06 Jan 2024, 11:30
﷽
ރަށުގެ ބޮޑު މިސްކިތުން ފަތިސްނަމާދު ނިންމާ ސަލާން ދިން އަޑު އިވުނެވެ. މުސައްލަ މަތީގައި އިން ލިޝާ ދުޢާކޮށް ނިންމާފައި މޫނުގައި އަތް އެޅިއެވެ. މިއަދަކީ ބޮޑު ދުވަހެކެވެ. ލިޝާގެ ހަޔާތުގެ އެންމެ ބޮޑު އެއް ނިންމުން އަމިއްލަ މައިންބަފައިންނާއި ހިއްސާކުރަން ތައްޔާރުވި ދުވަހެވެ. މުސައްލައާއި ނަމާދުދޮޅި ކަބަޑަށް ލާފައި ލިޝާ ހުއްޓުނީ ރީތިވާމޭޒު ކައިރީގައެވެ. ގިނައިރެއްނުވެ، އެނދުމަތީގައި އޮތް ފޯނު ރިންގުވާން ފެށިއެވެ. ގުޅީ ކާކުކަން އެނގޭ ފަދައިން ލިޝާ ފޯނަށް ނަޒަރު ހުއްޓައިލިއެވެ.
"ރެޑީ؟..." ފޯނުގެ އަނެއްކޮޅުން އިވުނީ ޝަފާޒުގެ އަޑެވެ. ޝަފާޒަކީ ލިޝާގެ ލޯބިވެރިޔާއެވެ. "މަންމަ ކައިރީ ބުނީތަ؟... ބުނީތަ؟..."
"ޝަފް ހާދަ ކެތްތެރިކަން ކުޑައޭ..." ލިޝާ ޖަހައިލީ ލުއި ހިނިގަނޑެކެވެ.
ދެމީހުން ލޯބީގެގޮތުން ގުޅިގެން އުޅޭތާ އަހަރުވާން ގާތްވީއިރުވެސް، އެ ގުޅުން އޮތީ ސިއްރެއްގެ ގޮތުގައެވެ. އެކަކު އަނެކަކު ދަސްވެ، ކައިވެންޏާއި ހަމައަށް ދިޔުމުގެ ކުރިން އެ ގުޅުން ހާމަކުރަން ލިޝާ ބޭނުންނުވީއެވެ.
"އެނގެއެއްނު އަހަރެން ލޯބިވާވަރު... ކެތްތެރިކަން ކުޑަވަނީވެސް ލިޝް ބޭނުންވާލެއް ބޮޑުކަމުންނޭ..." އަކުރުތަކަށް ދަމާލަމުން ޝަފާޒް ބުނެލިއެވެ. "ލިޝް މަންމައާ ވާހަކަ ދައްކާހާ އަވަހަށް އަހަރެން ތިގެއަށް ދާނަން... މަންމަ ރުއްސާނަން..."
ކޮޓަރިން ނުކުތްއިރުވެސް ލިޝާ ހުރީ ފޯނުގައެވެ. ޝަފާޒާއި ސަމާސާކޮށް ވާހަކަ ދައްކާލެވުމުން، ލިޝާގެ ދުވަސް އުޖާލާވެއެވެ. އެއީ ކޮންމެ ދުވަހެއްގެ އާދައެވެ. އެކަކު އަނެކަކާއި ވާހަކަ ދައްކާލަން ލިބޭ މަދު ވަގުތުކޮޅު އަވަހަށް ނިމޭކަށް އެކަކުވެސް ނޭދެއެވެ. ކޮންމެ ދުވަހަކު ލިޝާ ކުނިކަހާ ނިމެންދެން ޝަފާޒް ފޯނުގައި ހުރެއެވެ.
"މަންމަމެން ކޮބާ؟..." ޝަފާޒް އަހައިލިއެވެ.
ލިޝާގެ ފިޔަވަޅުތައް ހުއްޓުނީ އޭނާގެ މަންމަގެ ކޮޓަރިއާއި ހަމައިންނެވެ. ކުޑަކޮށް ހުޅުވިފައިވާ ކޮޓަރީގެ އެތެރެއިން އޭނާއަށް އިވުނީ އަޑުއަހަން ބޭނުންވާފަދަ ވާހަކައެއް ނޫނެވެ. މަންމައާއި ބައްޕަގެ ނުތަނަވަސް އަޑުން އެކަނިވެސް ލިޝާގެ މުޅި ގައިން ހީބިހި ނަގައިގެން ދިޔައެވެ.
"އެބަ ގުޅަން..." ލިޝާ އަވަސްއަވަހަށް ފޯނު ކަނޑާލިއެވެ.
"ނައީމް ތިވަރުގެ ނިންމުމެއް ނިންމިއިރު، ލިޝާއާ ވާހަކަވެސް ދައްކާނުލަންތަ؟..." މަދީހާ ހުރީ ހިތްހަމަނުޖެހިފައެވެ.
"މަދީހާ ބުނެބަލަ... އަހަރެމެންނަށް އިތުރުގޮތެއް އެބަ އޮތްތަ؟..." ނައީމުވެސް ކުރީ ސުވާލެކެވެ. "ވިޔަފާރި ބަނގުރޫޓުވާން ދޫކޮށްލެވޭނެ؟..."
"އެކަމަކު..." މަދީހާއަށް ބުނާނެ އެއްޗެއް ނޭނގުނެވެ. "ލިޝާ ތި ކައިވެންޏަށް ގަބޫލުނުވެއްޖެއްޔާ؟..."
"ކީއްވެ ނުވާންވީ؟... މާލޭގެ ބޮޑު ވިޔަފާރިވެރިއެއްގެ ދަރިއެއް އެއީ... އޭނަގެ ސަބަބުން އަހަރެމެންގެ ވިޔަފާރި އެކަންޏެއް ނޫނޭ ކުރިއަރާނީ... ލިޝާއަށްވެސް މުއްސަނދި ދިރިއުޅުމެއް ހޯދާދެވުނީނު... މާހިރުވެސް ބުނި އެއީ ވަރަށް ރަނގަޅު ބައެކޭ..." ނައީމު އިތުރު ތަފްސީލް ދިނެވެ.
"މާހިރަށް ކޯއްޗެއްތަ އެނގޭނީ؟..." މަދީހާ އެނދުގައި އިށީނެވެ. "އަހަރެމެން ދުވަހަކު ދެކުނުވެސް ބައެއް ނޫން އެއީ... މާހިރަކީވެސް ރަށުގަ ހުންނަ މީހެއް..."
"މަދީހާގެ ތި ވިސްނުން ދޫކޮށްލަންވެއްޖެ.... ކައިވެންޏަށް ސީދާ އެމީހުން މިކޮޅަށް އެ އަންނަނީ... ގޯސް ބައެއްނަމަ، އަހަރެމެން ދޯ ގެންދާނީ..." ނައީމު ހުރީ ދޫކުރާ ގޮތަކަށް ނޫނެވެ.
ލިޝާއަށް ހުރެވުނު ތަންވެސް ނޭނގުނެވެ. އަތުން ފޯނު ދޫނުވީ ކިރިޔާއެވެ. ހުއްޓުން އަރާފައި ހުރިއިރު، އިތުރަށް ކޮޓަރީގައި ދެއްކި އެއްވެސް ވާހަކައަކަށް އޭނާއަކަށް ސަމާލުކަމެއް ނުދެވުނެވެ.
"މާދަމާ އެމީހުން މިކޮޅަށް އަންނާނެ... މިއަދު ކޮންމެހެންވެސް ލިޝާއާ ވާހަކަ ދައްކާލާތި!..." ކޮޓަރިން ނުކުތުމަށް ހިނގައިގަންނަމުން ނައީމު ބުންޏެވެ.
********
ކަޅުކުލައިގެ އޮފު ކާރު އައިސް ހުއްޓައިލީ ފަންސަވީސްބުރީގެ އުސް އިމާރާތުގެ ކުރިމައްޗަށެވެ. ޑްރައިވަރާއި ޖެހިގެން އިން ޝީޓުގައި އިން މީހާ ކާރުން ފައިބައިގެން އައިސް، ފަހަތުޝީޓުގެ ދޮރު ހުޅުވައިލިއެވެ. ކާރުން ފޭބީ ޒުވާން ފިރިހެނެކެވެ. ކޯޓު ފަޓުލޫނުގައި ހުރިއިރު، އޭނާގެ ހައިބަތާއި އެއްވަރަށް، ކަސްރަތީ ހަށިގަނޑުގެ ރީތިކަން ހާމަވާން ހުއްޓެވެ. ބައިމަތި ފުޅާ ހަށިގަނޑާއި ދިގު އިސްކޮޅު ޒުވާނާއާއި ނުހަނު ގުޅެއެވެ.
"ސަޗިން!... ކޮބާ އަޕްޓޭޑަކީ؟..." ޒުވާނާ ވާހަކަ ދެއްކީ އިނގިރޭސިންނެވެ. އޭނާ ސުވާލުކުރީ ކައިރީގައި ހުރި އޭނާގެ ސެކްރެޓެރީއަށެވެ.
"ހުރިހާ ކަމެއްވެސް ދަނީ ޕްލޭނާ އެއްގޮތަށް..." ސަޗިން ތަފްސީލް ދިނެވެ.
ގްރީން ގާޑެން ހޮޓެލްއަށް ވަންނަ ދޮރުގެ ދެފަރާތުގައި ތިބި ގާޑުން އިސްތިރިކޮށް ޒުވާނާއަށް މަރުހަބާ ކިޔެވެ. އެތެރެއަށް ވަނުމަށް ބޮޑު ބިއްލޫރި ދޮރު ހުޅުވައިދިނެވެ. އިމާރާތް ބޭރުން ފެންނަ ފެނުމަށް ވައްތަރީ ބޮޑު އޮފީހަކާއެވެ. އެހެނަސް އެއީ، ފަސްތަރީގެ އަގުބޮޑު ލަގްޒަރީ ހޮޓަލެކެވެ. ގައުމުތަކުގެ އިސްވެރިންނާއި، މުއްސަނދިން އައިސް މަޑުކުރާ މަދު ހޮޓާތަކުގެ ތެރޭގައި ގްރީން ގާޑެން ހޮޓެލް ހިމެނެއެވެ. އިމާރާތުގެ ހާއްސަކަމަކީ، ތަނުގެ ހިތްގައިމު މާހައުލެވެ. ބަލައިލި ކޮންމެ ދިމާއަކުންވެސް ގުދުރަތީ ރީތިކަން ފެނިގެންދާވަރަށް ތަނުގައި ގަސް ޕޮޓު ބަހައްޓާ ފެހިކޮށްފައި ހުއްޓެވެ. ކޮޓަރިތަކުގެ ބެލްކަނިތަކުން ފެންނަމުން ދަނީ އުސްފަރުބަދަތަކެވެ. އިމާރާތުގެ ގްރައުންޑް ފްލޯގައި މެހެމާނުން މަޑުކޮށްލައިގެން ތިބޭ ބަޔަކާއި، ރެސްޓޯރެންޓެއް ހުރެއެވެ.
"މިއަދު ޗައިނާގެ މިނިސްޓަރަކު ވަޑައިގަންނަވާ... ޕްރައިވެޓް މީޓިންއެއް ސެޓުކުރަން ވިދާޅުވި..." އެތެރެއަށް ވަންނަމުން ސަޗިން ތަފްސީލް ދެމުން ދިޔައެވެ.
"އިތުރު ކަމެއް އެބައޮތް؟..." ޒުވާނާ ސުވާލުކުރިއެވެ.
ޒުވާނާ ފެނުމުން، ތަނުގައި ހޭލަމޭލަވަމުންދިޔަ މުވައްޒަފުން އިހުތިރާމް އަދާކުރުމަށް އިސްޖަހައިލައެވެ. ރިސެޕްޝަނުގައި ދެތިން އަންހެންކުދިން ތިއްބެވެ. ސާހިބު މީހާއަށް ދުވަހުގެ ސަލާން ކިޔެވެ. އެތަނުން އެއްކުއްޖަކު، ކުޑަކޮށް ދުވެލާފައި ކަހަލަ ގޮތަކަށް ގޮސް ލިފްޓްގެ ދޮރު ހުޅުވައިދިނެވެ.
"އެމީހުންނަށް އެކޮޅަށް ދެވިއްޖެތަ؟..." ލިފްޓްގެ ދޮރު ލެއްޕުމުން ޒުވާނާ ސުވާލުކުރިއެވެ.
"ލައްބަ... ފަތިހު ފްލައިޓް ލޭންޑް ކުރީ..." ސަޗިން ޖަވާބުދިނެވެ.
"ހުރިހާ ކަމެއްވެސް ދާންވާނީ އަހަރެންގެ ޕްލޭނާ އެއްގޮތަށް... ކޮންމެ ދުވަހަކު އަހަންނަށް އަޕްޓޭޑް ދޭންވާނެ..." ޒުވާނާ ވާހަކަދެއްކީ އަތުގައި އޮތް ޓެބްލެޓުގެ އިސްކްރީނަށް ބަލަމުންނެވެ.
"ލައްބަ..." އިހުތިރާމާއިއެކު ސަޗިން ޖަވާބުދިނެވެ. "ކޮންއިރަކުތޯ އެކޮޅަށް ދުރުވަނީ؟..."
"ސަޗިން!..." ޓެބްލެޓުން ނަޒަރު ވަކިކޮށް، ސަޗިންއަށް ބަލައިލަމުން ޒުވާނާ ގޮވައިލީ ގާތް ގޮތަކަށެވެ. "ސަޗިން ތީ އަހަރެންގެ ސެކްރެޓަރީ... ތީ އަހަރެންގެ މުވައްޒަފެއް... މުސާރަ ދެނީ އަހަރެން... އެހެންވީމަ، ބައްޕައަށް މީން އެއްވެސް ކަމެއް އެނގިގެންނުވާނެ...."
"ލައްބަ... އަޅުގަނޑަށް އިތުބާރުކުރައްވާ!..." ސަޗިން އަވަސް އަވަހަށް ބުނެލިއެވެ.
ލިފްޓްގެ ދޮރު ހުޅުވުނެވެ. ސަޗިންގެ ކޮނޑުގައި މަޑުމަޑުން ޖަހައިލާފައި ޒުވާނާ ލިފްޓުން ނުކުތެވެ. ސަޗިން ހުރީ ހުއްޓުންއަރާފައެވެ. އޭގެ ކުރިން ދުވަހަކުވެސް އޭނާގެ ވެރިމީހާގެ ފަރާތުން އެފަދަ ގާތްކަމެއް ފެނިފައިނުވާތީއެވެ.
ކެބިންއަށް ވަދެވުމާއިއެކު، ޒުވާނާ ގޮސް ގޮނޑިއަށް ވެއްޓިގަތެވެ. އޭނާގެ ނަޒަރު ގޮސް ހުއްޓުނީ، މޭޒުމަތީގައި ބައިންދާފައިވާ ފޮޓޯފްރޭމަށެވެ. އަންހެނަކާއިއެކު ދިހަވަރަކަށް އަހަރުގެ ފިރިހެންކުއްޖަކު ނަގާފައިވާ އެ ތަސްވީރުގައި، ދެމީހުންގެ ތުންފަތުގައިވެސް ވީ ފުޅާ ހިނިތުންވުމެކެވެ. ތަސްވީރަށް ބަލަން އިން ޒުވާނާގެ މޫނުން އުފާވެރިކަމެއް ނުފެނުނެވެ. ތަސްވީރުގައިވާ އަންހެންމީހާގެ ގައިގައި އޭނާ އަތް ޖައްސައިލިއެވެ. މޫނުގައި ފިރުމައިލީ ނުހަނު ލޯބިންނެވެ. ޒުވާނާ ހިންދިރުވައިލީ އުނދަގޫގޮތަކަށެވެ. ތަސްވީރު އަނބުރާ އިންތަނުގައި ބައިންދާފައި އޭނާ ގޮނޑީގައި ހަމަޖެހިލިއެވެ.
"އަހަރެން އިންސާފު ހޯދާނަން..." ރިހުން އެކުލެވޭ އަޑަކުން ޒުވާނާ މަޑުމަޑުން ބުނެލިއެވެ.
********
އިރު ފެނުން ތޮޅެލި މަންޒަރު ހިތްގައިމެވެ. އަނދިރިކަމުގެ މައްޗަށް އަލިކަން ގަދަވެގަންނާކަށް ގިނައިރެއް ނުނެގިއެވެ. އިރުގެ ދޯދިތަކުން މާހައުލު އަލިކޮށްދިނެވެ. އެ ހުރިހާ ކަމެއް ހިނގައިދިޔައިރުވެސް ލިޝާ ހުރީ އަތިރިމަތީގައެވެ. އިރުއަރާ މަންޒަރު ބެލުމަކީ އޭގެ ކުރިން ލިޝާ ކުރާހިތްވި ކަމެއް ނޫނެވެ. ދުވަހުގެ ފެށުން އުޖާލާވާނެކަމަށް މީހުން ބުނި ނަމަވެސް، ލިޝާއަށް އުފާވެރި އިހުސާސެއް ނުކުރެވުނެވެ. ހިތްހަމަޖެހުމެއް ނުލިބުނެވެ. އެހެން ދުވަސްދުވަހު ލިޝާގެ ތުންފަތްމަތީގައި ނުފިލާ ހުންނަ ހިނިތުން މިއަދު ވަނީ ގެއްލިފައެވެ.
"ކީއްވެ މިތަނަށް އަންނަން ބުނީ؟... މިހާ ހެނދުނާ...." ފަހަތުން ޝަފާޒްގެ އަޑު އިވުމުން، ލިޝާއަށް ތެޅިގަނެވުނެވެ. "ހާދަ ވަރަކަށް ސިހުނީ؟... ހުރިހާ ކަމެއް އޯކޭތަ؟..."
ލިޝާ ބޯ ޖަހައިލި އިރުވެސް ހުރީ އިސްޖަހައިގެންނެވެ.
"އަހަރެން މިއުޅެނީ މީހަކާ އިންނަން..." އިސްއުފުލައިލުމެއްނެތި ލިޝާ ބުންޏެވެ.
"މިހާރު ތިކަހަލަ ސަމާސާވެސް ކުރަންފެށީތަ؟..." ޝަފާޒް ހީގަތެވެ. "މަންމަ އެއްބަސްވީތަ؟..."
ލިޝާއަށް ބުނާނެ އިތުރު އެއްޗެއް ނޭނގުނެވެ. އޭނާ ޝަފާޒްދެކެ ވަނީ ތެދުވެރި ލޯތްބެވެ. ކުށެއްނެތި، ޝަފާޒްގެ ހިތް ހަލާކުކޮށްލަން އޭނާއަކަށް ފަސޭހައެއް ނުވިއެވެ.
"އަހަރެން އިންނަން ބޭނުންވަނީ މާލޭ މީހަކާ..." ލިޝާ އިސްއުފުލައިލިއެވެ. ޝަފާޒަށް ބަލައިލި ނަމަވެސް، ހިތްވަރު ނުލިބިގެން ހަމަ އެހާ އަވަހަށް އެހެން ދިމާއަކަށް ނަޒަރު ހުއްޓައިލިއެވެ.
"އެހެންތަ؟... އަވަހަށް މާލެއަށް ރަށްވެހިކަން ބަދަލުކުރަންވީދޯ؟..." ޝަފާޒްގެ ލާނެތްކަމެއް ނުކެނޑުނެވެ. "ކޮންމެގޮތެއް ހަދައިގެންވެސް ލިޝްއާ މެރީކުރަން އަހަރެން ބޭނުމޭ... ދެން ބުނެބަލަ، ކޮންއިރަކުންތަ މަށާ އިންނާނީ؟..."
"އަހަންނަކަށް ނެތް ތިކައިވެނި ކުރެވޭކަށް..." ހިތް ކުދިކުދިވަމުންދިޔަ ހާލުގައިވެސް ކެތްތެރިވަމުން ލިޝާ ވާހަކަ ދެއްކިއެވެ. "ލެޓްސް ބްރޭކްއަޕް..."
"ލިޝް... ކިހިނެއްތަ ވީ ކުއްލިއަކަށް... މަންމަ ގަބޫލުނުވީތަ؟..." ޝަފާޒްގެ މޫނުން ހާސްކަން ފެނިގެން ދިޔައެވެ.
"އަހަރެން މިއުޅެނީ އެހެން މީހަކާ އިންނާށޭ... އަހަރެން މަތިން ހަނދާންނައްތާލާ!...." ހަރުކަށިކަން އަޑަށް ގެންނަމުން ވާހަކަ ދެއްކި ނަމަވެސް، ލިޝާގެ އަޑުގައިވި ރިހުން، ޝަފާޒަކަށް ސިއްރެއް ނުވިއެވެ.
"ލިޝް، ހަމަޖެހިބަލަ... އިހަށް އާދެބަލަ މިތާ އިށީންނަން...." ޝަފާޒް ކަންބޮޑުވާން ފެށިއެވެ. ލިޝާ ސަމާސާ ކުރަނީ ނޫންކަން އެނގުނެވެ. ލިޝާގެ އަތުގައި އޭނާއަށް ހިފައިލެވުނީ އަމިއްލަ އިހުތިޔާރެއް ނެތިއެވެ.
"އައި އޭމް ސޮރީ ޝަފް..." ޝަފާޒްގެ އަތް ފޮޅުވައިލުމަށްފަހު ލިޝާ އެތަނުން ދިޔުމަށް ދުއްވައިގަތެވެ.
ލިޝާ ގޮސް ލޮލުގެ ކޮޅަށް އޮބާލަންދެންވެސް ޝަފާޒް ހުރީ ހުއްޓުން އަރާފައެވެ. ކުއްލިއަކަށް އޭނާގެ އުފާވެރިކަން ނިމިގެންދިޔައީ ކީއްވެ ހެއްޔެވެ؟ އެއީ އޭނާ ކުޑަކޮށްވެސް އުއްމީދުކުރި ގޮތެއް ނޫނެވެ. ލިޝާއާއި ވަކިން އުޅޭނޭގޮތެއް އަމުދުން އޭނާއަށް ނޭނގެއެވެ.
ލިޝާގެ ކައިވެނި އިއުލާންކުރެވިގެން ދިޔައީ އެންމެންވެސް ހީކުރި ވަރަށްވުރެ އަވަހަށެވެ. ރަށުތެރޭގައި ފާޑުފާޑުގެ ވާހަކަތައް ދެކެވުނެވެ. މަދީހާވެސް ހުރީ ޝޮކެއްގައެވެ. އެހާ އަވަސްއަރުވާލައިގެން ދަރިފުޅުގެ ކައިވެނިކޮށް ނިންމާކަށް މަދީހާ ތައްޔާރެއް ނޫނެވެ. އެހެނަސް، ނައީމުގެ އެދުމާއި ދެކޮޅު ނުހަދަން އޭނާ ހިމޭނުން ހުރީއެވެ. އެންމެ ބޮޑު އަސަރެއް ކުރީ ލިޝާއަށެވެ. އެއީ ލިޝާ އުއްމީދުކޮށްގެން ހުރި ގޮތެއް ނޫނެވެ. މަންމަމެން އެފަދަ ނިންމުމެއް ނިންމީތީ ލިޝާގެ ހިތުގައި ޝަކުވާ އުފެދުނެވެ. އެހެނަސް، ޝަކުވާތައް ހިންދާލައިގެން އޭނާ ހުރީ މަންމަމެންގެ އުފަލަށްޓަކައެވެ. އެމީހުންވި ގުރުބާނީގެ އަގު އަދާކުރުމަށެވެ.
ގޯތިތެރޭގައި އޮތް ޖޯއްޔެއްގައި ލިޝާ އޮތީ ފިކުރުތަކެއްގެ ތެރެއަށް ގެއްލިފައެވެ. ކައިވެންޏަށްފަހު ދެންވާނީ ކިހިނެއް ހެއްޔެވެ؟ ޝަފާޒާއި ވަކީން އޭނާއަށް އުޅެވިދާނޭ ހެއްޔެވެ؟ ފިރިމީހާދެކެ ލޯބިވެވިދާނެ ހެއްޔެވެ؟ ލިޝާގެ ކޮނޑުމަތީ މީހަކު އަތް ބާއްވާލުމާއިއެކު ސިހުނެވެ. ފަސްއެނބުރި ބަލާލިއިރު ހުރީ ސުމާއެވެ. ސުމާއަކީ ލިޝާގެ އެންމެގާތް އެކުވެރިޔާއެވެ. ސުމާ ފެނުމާއިއެކު ލިޝާ ހިފަހައްޓައިގެން އޮތް ކަރުނަތައް އޭގެ މަގާމް ދޫކޮށް ކޯތާފަތް މައްޗަށް އޮހިގަތެވެ. ލިޝާގެ ދިރިއުޅުމުގެ ހުރިހާ ހަގީގަތެއް އެނގޭ ހަމައެކަނި ފަރާތަކީ ސުމާއެވެ. ސުމާގެ ކޮނޑުގައި ބޯއަޅާލައިގެން އޮވެ ލިޝާ އެތައް އިރަކު ރުޔެވެ. އެ ކަރުނައިން ކުރާނެ ފައިދާއެއް ނެތްކަން އެނގޭއިރުވެސްމެއެވެ.
"ލިޝް ކީއްވެ މަންމަ ކައިރީ ނުބުނީ؟... ތިދެމީހުން ރައްޓެހިވެގެން އުޅޭކަން އެނގޭނަމަ، މަންމަ ޔަގީން ތިކައިވެނި ކުރަން ނުބުނާނެކަން..." ސުމާ މަސައްކަތްކުރީ ލިޝާއަށް ވިސްނައިދޭށެވެ.
"މަންމަމެން ހިތުގަޖެހޭ ކަހަލަ ކަމެއް ކުރާކަށް ބޭނުމެއް ނޫނޭ..." ލިޝާ ވާހަކަދެއްކީ ރޮމުންނެވެ. "ބޮޑު މަޖުބޫރީއެއް އޮތީމަ ނޫނީ ބައްޕަ އެގޮތަށް ވާހަކައެއް ނުދައްކާނެ... އަހަރެން ނުވެސް ދަންނަ މީހަކާ ކައިވެންޏެއް ނުކުރުވާނެ..."
"ޝަފް ވަރަށް ދެރަވެފަ ހުރީ..." ސުމާ އެންމެފަހުގެ ހަތިޔާރު ނެގިއެވެ. "އަހަރެން ބުނިން ލިޝްއާ ވާހަކަ ދައްކާނަމޭ... ދެން މަންމަ ކައިރީ ބުނެބަލަ... ޕްލީޒް..."
"މިހާރު މާބޮޑަށްވެސް ލަސްވެއްޖެ..." ލިޝާ އިސްޖަހައިލިއެވެ. "ޝަފް ކައިރީ ބުނޭ އަހަރެންމަތިން ހަނދާން ނައްތާލާށޭ..."
ހިތްވަރުކުރުމަށް ސުމާ ދިން ނަސޭހަތުގައި ހިފަން ލިޝާއަށް މަޖުބޫރުވީ އިތުރު ގޮތެއް ނެތުމުންނެވެ. އަމިއްލަ ހިތް ހަލާކުވިޔަސް މައިންބަފައިންގެ ހިތް ހަލާކުކޮށް ނުލުމަށް އޭނާ އަޒުމުކަނޑައެޅިއެވެ.
މެންދުރުފަސްވީއިރު ގޭތެރެ ހަލަބޮލިވެއްޖެއެވެ. ފިހާރައަށް ގޮސްފައި ސުމާއާއިއެކު ލިޝާ ގެއަށް އައިއިރު، ގޭގައި ވަކީން މީހުން ގިނައެވެ. އާއިލާގެ މީހުންނާއި ގާތް ރައްޓެހިން އަތްމަތި އަވަސްކޮށްލާފައި އުޅުނެވެ.
"ލިޝާ.... ދަރިފުޅާ..." ލިޝާ ގެއަށް ވަނުމުން މަދީހާ ހަލުވި ފިޔަވަޅުތަކެއްގައި ގޮސް ލިޝާގެ އަތުގައި އޮތް ކޮތަޅުތައް އަތުލިއެވެ. "ހާދަ ލަސްވީ... އެމީހުން އައިއްސިއޭ... އަވަހަށް ދޭ ތައްޔާރުވެލަން.... މަންމަމެން މިދަނީ ބަނދަރާ ދިމާއަށް..."
ކުޑަގޮތަކަށް ތައްޔާރުވެލައިގެން ލިޝާ ނުކުތްއިރު ގޭތެރެއިން އެއްވެސް މީހަކު ފެންނާކަށް ނެތެވެ. ބަނދަރަށް ގޮސްފައި އަދި ނާންނަނީކަން އެނގުމުން، ލިޝާއަށް ފުން ނޭވާއެއް ދޫކޮށްލެވުނެވެ. ގޭގެ ކޮރިޑޯއިން ލާފައި ގޮސް ބަގީޗާ ގަސްތައް ހައްދާފައިވާ ސަރަހައްދަށް އޭނާ ނުކުމެލީ ސިކުނޑިއަށް އަރާމެއް ދޭށެވެ.
"ލިޝް..." ޝަފާޒްގެ އަޑު އިވުމުން، ލިޝާ ދިޔައީ ސިއްސައިގެންނެވެ. އޭގެ ކުރިން ދުވަހަކުވެސް ލިޝާގެ ގެއަށް ވަދެފައިނުވާ ޝަފާޒް މިއަދު އެހުރީ ލިޝާގެ ކުރިމަތީގައި އެގޭގައެވެ. ހީވަނީ ލިޝާ ނުކުންނާނެކަން އެނގިގެން އިންތިޒާރުގައި ހުރި ހެންނެވެ.
"ޝަފް... މިތާ؟... މީހަކަށް ފެނިދާނެ... އަވަހަށް ދޭ..." ލިޝާ ހާސްވެގެން ވަށައިގެން ނަޒަރު ހިންގައިލިއެވެ.
"ލިޝްގެ މަންމައާ އަހަރެން ވާހަކަ ދައްކަންތަ؟..." ޝަފާޒް އަހައިލީ ގޮތް ހުސްވެފައިވާ ރާގަކަށެވެ.
"ޝަފް... ޕްލީޒް... އަންޑަސްޓޭންޑްވެބަލަ..." ލިޝާ ދޫކޮށްލީ ފުން ނޭވާއެކެވެ.
"ކީއްވެ އަހަންނަށް ތިވަރުގެ ދެރައެއް ތިދެނީ؟... އަހަންނަށް ކުރެވުނު ހަމަ އެންމެ ކުށެއް ބުނެދީބަލަ!..." ޝަފާޒް ހުރީ ފެންކަޅިވެފައެވެ.
"ސޮރީ...." މާފަށް އެދުން ފިޔަވާ އިތުރު ކަމެއް ލިޝާއަކަށް ނުކުރެވުނެވެ.
"އޯކޭ... ތީ ލިޝް ބޭނުންވާގޮތް ކަމަށް ވަންޏާ، އަހަރެން ހިނގައިދާނަން..." ޝަފާޒް އެނބުރި ދާން ހިނގައިގަތީ، އޭނާ ވާހަކަ ދައްކާ ދައްކާ ލިޝާގެ ފަރާތުން ޖަވާބެއް ނައުމުންނެވެ.
ޝަފާޒް ހުއްޓުވަން ލިޝާ ބޭނުންވިއެވެ. އެމޭގައި މޫނު ފޮރުވާލައިގެން އޮވެ ރޯލަން ހިތް އެދުނެވެ. އެހެނަސް، އެ ހިތްވަރު އޭނާ ހޯދާނީ ކޮންތާކުން ހެއްޔެވެ؟ އޭނާގެ ދިރިއުޅުމުން ޝަފާޒް ބޭރުކުރަނީވެސް ހުދު އަމިއްލައަށެވެ. ޝަފާޒް ނުކުމެގެން ދިޔުމުންވެސް ލިޝާއަށް ހުރެވުނީ އެދިމާއަށް ބަލަހައްޓައިގެންނެވެ.
(ނުނިމޭ)