03 Jan 2024, 14:51
އެއްގަމުގައި ދުއްވާ އުޅަނދުފަހަރުގައި ޖަހައި ޑޮމެއިން ނަންބަރު ވިއްކުމުގެ ޚިދުމަތް ކުރިއަށް އޮތް ދެތިން މަސް ތެރޭގައި ފަށާނެ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
ޓްރާންސްޕޯޓް މިނިސްޓްރީގެ މަސައްކަތްތަކާ ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އަމީން ވިދާޅުވީ، އާ ސަރުކާރު އައިއިރު ޑޮމެއިން ވިއްކުމުގެ ޚިދުމަތް އޮތީ ހުއްޓާލާފައި ކަމަށެވެ.
އެ ޚިދުމަތް ހުއްޓައިލީ ކުރީގެ ސަރުކާރުގައި ރައީސް އޮފީހުން މިނިސްޓްރީއަށް އެންގުމުން ކަމަށާއި އޭނާ މިނިސްޓަރުކަމާ ހަވާލުވެވަޑައިގަތުމަށް ފަހު ބެއްލެވިއިރު، ޑޮމެއިން ޚިދުމަތަށް 200 ފަރާތަކުން އެދިފައި އޮތް ކަމަށް އަމީން ވިދާޅުވިއެވެ.
"އަޅުގަނޑު ގަބޫލުކުރާ ގޮތުގައި ސައްހަ ގޮތުގައި ހުރި ރަނގަޅު ޑޮމެއިން މިނިސްޓްރީގެ ތެރެއިން ނަންގަވާފައި ތިބި ބޭފުޅުންނަށް އެ ޚިދުމަތް ލިބިވަޑައިގަންނަވަން ޖެހޭނެ، އެގޮތުން މިހާރު އެ މަސައްކަތްވާނީ މިނިސްޓްރީގައި ފެށިފައި،" އޭނާ ވިދާޅުވިއެވެ.
އަމީން ވިދާޅުވީ ޑޮމެއިންގެ ޚިދުމަތް ދޭނީ ޒަމާނަށް ފެތޭ ގޮތަށް، ތަފާތު ކޮންސެޕްޓަކަށް ކަމަށެވެ.
"އެހެންވީމަ ހަމަ ރަނގަޅު ބިޑިން ސިސްޓަމަކާ އެކީގައި އުސޫލެއްގެ ތެރެއިން އާ ކޮންސެޕްޓަކާ އެކީގައި ޑޮމެއިންގެ ޚިދުމަތް އަލުން ދިވެހި ރައްޔިތުންނަށް ބޭނުންފުޅުވެވަޑައިގަންނަވާ ހުރިހާ ބޭފުޅުންނަށް ލިބޭނެ އިންތިޒާމު ހަމަޖައްސާނެ ވާހަކަ ވެސް އަޅުގަނޑު ދަންނަވަން،" އޭނާ ވިދާޅުވިއެވެ.
ޑޮމެއިން ޚިދުމަތް ނުލިބުމުގެ މައްސަލަ އޮތީ ވަރަށް ބޮޑުވެފައިކަން ފާހަގަކުރައްވައި އަމީން ވިދާޅުވީ، އެ މައްސަލައާ ގުޅިގެން މި ސަރުކާރުން ދެ ކަމެއް ކުރަން ނިންމާފައިވާ ކަމަށެވެ. އެގޮތުން މިހާތަނަށް ދޫކޮށްފައިވާ ބައެއް ޑޮމެއިންތައް ދޫކޮށްފައިވަނީ ސައްހަ ގޮތުގައިތޯ ސުވާލު އުފެދޭ ކަމަށާއި އެހެންވެ، އެ މައްސަލަ ހައްލުކުރާނެ ގޮތަކާ މެދު މަޝްވަރާ ކުރަމުން އަންނަ ކަމަށް އޭނާ ވިދާޅުވިއެވެ.
އެ މައްސަލަ ބެލި ނަމަވެސް، އެކަމުގައި ޑޮމެއިން ނަންބަރު ލިބުުނު މީހާގެ ކުށެއް ނެތް ނަމަ ޑޮމެއިން ކެންސަލް ކުރުން ފަދަ ފިޔަވަޅެއް ނާޅާނެ ކަމަށް އަމީން ވިދާޅުވިއެވެ.
"އަޅުގަނޑުމެން ގެންގުޅޭ ނިޒާމަކީ އަޅުގަނޑުމެން ހުޅުވާލައިގެން އެ ވެރިފިކޭޝަން ޕްރޮސެސްގެ ތެރޭގައި ނުގެންދެވޭ ޑޮމެއިން، އެ ބޭފުޅުންނާ ވާހަކަދައްކައިގެން އަދި ހަމަ މިނިސްޓްރީން ހުޅުވާލައިގެން އެ ބޭފުޅުންނަށް އެ ޑޮމެއިންތައް ސައްހަ ނިޒާމެއްގެ ތެރެއަށް މިނިސްޓްރީގައި އޮންނަ ގަވާއިދުގެ ތެރެއަށް ފެއްތުމުގެ މަސައްކަތް އަޅުގަނޑުމެން ކުރާނީ،" އޭނާ ވިދާޅުވިއެވެ.
އަމީން ވިދާޅުވީ، ޑޮމެއިން ޚިދުމަތް ދިނުން ހުއްޓާލާފައި އޮތީ ރަނގަޅަށްތޯ ވެސް މި ސަރުކާރުން ބަލާނެ ކަމަށެވެ.
ޑޮމެއިން ޚިދުމަތަށް ފައިސާ ދެއްކި ނަމަވެސް ޑޮމެއިން ނުލިބި އެތައް މަސް ދުވަހެއް ފާއިތުވުމުގެ ޝަކުވާ ލިބިފައިވާތީ މިދިޔަ އަހަރު ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން އެ މައްސަލަ ބެލިއެވެ. އަދި ކޮމިޓީން މައްސަލަ ބެލިއިރު ކުރީގެ ޓްރާންސްޕޯޓް މިނިސްޓަރު އައިޝަތު ނަހުލާ ހާޒިރުކޮށް ސުވާލު ވެސް ކުރިއެވެ.