03 Jan 2024, 18:00
ރާއްޖޭގެ އެތެރޭގެ އުދުހުންތަކުގެ އަގު ވަރަށް ބޮޑުކަމަށް ގަބޫލުކުރައްވާ ކަމަށާއި، އަގަށް ހެޔޮ ބަދަލެއް ގެނައުމަށް ޓަަކައި އައިލެންޑް އޭވިއޭޝަނުގެ ނިޒާމަށް ބަދަލުތަކެއް ގެނައުމުގެ މަސައްކަތް މިހާރު ފަށައިފައިވާކަމަށް ޓްރާންސްޕޯޓު މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
އަމީން މިހެން ވިދާޅުވީ ސަރުކާރު ބަދަލުވި ފަހުން، ފުރަތަމަ ފަހަރަށް ޓްރާންސްޕޯޓު މިނިސްޓްރީން ބޭއްވި ނޫސްވެރިންގެ ބައްދަލުވުމުގައެވެ.
ރާއްޖޭގެ އެތެރޭގެ އުދުހުންތަކުގެ އަގު މިހާ ބޮޑުވީ ނިމިދިޔަ އެމްޑީޕީގެ ސަރުކާރުގެ ސިޔާސަތުކުގެ ސަބަބުންކަމަށް ދޭހަވާ މޭރުމަކުން އަމީން ވަނީ ވާހަކަދައްކަވައިފައެވެ.
އެގޮތުން، އައިލޭންޑް އޭވިއޭޝަނަށް ވިޔަފާރީގެ ގޮތުން ގެއްލުންވެ، ހިދުމަތްތަކާއި ނުބައްދަލު އަދަދަށް މުވައްޒަފުން ނަގައިފައިވާކަމަށް މިނިސްޓަރު ވިދާޅުވިއެވެ.
"އަޅުގަނޑަށް ފާހަގަކުރެވުނު އެއް ކަމަކީ އައިލެންޑް އޭވިއޭޝަން 2018 އާ ހިސާބަަށް އައިއިރު، އެއީ ފައިދާވަމުން އައި ކުންފުންޏެއް. 2018ގެ ކުރިން ދައުލަތުގެ ނުވަތަ ޓެކްސް ޕޭޔާ މަނީ ބޭނުންކުރަން ނުޖެހޭ، އަމިއްލަ ކުންފުންޏެއްގެ ހައިސިއްޔަތުން ހިންގަމުން ދިޔަ ކުންފުންޏެއް،" އަމީން ވިދާޅުވި އެވެ.
މި ސަރުކާރު އިންތިހާބުވުމާއެކީ، އިންތިގާލީ މަރުހަލާގެ މަސައްކަތުގައި ފާހަގަކުރެވުނީ، ވޭތުވެދިޔަ ފަސް އަހަރުގެ ތެރޭގައި، 2018 އިން 2023އަށް އައިލެންޑް އޭވިއޭޝަނުގެ ވިޔަފާރި ދަށަށް ގޮސް، އެއް ބޯޓު ގެންގޮސް ސީ ޕްލޭން އޮޕަރޭޝަންތައް ވެސް ދަށަށް ގޮސްފައިވާކަން ކަަމަށް މިނިސްޓަރު ވިދާޅުވިއެވެ.
އެ ކަން ހައްލުކުރުމަށް ޓަކައި މި ސަރުކާރުން މިހާރު ވަރަށް ގިނަ މަސައްކަތް ފަށައިފައިވާކަމަށް ފާހަގަކުރެއްވިއެވެ. އޭގެ ތެރޭގައި، އައިލެންޑް އޭވިއޭޝަނުގެ މެނޭޖްމަންޓް މިހާރު ބަދަލުކޮށްފައިވާނެކަމަށާއި އިދާރީ ގޮތުން އެ ކުންފުނި ރީސްޓަރަކްޗަރު ކުރަމުންދާކަން ފާހަގަކުރެއްވިއެވެ.
އަދި، މި ސަރުކާރުގެ ހަފުތާ 14ގެ ސިޔާސަތުތަކުގެ ތެރެއިން ވައިޑް ބޮޑީ އޮޕަރޭޝަންތައް ފެށި، ބައިނަލްއަގުވާމީ ފުރުސަތުތައް ހޯދައި، އިކޮނޮމިކް ކޮންޓްރިބިއުޝަންގެ އެހީގައި އެތެރޭގެ އުދުހުންތަކުގެ އަގުތަކަށް ބަދަލު އަންނާނެކަމަށް ގަބޫލުކުރެއްވޭ ކަމަށް މިނިސްޓަރު ވިދާޅުވިއެވެ.
އެތެރޭގެ އުދުހުންތަކުގެ އަގު އުފުލުމަކީ ގިނަ އަދަދެއްގެ ރައްޔިތުން ފާޅުކުރާ ބޮޑު ކަންބޮޑުވުމެކެވެ. އަދި އެ ކަމުގެ ފާޑުކިޔުން ގައުމީ އެއާލައިނަށާއި އެހެނިހެން ޑޮމެސްޓިކް އެއާލައިންތަކަށް އަބަދުވެސް ލިބެއެވެ.