އަނބިމީހާއޭ... އަހަރެން ލިޝާއަށް އިތުބާރުކުރަން... އެހެންނޫނަސް، އެމީހުން ކިހާ ރަނގަޅު... ކައިވެންޏާ އެކީ މިއޮތީ ވިޔަފާރީގެ އެއްބަސްވުންވެސް ދީފަ... ފައިސާވެސް އެހުރީ ޑޮލަރުން..." ނައީމަށް ފެންނަމުންދިޔައީ ދުނިޔޭގެ އެދުމެވެ. އެއީ ކުރިން ނައީމު ވިސްނިގޮތެއް ނޫނެވެ. އަބަދުވެސް ދަރިފުޅު އިސްކުރާ ނައީމު މިއަދު އިސްކުރީ ފައިސާއާއި މުދަލެވެ.
މަދީހާއަށް ބޯ ހޫރައިލެވުނެވެ. ދަރިފުޅުދެކެ އިންތިހާއަށް ލޯބިވާ ނައީމަށް މިއަދު ވެފައި އެހުރީ ކިހިނެއް ހެއްޔެވެ؟ ދަރިފުޅުގެ މޫނުން ފެނުނު ނުތަނަވަސްކަން މަދީހާއަށް ސިއްރުނުވިއިރު، އެމަންޒަރު ނައީމަށް ނުފެނުނީ ކީއްވެ ހެއްޔެވެ؟ އަކްރަމްގެ އުޅުމާއި މިޒާޖު މަދީހާއަށް ކަމުނުދާއިރު، ނައީމަށް ކަމުދިޔައީ ކީއްވެ ހެއްޔެވެ؟
*******
"ސަރ!..." ވެރިމީހާގެ ކެބިންގެ ދޮރު ހުޅުވާފައި އެތެރެއަށް ވަންއިރު ސަޗިންގެ މޫނުން ހަމަޖެހުމުގެ އަސަރު ފެންނަން ހުއްޓެވެ.
"ހުރިހާ ކަމެއްވެސް ބޭނުންވިގޮތަށް ނިމިއްޖެ..." ޓެބްލެޓްގެ އިސްކްރީނުން ތަސްވީރެއް ދައްކައިލަމުން ސަޗިން ބުންޏެވެ.
ޓެބްލެޓުގައި ހިފިއިރު، ޒުވާނާގެ ތުންފަތުގައި ވަނީ ލުއި ހިނިތުންވުމެކެވެ. ތަސްވީރުން ފެންނަމުންދިޔައީ ކައިވެނީގެ ހެދުމުގައި އިން އަންހެންކުއްޖެކެވެ. އެކުއްޖާއަށް ބަލަން އިންއިރު، ނަފުރަތުގެ ހުޅުގަނޑު ޒުވާނާގެ ހިތުގައި ރޯވެ އަނދަމުން ދަނީއެވެ. އެ އަންހެންކުއްޖާގެ މޫނުން ފެންނަމުންދިޔަ މާޔޫސްކަން ފެނި ޒުވާނާގެ ހިތަށް އުނދަގޫގޮތެއްވިއެވެ. އެހެނަސް ހަމަ އެ ސިކުންތުގައި އޭނާ ފާޑަކަށް ހިނިތުންވެލިއެވެ. ޒުވާނާގެ ދެލޮލުގައި ކަރުނައިގެ އަސަރު ވިނަމަވެސް، އެ ކަރުނައިގެ ފަހަތުގައި ނަފުރަތު ނޫން އެއްޗެއް ނުވެއެވެ.
"އަހަރެންގެ ޕްލޭނާ ހިލާފަށް އެއްވެސް ކަމެއް ހިނގިޔަދީގެން ނުވާނެ!... ފިޒިކަލީ އެއްވެސް އަނިޔާއެއް އޭނައަށް ލިބިގެން ނުވާނެ!.. އެމީހުންނަށް އެކަން ހަނދާންކޮށްދޭތި!... ކޮންއިރަކު އެމީހުން މިކޮޅަށް އަންނަ ފްލައިޓް އޮތީ؟..." ޓެބްލެޓް އަނބުރާ ސަޗިންގެ އަތަށް ދެމުން ޒުވާނާ ސުވާލުކުރިއެވެ.
"އަދި ޓިކެޓު ހަމައެއް ނުޖެހޭ..." ސަޗިން ޖަވާބު ދިނެވެ. "އަޅުގަނޑު ހުރިހާ ކަމެއް ހަމަޖައްސާނަން..."
ކެބިންގެ ދޮރުގައި ޓަކި ޖަހައިލި އަޑު އިވުނެވެ. އެތެރެއަށް ވަނުމުގެ ހުއްދަ ލިބުމުން އެމީހަކު ދޮރު ހުޅުވައިލިއެވެ. ކުޑަކުޑަކޮށް އެތެރެއަށް ބޯ ދިއްކޮށް ބަލައިލުމަށްފަހު، އަތުގައި އޮތް ދަބަހުން މޫނު ފޮރުވަމުން އޭނާ އެތެރެއަށް ވަނެވެ.
"ކާކު؟..." ޒުވާނާ އޭނާގެ ފިރިހެންވަންތަ ބަރު އަޑުން ސުވާލުކުރިއެވެ.
"ހޭއި... އާރިޒް!..." ކުއްލިއަކަށް މޫނުން ދަބަސް ނަގަމުން އެތެރެއަށް ވަން ޒުވާނާ ބުނެލިއެވެ. އާރިޒް ފެނުމުން އޭނާ ހަލުވި ފިޔަވަޅުތަކެއްގައި ގޮސް ބައްދައިލިއެވެ.
"މާނަވް؟... ކަލޭ ކޮންއިރަކު މިކޮޅަށް އައީ؟..." މާނަވްގެ ކޮނޑުގައި ޖަހައިލަމުން އާރިޒް ބުންޏެވެ. ކުއްލިއަކަށް މާނަވް ފެނުމުން އާރިޒަށް ގަބޫލުކުރަން ދަތިވިއެވެ. ލިބުނު އުފަލަކުން، ދެމީހުންނަށްވެސް ހިނިތުންވެލެވުނީ އެއްފަހަރާއެވެ.
ތައުލީމު ހާސިލުކުރަން މާނަވް މެލޭޝިޔާއަށް ދިޔަފަހުން، ދެ އެކުވެރިން ބައްދަލުވީ ވިހި އަހަރު ފަހުންނެވެ. އެހެނަސް، އެ ދެމެދުގައި އޮތް ގާތް ގުޅުމަކަށް ބަދަލެއް ނާދެއެވެ.
"ސަޕްރައިޒްއެކޭ... އެއާޕޯޓުން އައިގޮތަށް މިތަނަށް..." މާނަވް ތަފްސީލް ދިނެވެ. ދެމީހުންވެސް ވާހަކަ ދެއްކީ އިނގިރޭސިންނެވެ.
"މިކޮޅަށް ނާންނާނަމޭ ކިޔާފަ ތިއައީޔޯ؟..." އާރިޒް ދިމާކުރިއެވެ. "މަންޖެ ކެޓީ؟..."
"އަންނަހިތެއް ނުވާނެއެއްނު މިހާ ކްރައުޑް ތާކަށް.... ޓްރެފިކް އެހާ ބޮޑު..." ދެފަރާތަށް ބޯ ހޫރައިލަމުން މާނަވް ބުންޏެވެ. "ހުރިހާ ބިޓުންކޮޅުވެސް ތިބީ އެކޮޅުގަ..."
"މީ އިންޑިޔާއޭ، އިންޑިޔާ...." މާނަވްގެ ކޮނޑުގައި ޖަހައިލަމުން އާރިޒް ބުނެލިއެވެ.
"އަމިއްލަ ގައުމަކަސް މީ މީހަކު އުޅޭކަހަލަ ތަނެއް ނޫން..." ފޫހި ވައްތަރެއް މޫނަށް ޖައްސައިލަމުން މާނަވް ބުންޏެވެ. "ނެތްތަ ކާއެއްޗެއް؟... ހާދަ ބަނޑުހައޭ...."
"ސަޗިން!... ކެއުން ތައްޔާރުކުރަން ބުނޭ..." އާރިޒް އެދުނެވެ. "މިއަދު ކާންވާނީ ގެއިން... ބައްޕަ ވަރަށް އުފާވާނެ މާން ފެނުނީމަ..."
ދެމީހުން އެކުގައި ގޮސް ސޯފާގައި އިށީނެވެ. އެކަކު އަނެކެއްގެ ދިރިއުޅުމުގެ ވާހަކަތައް އެނގޭހިތުން ދެމީހުންވެސް ތިބީ ކެތްމަދުވެފައެވެ.
"ކޮބާ ބައްޕަ؟... ހުރިހާ ކަމެއް ރަނގަޅުތަ؟..." މާނަވް އަހައިލިއެވެ.
"ބައްޕަދޯ؟..." އާރިޒް ދޫކޮށްލީ ފުން ނޭވާއެކެވެ. "ބަލިކޮށް އުޅެނީ...."
"އާންޓް ނެތީމަ ބައްޕަ އެކަނިވާނެވަރު އިހުސާސްކުރެވޭ..." މާނަވް އިސްޖަހައިލިއެވެ. "އައި މިސް ހާ..."
އާރިޒްގެ ދެލޮލަށް ކަރުނަ ޖަމާވާން އުޅުނެވެ. އެހެނަސް، ހަމަ އެ ސިކުންތުގައި ހަމަޖެހިލަމުން މާނަވްގެ ދަތުރާއި ބެހޭގޮތުން ސުވާލުކުރަން ފެށިއެވެ.
********
ދިގު ދަތުރަކަށްފަހު، ލޯންޗު މާލޭގެ ފަޅުތެރެއަށް ވަނެވެ. ފަތިހުގެ ފިނި ވައިރޯޅި ބީހިލުމުން ލިޝާ ހީކަރުވައިގަތެވެ. ލޯންޗު ކައިރިކުރިއިރު، ޖެޓީ ކައިރީގައި ކާރެއް އޮތެވެ. ޑްރައިވަރު ކާރުން ފައިބައިގެން އައިސް ލޯންޗުން މީހުން ފޭބުމަށް އެހީތެރިވެދިނެވެ. ފޮށިތައް ބޭލުމުން ކާރަށް ފޮށިތައް އެރުވީވެސް ޑްރައިވަރެވެ.
(ނުނިމޭ)