03 Jan 2024, 18:24
ރައްޔިތުންގެ މަޖިލީހުގެ މި އަހަރުގެ އިންތިޚާބުގައި ހިންގައިފާނެ ކޮރަޕްޝަންގެ އަމަލުތައް މަދުކުރުމަށް އެންޓި ކޮރަޕްޝަން (އޭސީސީ)އިން "އެންޓި ކޮރަޕްޝަން އިލެކްޝަން ސްޓްރެޓަޖީ"ގެ ނަމުގައި ޕްލޭނެއް އެކުލަވައިލައި އެއަށް މިއަދު އަމަލު ކުރަން ފަށައިފިއެވެ.
އޭސީސީން ބުނީ މި ސްޓެރެޓިޖީއަކީ މަޖިލީހުގެ އިންތިޚާބުގެ ކަންކަން އިންތިޒާމުކޮށް، އިންތިޚާބުގައި ހިނގައިފާނެ ކޮރަޕްޝަންގެ އަމަލެއް ހުއްޓުވުމަށް އެކުލަވައިލި ސްޓްރެޓެޖީއެއްކަމަށެވެ.
މި ސްޓްރެޓެޖީގެ ދަށުން އިންތިޚާބުގައި ކޮމިޝަނުން ގެންގުޅޭނެ ސިޔާސަތުތައް ކަނޑައަޅައި އެކުލަވައިލާނެ ކަމަށް ވެސް އޭސީސީން ބުނެއެވެ.
އެ ކޮމިޝަނުން ބުނި ގޮތުގައި އެ ސްޓްރެޓެޖީގެ މަގުސަދަކީ އެ ދުވަސްވަރު ހިނގާ ކޮރަޕްޝަންގެ އަމަލުތައް މަދުކުރުމާއި އިންތިޚާބާ ގުޅޭ ގޮތުން ހުށަހަޅާ މައްސަލަތައް އަވަހަށް ބެލޭނެ ގޮތެއް ހޯދުމެވެ. އަދި މައްސަލަތައް ބެލުމަށް ހަރުދަނާ މަގެއް ހޯދުމެވެ.
ހަމައެއާއެކު އިންތިޚާބަށް ތައްޔާރުވުމަށް ކޮމިޝަނުން ކުރަންޖެހޭ ކަންކަން ނަތިޖާ ނެރެވޭ ގޮތަށް ބައްޓަން ކުރުމަކީ ވެސް ބޭނުމެއް ކަމަށް އޭސީސީން ވަނީ ބުނެފައެވެ.
މި ސްޓްރެޓެޖީގައި މައިގަނޑު ހަ ކަމެއް ކަނޑައަޅައިފައިވާއިރު އޭގެ ދަށުން ސާދަ ޙަރަކާތް ރާވައި ހިންގުމަށް ނިންމައިފައިވާ ކަމަށް އޭސީސީން ބުނެއެވެ. މި ސްޓްރެޓެޖީތައް ތަންފީޒު ކުރާނީ އެ ކަމަށް ޚާއްސަކޮށްފައިވާ ޑިޕާޓްމަންޓެއް ނުވަތަ ސެކްޝަނެއްގެ ދަށުންނެވެ.