03 Jan 2024, 17:43
އާންމުންގެ ހިތްތަކުގައި އިސްލާމްދީނަށް ލޯބި ޖެއްސުމުގެ މަގްސަދުގައި އިސްލާމިކް މިނިސްޓްރީން ކުރިއަށްގެންދާ 'ރިސާލާތު' ޕްރޮގްރާމް މިއަދު އިފްތިތާހު ކޮށްފިއެވެ.
މި ޕްރޮގްރާމް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު އިފްތިތާހުކޮށްދެއްވީ އެކަމަށް ޓަކައި އިސްލާމިކް މިނިސްޓްރީގައި މިއަދު ބޭއްވި ރަސްމިއްޔާތެއްގައެވެ.
އެ ރަސްމިއްޔާތުގައި ރިސާލަތު ޕްރޮގްރާމް އިފްތިތާހުކޮށްދެއްވުމަށްފަހު ވާހަކަ ދައްކަވަމުން މިނިސްޓަރު ޝަހީމް ވިދާޅުވީ، ''ރިސާލަތު'' ޕްްރޮގްރާމްގެ މަގްސަދަކީ ދިވެހި ރައްޔިތުން އިސްލާމްދީނުގެ ރުކުންތަކަށް އަހުލުވެރިކުރުމާއި، އިސްލާމްދީނުގެ އަސާސްތަކުގައި ހިފަހައްޓައި މުޖުތަމައުގައި އެއްބައިވަންތަކަމާއި، ހަމަޖެހުމަށް ލޯބިކުރާ ޖީލެއް ދިވެހި މުޖުތަމައުގައި ބިނާކުރުން ކަމަށެވެ.
މި ޕްރޮގްރާމަކީ ހުރިހާ އުމުރުފުރައަކަށް އަމާޒުކޮށް ދީނަށް ހިތް ޖައްސައި، ދީނީ ސައްހަ މައުލޫމާތު ފޯރުކޮށްދިނުމުގެ ގޮތުން އުމުރުފުރާތަކާ ގުޅޭ ގޮތަށް ކުރިއަށް ގެންދާނެ ޕްރޮގްރާމެއް ކަމަށް ވެސް ވިދާޅުވިއެވެ.
ޚާއްސަ ގޮތެއްގައި ރައީސް ޑރ. މުޙައްމަދު މުއިއްޒުގެ ރިޔާސީ ވައުދުތަކުގައި ދިވެހި ޒުވާނުން އިސްލާމްދީނަށް އަހުލިވެރިކުރުވައި، ހަރުދަނާ ޖީލެއް ބިނާކުރުން ހިމެނިފައިވުމުން، މިއީ އެ ވައުދަށް އަމާޒުކޮށް މި އަހަރަށް އެކުލަވާލެވިފައިވާ ސްޓްރެޓެޖިކް ޕްލޭނެއްކަމުގައި މިނިސްޓަރު ފާހަގަކުރެއްވިއެވެ.
މި ޕްރޮގްރާމްގައި އަލިއަޅުވައިލާނެ ބައިތަކުގެ ތެރޭގައި ޝަހާދަތުގެ ދެކަލިމަ, ނަމާދު، ޒަކާތް، ރޯދަ، ހައްޖު، މާތް ﷲ އަށް އިމާންވުން، ރަސޫލުންނަށް އީމާންވުން، އިހްސާންކަމުގެ އިތުރުން އުންމަތަށް މުހިއްމު ފިލާވަޅުތައް ހިމޭނޭ ކަމަށް އެ މިނިސްޓްރީން މައުލޫމާތު ދިނެވެ.
އެ ޕްރޮގަްރާމް އިފްތިތާހުކުރި ރަސްމިއްޔާތުގެ ތެރެއިން-- އިންފިނެޓް މޫވްމެންޓްސް/ނަދީމް
މީގެ އިތުރުން، ޝަހީމްވަނީ އިސްލާމީ ކަންތައްތަކަށް ލޯބި ޖެއްސުމާއި ޒުވާނުން ދީނީ ކަންތައްތަކަށް އަހުލުވެރިކުރުމުގެ މުހިއްމުކަމާ ގުޅޭ ގޮތުން ވެސް ވާހަކަ ދައްކަވައިފައެވެ.
"ހަރުކަށި އުސޫލުތަކާއި ނޭއްގާނީ ވިސްނުންތަކާއި، އަލްމާނީ ވިސްނުންތަކާއި އަދި އިލްހާދީ ވިސްނުންތަކާއި، މި ހުރިހާ ކަމެއްގެ ތެރެއަށް ޒުވާނުންނާއި އެހެން މީހުން ވެއްޓިގެންދަނީ އިސްލާމީ އުސޫލުގެ ތެރެއިން ކަންތައް ނޭނގޭތީ،" ޝަހީމް ވިދާޅުވިއެވެ.
އިސްލާމިކް މިނިސްޓްރީން ބުނީ، މި ޕްރޮގްރާމްގެ ސަބަބުން އިސްލާމް ދީނަށް ލޯބިކުރާ ހަރުދާނާ ޖީލެއް ބިނާވެ، ދީނަށް އަމަލުކުރާ އެއްބައިވަންތަ މުޖުތަމައެއް އުފެއްދޭނެ ކަމަށެވެ.