03 Jan 2024, 14:11
މިނިސްޓްރީ އޮފް ޓްރާންސްޕޯޓު އެންޑް ސިވިލް އޭވިއޭޝަންގެ ތަފުސީލީ އޮޑިޓެއް ހެދުމުގެ މަސައްކަތް ކުރިއަށްދާ ކަމަށް ޓްރާންސްޕޯޓު މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
ސަރުކާރު ބަދަލުވި ފަހުން، ފުރަތަމަ ފަހަރަށް ޓްރާންސްޕޯޓު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު މިއަދު ވިދާޅުވީ، އެ ވުޒާރާއާ މެދު ރައްޔިތުންގެ ހިތުގައި އޮތް ތަސައްވަރު ރަނގަޅުކުރަން ޖެހޭކަމަށް ގަބޫލުކުރައްވާ ކަމަށެވެ.
"އަޅުގަނޑުމެންގެ ސަރުކާރުން ހަވާލުވެގެން އައިސް، ގާތްގަނޑަކަށް އެއް މަސް ދުވަސް ދިޔައިރު، މިނިސްޓްރީގެ ތަސައްވަރު ރަނގަޅުކުރުމަށްޓަކައި ގިނަ މަސައްކަތްތަކެއް ކުރަން ޖެހޭ،" މިނިސްޓަރު ވިދާޅުވިއެވެ.
އެގޮތުން، ކުރީ ސަރުކާރުގެ ވޭތުވެދިޔަ ފަސް އަހަރު ތެރޭގައި އާދަޔާ ހިލާފަށް ވެހިކަލްތައް ރަޖިސްޓްރީކޮށްފައިވުމާއި، އައުޓްޑޭޓެޑް މެޓްރިކްސް ސިސްޓަމްއެއް ފޮލޯކުރަމުން އައިކަމަށް ފާހަގަކުރެވޭ ކަމަށް އަމީން ވިދާޅުވިއެވެ.
ބައެއް ތަފާސްހިސާބުތައް ދެއްވަމުން މިނިސްޓަރު ވިދާޅުވީ، ފާއިތުވި ފަސް އަހަރު ތެރޭ މާލެ ސަރަހައްދުން އެކަނި ވެސް 42،000 ދުއްވާ އުޅަނދު ރަޖިސްޓަރީކޮށްދީފައިވާ ކަމަށެވެ.
ޓްރާންސްޕޯޓު މިނިސްޓަރު މުޙައްމަދު އަމީން: މިނިސްޓަރު ވަނީ ޓްރާންސްޕޯޓު މިނިސްޓްރީގެ ތަފުސީލީ އޮޑިޓެއް ހަދަން ނިންމާފައި --
"މި ވޭތުވެދިޔަ ފަސް އަހަރެއްގެ ތެރޭގައި އަޅުގަނޑުމެންނަށް މުޅި ދިވެހިރާއްޖެއަށް 69،780 ދުއްވާ އުޅަނޑު ރަޖިސްޓްރީ ކުރެވިފައި އެބަހުރި،" އަމީން ވިދާޅުވިއެވެ.
"މިއީ އަޅުގަނޑަށް ހީވަނީ އާދަޔާޚިލާފު ބޮޑު އަދަދެއްހެން، މީގެ ތެރެއިން 42،000 އަށްވުރެ ގިނަ އަދަދަކީ މާލޭ ސަރަހައްދަށް ރަޖިސްޓްރީވެފައި ހުރި އުޅަނދު،"
މިނިސްޓަރު ވިދާޅުވީ، މި ގޮތަށް މާލޭ ސަރަހައްދަށް އުޅަނދު އިތުރުވަމުންދާނަމަ، މާލޭގެ ޓުރެފިކުގެ މައްސަލަ ބޮއްސުންލާނެ ކަމަށެވެ.
އަމީން ވިދާޅުވީ، ގާނޫނެއްގެ ތެރެއިން ހެޔޮ ނިޔަތެއްގައި އުސޫލެއް އެކުލަވައިލައިގެން ކަންކަން ކުރާނަމަ، މިހާ ބޮޑަށް އުޅަނދުފަހަރު އިތުރުނުވާނެ ކަމަށެވެ.
މީގެ އިތުރުން، އަމީން މިނިސްޓްރީއާ ހަވާލުވިއިރު 200 ވަރަކަށް ޑޮމެއިންގެ ހިދުމަތަށް ރައްޔިތުން އެދިފައިވާކަމަށާއި، އެ ހިދުމަތް ކުރީ ސަރުކާރުން (ރައީސް އޮފީހުން) މިނިސްޓްރީއަށް އަންގަވައިގެން ހުއްޓާލައިފައިވާ ކަމަށެވެ. ނަމަވެސް، މިހާރު އެ 200 ޑޮމެއިނުގެ ހިދުމަތް ވެސް ސަރުކާރުން ވެރިފިކޭޝަން ޕްރޮސެސްއަށް ގެންގޮސް އެ ހިދުމަތް ދިނުމަށް މަސައްކަތް ކުރައްވާ ކަމަށެވެ.
އެހެންވެ، ފަންނީ އަދި އޮޕަރޭޝަނަލް ގޮތުން މިނިސްޓްރީގެ ތަފުސީލީ އޮޑިޓެއް ހަދަންޖެހިފައިވާ ކަމަށް މިނިސްޓަރު ވިދާޅުވިއެވެ.