03 Jan 2024, 21:07
މާލޭގެ ޒިކުރާ މިސްކިތުގެ ތެރެއަށް ކުކުޅު ބިސް ޖެހި ކަމަށް ތުހުމަތު ކުރެވެނީ ޚާއްސަ އެހީއަށް ބޭނުންވާ މީހަކަށް ކަމަށާއި، އެހެންވެ އޭނާ ހައްޔަރުނުކުރާކަމަށް މިރޭ ފުލުހުން ބުނެފިއެވެ.
ފުލުހުން "ސަން" އަށް ބުނީ، އެ މައްސަލައިގައި އެއްވެސް މީހަކު ހައްޔަރުކޮށްފައިނުވާ ކަމަށެވެ. އަދި ތުހުމަތު ކުރެވޭ މީހާއަކީ ޚާއްސަ އެހީއަށް ބޭނުންވާ މީހެއް ކަމަށެވެ.
އަދި މައްސަލައާއި ގުޅުން ހުރި އިދާރާތަކާއި ގުޅިގެން ފުލުހުން އެ މައްސަލަ ތަހުގީގު ކުރަމުންދާ ކަމަށް ވެސް ބުނެފައިވެއެވެ.
އިއްޔެ ފަތިސް ނަމާދަށް މީހުން ޒިކުރާ މިސްކިތަށް ދިޔައިރު، މިސްކިތް ތެރެއަށް ބިސް ޖަހާފައި ހުރި މަންޒަރު ފެންނަ ފޮޓޯތަކެއް ސޯޝަލް މީޑިއާގައި މީހަކު ވަނީ އާންމުކޮށްފައެވެ.
މީގެ ކުރިން ފުލުހުން "ސަން"އަށް ބުނެފައިވަނީ އެ މައްސަލަ އިއްޔެ ރޭ ދަންވަރުގެ ވަގުތެއްގައި ފުލުހުންނަށް ހުށަހަޅައިފައިވާ ކަމަށެވެ.
މަންޒަރު ދުށް މީހަކު 'ސަން'އަށް ބުނެފައިވަނީ ބިސް ޖަހާފައި ހުރި މަންޒަރު ފެނުމާއެކު އެކަން ވަނީ މާލެ ސިޓީ ކައުންސިލަށް އަންގައިފައެވެ.
ނަމަވެސް އެހައި ތަނަށް، ސިޓީ ކައުންސިލުން އެކަމާ ގުޅިގެން ފިޔަވަޅެއް އަޅާފައިނުވާ ކަމަށް އޭނާ މައުލޫމާތު ދިނެވެ.