03 Jan 2024, 15:09
ރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒު ޗައިނާއަށް ވަޑައިގަންނަވަން ނިންމަވައިފިއެވެ.
އެނގިފައިވާ ގޮތުގައި ރަސްމީ ދަތުރުފުޅެއްގައި ރައީސް މުއިއްޒު ޗައިނާއަށް ވަޑައިގަންނަވަން ހަމަޖެހިފައިވަނީ މި މަހުގެ ތެރޭގައެވެ. އެކަމަކު، ދަތުރާ ގުޅޭ އެއްވެސް ތަފުސީލެއް މިހާތަނަށް ސަރުކާރުން ހާމަކޮށްފައެއް ނުވެއެވެ.
ނިމުނު ނޮވެމްބަރު 17 ގައި ވެރިކަމުގެ ހުވާ ކުރެއްވި ރައީސް މުއިއްޒު އެންމެ ފުރަތަމަ ރަސްމީ ދަތުރުފުޅެއް ކުރެއްވީ އެ މަހު 27ގައި ތުރުކީ ވިލާތަށެވެ. އެ ދަތުރުފުޅުގައި އެ މަނިކުފާނު ވަނީ އެ ގައުމުގެ ރައީސް ރަޖަބު ތައްޔިބު ޢުރުދުޤާންއާ އެކު ރަސްމީ މަޝްވަރާތައް ކުރައްވައިފައެވެ.
ރައީސް އެ ގައުމަށް ވަޑައިގަތީ ތުރުކީގެ ރައީސް ރަޖަބު ތައްޔިބު އުރުދުޣާންގެ ދައުވަތުފުޅަކަށެވެ.
އެ ދަތުރުފުޅު ނިންމަވާލެއްވުމަށް ފަހު އެމަނިކުފާނު ވަޑައިގަތީ ޔޫއޭއީގައި ބޭއްވި ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގައި ބައިވެރިވެވަޑައިގަތުމަށެވެ. އެ ދަތުރުފުޅަށް ފަހު އެ މަނިކުފާނު ރާއްޖެ ވަޑައިގަތީ މިދިޔަ މަހު ތިނެއްގައެވެ.
ރައީސް ރަސްމީ ދަތުރުފުޅެއްގައި ޗައިނާއަށް ވަޑައިގަންވާއިރު، ނައިބު ރައީސް ހުސައިން މުހައްމަދު ލަތީފު ވެސް މިދިޔަ މަހު ވަނީ ޗައިނާއަށް ރަސްމީ ދަތުރުފުޅެއް ކުރައްވައިފައެވެ. އެއީ، އެ ގައުމުގައި ކުރިއަށްދާ 'ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން'ގައި ބައިވެރިވެވަޑައިގަތުމަށެވެ.
މި ސަރުކާރުން ޗައިނާއާ އެކު ގާތްގުޅުމެއް ބާއްވާއިރު، ރައީސް މުއިއްޒަކީ 'ޕްރޯ ޗައިނާ' ބޭފުޅެއް ކަމަށް ބޭރުގެ މީޑިއާތަކުން ސިފަކުރެއެވެ. އެކަމަކު، ރައީސް ވަނީ އެ މަނިކުފާނަކީ 'ޕްރޯ މޯލްޑިވްސް' ބޭފުޅެއް ކަމަށް ވިދާޅުވެ، އެ ކަމަށް ރައްދުދެއްވައިފައެވެ.