03 Jan 2024, 20:46
ރާއްޖެ އެތެރެވުމަށް ބިދޭސީންނަށް ވޯކް ޕާމިޓް ދޫކުރާއިރު، މާދަމާއިން ފެށިގެން އެ ހުއްދަ ދޭނީ ހޯމް ލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީގައި ރަޖިސްޓްރީކޮށްފައިވާ ތަނަކުން މެޑިކަލް ހަދައި، ހުށަހެޅުމުން ކަމަށް އެ މިނިސްޓްރީން މިއަދު ބުނެފިއެވެ.
އެ މިނިސްޓްރީން މިއަދު ކުރި އިއުލާނެއްގައި ބުނީ ކޮވިޑް19ގެ ބަލިމަޑުކަމާ ގުޅިގެން ވޯކް ޕާމިޓް ހެއްދުމަށް ދިމާވި ގޮންޖެހުންތަކުގެ ސަބަބުން މެޑިކަލާ ނުލައި ވޯކް ޕާމިޓް ދޫކުރަމުން އައިކަމަށެވެ.
ނަމަވެސް މާދަމާއިން ފެށިގެން ޕާމިޓްގެ މުއްދަތު އިތުރުކުރުމަށާއި ކުރިން އެތެރެވެފައިވާ ފަރާތްތަކަށް ވޯކް ޕާމިޓް ދޫކުރެވޭނީ އެ ފަރާތްތަކުން ހަދައިފައިވާ ވޯކް ޕާމިޓް، މެޑިކަލް 'އެކްސްޕެޓް ސިސްޓަމް' މެދުވެރިކޮށް ހުށަހެޅުމުން ކަމަށް އެ މިނިސްޓްރީން ބުންޏެވެ.
އަދި ފަނަރަ ދުވަހުގެ ތެރޭގައި ވޯކް ޕާމިޓް އެންޓްރީގެ ދަށުން ރާއްޖެ އެތެރެވާ ބިދޭސީން މެޑިކަލް ރިޕޯޓް ހުށަހަޅަން ޖެހޭނެކަމަށް އެ އިއުލާނުގައިވެއެވެ.
ހަމައެއާއެކު، މިނިސްޓްރީން ބުނީ މިހާރު ވޯކް ޕާމިޓުގެ މުއްދަތު ހަމަވެފައިވާ ބިދޭސީއެއް ރާއްޖެއިން ބޭރުގައިހުރި ނަމަ އެ ފަރާތަކަށް ރާއްޖެ އެތެރެވެވޭނީ މެޑިކަލް ރިޕޯޓެއް ހައްދައި އެކްސްޕެޓް ސިސްޓަމަށް ހުށަހަޅައިގެން ކަމަށެވެ.
މިގޮތަށް ހުށަހަޅައި މެޑިކަލް ރިޕޯޓްތަކުގައި ހެލްތު މިނިސްޓްރީން ކަނޑައަޅައިފައިވާ ހުރިހާ ޓެސްޓުތަކެއް ހިމަނަންޖެހޭނެ ކަމަށް ވެސް ބުނެފައިވެއެވެ.
ވޭތުވެދިޔަ މުއްދަތުގެ ތެރޭގައި މެޑިކަލް ރިޕޯޓާއި ނުލައި ވޯކް ޕާމިޓް ދޫކޮށްފައިވާ ފަރާތްތަކުން މާދަމާގެ ނިޔަލަށް މެޑިކަލް އެކްސްޕެޓް ސިސްޓަމް މެދުވެރިކޮށް އެ ރިޕޯޓު ހުށަހަޅަން ޖެހޭނެ ކަމަށް ވެސް މިނިސްޓްރީން ވަނީ ބުނެފައެވެ.
މުއްދަތުގައި މެޑިކަލް ހުށަހަޅައިފައިނުވާ ނަމަ ބިދޭސީން ވަޒީފާ އަދައިކުރުމާބެހޭ ގަވާއިދުގެ ދަށުން ފިޔަވަޅު އަޅާނެކަމަށާއި މާދަމާއިން ފެށިގެން ފުރައިގެންދާ ފަރާތްތަކުގެ ވޯކް ޕާމިޓް ކެންސަލް ކުރެވޭނީ މެޑިކަލް ރިޕޯޓަށް އެކްސްޕެޓް ސިސްޓަމްގައި ދީފައިވާ މުއްދަތު ހަމަ ނުވާނަމަ ކަމަށް ވެސް ވަނީ ބުނެފައެވެ.
އަދި މި މުއްދަތު ހަމަވެފައިވާނަމަ ވޯކް ޕާމިޓްގެ މުއްދަތު ހަމަވެފައިވާ ކޮންމެ އަހަރަކަށް 2،000 ރުފިޔާއިން ޖޫރިމަނާ ކުރާނެ ކަމަށް އެ އިއުލާނުގައިވެއެވެ.
މެޑިކަލް ރިޕޯޓު ހުށަހެޅުން ލާޒިމްކުރީ ރާއްޖެ އެތެރެވާ ބިދޭސީންގެ ފަރާތުން ނުރައްކާތެރި ބަލިތައް ދިވެހިންގެ ތެރެއަށް ފެތުރުމުގެ ނުރައްކާ އޮތްކަމުގެ ކަންބޮޑުވުން ފާޅުކުރަން ފެށުމާއެކުގައެވެ.