03 Jan 2024, 13:04
"ރާދިން…"
ހައިރާންކަމާއެކު މުނީރަށް ރާދިންއަށް ބަލާލެވުނުއިރު، ސުވާލުމާކުތަކުން އޭނާގެ ހިތް ފުރުނެވެ.
"ރާދިން. މީ ކޮންކަމެއް؟" މުނީރު ސުވާލުކޮށްލިއިރު، އެ އަޑުގައި ހަރުކަށިކަން ވެއެވެ.
"ބައްޕާ… " ވާހަކަ ފަށާނީ ކިހާ ހިސާބަކުންކަމެއް ރާދިންއަކަށް ނޭނގުނެވެ.
"ހީ އިޒް ނޮޓް ޑެޑް." މުނީރަށް ބަލާލާފައި އެހެން ބުނެލުމަށްފަހު ރާދިން، ގޮސް އެމީހާގެ މޫނުގައި ދެފަހަރަކު ޖަހާލުމާއެކު އެމީހާ ސިއްސައިގެން ގޮސް ހޭލިއެވެ.
"ނޫން. ނޫން." އެމީހާގެ އަޑުން ސިހުން މުނީރަށް އިޙްސާސްވިއެވެ. އެ ހުރިހާކަމެއްގެ ފަހަތުގައި ހުރީ ރާދިންކަން އޭނާއަށް އެނގެއެވެ.
"މީ ހުރިހާކަމެއްގެ ފަހަތުގައި ހުރި މީހަކީ. އަދި މީނަ އެ ހުރިހާކަމެއް ކުރީ އެ ފުއާދު ބުނެގެން." ރާދިންއަށް ރުޅިވެރިކަމާއެކު ބުނެވުނެވެ.
"ރާދިން. ފުއާދު އަނެއްކާ މިހާރު ކީކުރީ؟" މުނީރަށް ވެސް ސުވާލުކޮށްލެވުނެވެ. ރާދިން އެހާ ރުޅި އަންނާނީ ސަބަބެއް ނެތި ނޫންކަން އޭނާއަށް ވެސް އެނގެއެވެ. އަދި ޚާއްސަކޮށް މައާލްއާ ގުޅޭކަންތައް ރާދިން ވަރަށް ސީރިއަސްކޮށް ނަގާކަންްވެސް އޭނާއަށް އެނގެއެވެ. އެމީހާއަށް ކުރި އަނިޔާގެ ފަހަތުގައި ފޮރުވިފައި ބޮޑު ސަބަބެއް ވާނެކަމުގައި މުނީރަށް ޔަޤީން ކުރެވުނެވެ.
"ފުއާދު. ޝާކިރުމެން އަންކަލްމެން އެންމެންގެ ދުވަސް ދުއްވާލާފައިވެސް އޭނަ ހަމައެއް ނުޖެހުނު. އެންމެ ފަހުން މިހާރު އޭނާ ބޭނުންވަނީ މައާލްވެސް… މައާލްގެ ފުރާނަވެސް ދުއްވާލަން." ރާދިންގެ އަޑު ހަރުކަށިވެފައި ބާރެވެ.
"ކީކޭ… ޝާކިރާ ފަހުމާއާ ދެމީހުން މަރާލީއޭ؟" އިވުނު އަޑު ޔަޤީން ނުކުރެވުނު ފަދައަކުން މުނީރު ސުވާލުކޮށްލިއެވެ.
"އާނ ބައްޕާ… އެއީ އެކްސިޑެންެޓެއް ނޫން. އެއީ ފުއާދުގެ ނުބައި ރޭވުން. މުދަލަށް ދަހިވެތިވެގެން އޭނާ ކުރި ނުބައި އަމަލެއް އެެއީ…" ރާދިން ބުންޏެވެ. މުނީރު ހެންރީއަށް ބަލާލި ވަގުތު ހެންރީވެސް މުނީރަށް ބަލާލިއެވެ. އޭނާގެ ހަށިގަނޑުގައި ވޭން އަޅާކަން އެ މޫނުމަތިން ފާޅުވަމުން ދިޔަ އަސަރުތަކުން ހާމަވަމުން ދިޔައެވެ.
"މީނަތަ އެކަންތައް ކުރަން ފުއާދުއަށް އެއްބާރުލުން ދިނީ؟ މީ ކާކު ރާދިން؟" މުނީރަށް ނިތްކުރީގައި އަތް ކާތާލެވުނެވެ.
"މީ ހެންރީއަކީ… ފުއާދު ބުނެގެން އެކްސިޑެންޓް ކުރުވި މީހަކީ މިއީ… އޭތް… ކަލޭ ހަމަ މިހާރު ކިޔައިދީ ކަންތައްކުރި ގޮތް،" ހެންރީއާ ދިމާލަށް ޝަހާދަތް އިނގިލި ދިއްކޮށްލާފައި އިންޒާރެއް ދިން ފަދައަކުން ރާދިން އެހެން ބުނެލުމާއެކު، ޖެހިލުންވެ އިނދެ ހިތް ދިރުވާލާފައި ހެންރީ ވާހަކަ ދެއްކިއެވެ.
"އަހަންނަށް މާފުކުރޭ. އެކަމުގެ ބަދަލު ހިތި ގޮތަކަށް އަހަންނަށް ލިބިއްޖެ. އަހަރެންކުރި ކުށުގެ އަދަރު މިއަދު ލިބެމުން އެ ދަނީ އެއްވެސް ކުށެއް ނެތް އަހަރެންގެ ލޯބިވާ އަނިބިމީހާއަށް. " ހެންރީ ވާހަކަ ދައްކަން ފެށިއެވެ.
"އެއްވެސް ބޭކާރު ވާހަކައެއް އަޑު އަހާކަށް އަހަރެން ބޭނުމެއް ނޫން. ކަލޭ ކަންތައް ކުރި ގޮތް އަހަންނަށް ކިޔައިދީ." އިވުނު ހަޤީގަތުގެ ސަބަބުން ހެންރީގެ އިތުރު އެއްވެސް ވާހަކައެއް އަޑު އެހުމުގެ ޝައުގުވެރިކަން މުނީރުގެ ނެތް ފަދައެވެ. އެކްސިޑެންޓްގެ ހަޤީގަތް އެނގެން އޭނާ ހުރީ ކެތް މަދުވެފައެވެ. ލިބިފައިވާ ޒަޚަމްތަކާއެކުވެސް ހެންރީ އުނދަގުލުން އެހުރިހާ ހަޤީގަތެއް މުނީރަށް ކިޔައިދޭން ފެށިއެވެ.
****
"އަހަރެން… އަހަންނަކީ ވަރަށް އާދައިގެ ދިރިއުޅުމެއް އުޅެމުން އައި މީހެއް. އެއް ދުވަހު އަހަރެން މަސައްކަތުގައި އުޅެނިކޮށް ފުއާދު އައީ އޭނާގެ ކާރު ހަލާކުވެގެން އަހަރެން މަސައްކަތް ކުރަމުން ދިޔަ ގަރާޖަށް. ކާރު ލާފައި އެ ދުވަހު ހަވީރަށް ނިންމައިދޭން ބުނެފައި ފުއާދު ދިޔައީ ފަހުން އަންނާނެކަމަށް ބުނެ. ދެން ފުއާދު އައިއިރު އަހަރެން ހުރީ ތަންކޮޅެއް ދުރުގައި ފޯނެއްގައި. އަހަރެން ދިޔައީ އަހަރެންގެ އަންހެނުން އެލިޒެތްއާ ވާހަކަ ދައްކަމުން. އެލިޒެތް ދިޔައީ ކެންސަރާ ހަނގުރާމަކުރަމުން. އެލިޒެތްގެ ފަރުވާއަށް ބޭނުންވާ ފައިސާއެއް އަހަރެމެންގެ އަތަކު ނެތް. އެ ވާހަކަ ފުއާދަށް އަޑު އިވުނީ. އެ ދުވަހު ކާރުގައި ދިޔުމުގެ ކުރިން ފުއާދު އަހަރެންގެ ގާތުގައި އެދުނީ އޭނާއާއެކު އައުމަށް. އަދި އޭނާއަށް އަހަރެންގެ ވާހަކަތައް އަޑު އިވުނުކަމަށާއި، އަހަރެން ބޭނުންވާވަރަށް ފައިސާ ދޭނެ ކަމަށް ބުނި. އެންމެ ފުރަތަމަ އޭނަ އެހެން ބުނުމުން އަހަރެން ކުޑަކޮށް ހައިރާންވެސް ވި. ނުވެސް ދަންނަ މީހަކު އެފަދަ ގޮތަކަށް އަހަންނަށް އެހީވާތީ. އަހަރެން އެދުނު ވަރަށް ވުރެ އިތުރަށް ވެސް އޭނަ ފައިސާ ދޭން ބުނި. އަހަރެން ބުނިން ނުވެސް ދަންނަ މީހަކު ތި ގޮތަށް ފައިސާ ދިނުމަކީ އަހަރެންގެ ބުއްދި ގަބޫލުކުރާ ކަމެއް ނޫނޭ. އެ ހިސާބުން ފުއާދު ބުނީ އޭނަ ބުނާތަނަކުން އެރޭ ބައްދަލުކުރުމަށް. އަދި ބައްދަލުކުރުމުން ފައިސާ ދޭނެ ކަމުގައި. ދެމީހުންގެ ދެމެދުގައި ދެކެވޭ ވާހަކައަކީ އިތުރު މީހަކަށް އެނގިގެން ނުވާނެ ވާހަކައެއް ކަމުގައި އޭނަ ބުނި. އަހަރެން އެރޭ އޭނައާ ބައްދަލުކުރަން ދިޔައިން. ފައިސާ ފޮށި ހުޅުވާލާފައި އަހަންނާ ދިމާލަށް ދިއްކޮށްލުމާއެކު، އަހަރެން އޭގައި ހިފަން އުޅުމާއެކު އޭނާ އަހަންނަށް ހުރަސް އެޅި. އެއަށްފަހު އޭނާގެ ޝަރުތާ އެއްބަސްވުމަށް ބުނި. ފުއާދު ބުނީ ޝާކިރުމެން ކާރުގެ ސްޕީޑް ކޮންޓްރޯލް ނުކުރެވޭ ގޮތަށް ހެދުމަށް. އަހަރެން އެއްބަސްވީ އެލިޒެތްއަށްޓަކާ. އެލިޒެތްގެ ފުރާނަ ސަލާމަތް ކުރުމަށްޓަކާ. އަހަރެން ހުރީ ގޮތް ހުސްވެފަ. އެހުރިހާކަމެއް އެގޮތަށް ކުރިއިރު، އަހަރެން ފަހަރެއްގައިވެސް ވިސްނައެއް ނުލަން އޭގެން ނުކުމެދާނެ ހިތި ނަތީޖާއަކަށް. ފުއާދެކޭ އެއްގޮތަށް އަހަރެންވެސް ދަހިވެތިވީ. އެލިޒެތްގެ ފުރާނަ ސަލާމަތް ކުރުމަށް ދަހިވެތިވީ. އެކަމުގެ ހިތިކަން އަހަންނަށް ލިބުނީ ހީވެސް ނުކުރާހާ ގޮތަކަށް. އެލިޒެތް އެކްސިޑެންޓްވެ…." އެހިސާބަށް ބުނެފައި ހެންރީ ވާހަކަ ހުއްޓާލިއެވެ.
"ކަލޭ ކޮން އިރަކު އެކަންތައް ކުރީ؟" މުނީރުގެ ރުޅިގަނޑުވެސް އުތުރި އަރަނީއެވެ. ޝާކިރާ އެއްކޮށް އޭނާގެ ލޯބިވާ ކޮއްކޮ ފަހުމާ އާއި ދަރިފުޅުވެސް ގެއްލުނީ ފުއާދުގެ ސަބަބުންނެވެ. ރުޅިގަނޑު ކޮންޓްރޯލް ކުރަން އޭނާއަށް އުނދަގޫވީ އެހެންވެގެންނެވެ.
"ބައްޕައަށް އެނގޭތަ؟ މައާލްގެ ފުރާނަވެސް ދުއްވާލަން މީނަ މަސައްކަތް ކުރި." އެހެން ބުނެފައި ރާދިން ވީގޮތް މުނީރަށް ކިޔައިދިނެވެ.
"ކަލޭމެން މީހުންނަށް ފައިސާއަށް އަނެކާކުގެ ފުރާނައާ ކުޅުމަކީ ހާދަ ފަސޭހަ ކަމެކޭ ދޯ… ހަމަ މިހާރު ހުރިހާ ވާހަކައެއް ކިޔައިދީ" މުނީރު ހަޅޭއްލަވައިގަތެވެ.
"އަހަރެން އެގެއަށް ދިޔައީ ފުއާދާއެކު. ދިޔައިރު، ޝާކިރުގެ ކާރުގައި މައްސަލައެއް އުޅޭ. އޭނަ އަހަރެން ތަޢާރަފްކޮށްދިނީ އެކުވެރިއެއްގެ ގޮތުގައި. ޝާކިރު ކާރު ގަރާޖަށް ގެންދަންވެގެން މީހަކަށް ގުޅަން އުޅުނު ވަގުތު ފުއާދު އަހަރެންގެ ވާހަކަ ބުނީ. އެ ދުވަހު އަހަރެން އެގޮތަށް އެކަންތައް ކުރީ. އެއީ އެކްސިޑެންޓްވީ ދުވަހުގެ ކުރީ ދުވަހު." ހެންރީ ބުންނެވެ.
"އަހަންނަށް އިތުރަށް އެނގޭ ކަމަކީ ފުއާދާ ޝާކިރު އެހާ ގަޔާނުވާކަން. އެކަމަކު ވެސް ވާހަކަ ދެއްކި. އަހަންނަށް އެނގުނު މާޒީގައި އެ ދެމެދުގައި މައްސަލަގަނޑެއް ހިނގިކަން. އެކަމަކު ފުއާދުގެ ވާހަކަތަކުން އެނގުނު ޝާކިރުގެ ކިބައިން އޭނާ މާފަށް އެދުނުކަން" ހެންރީ އޭނާއަށް އެނގޭ މިންވަރު ކިޔައިދިނެވެ.
"އަހަރެން ކަލޭގެ މައްސަލަ ފުލުހަށް ހުށައަޅާނަން." ރާދިން ބުންޏެވެ.
"އަހަރެން އަހަރެންގެ ކުށުން ރެކިގަންނަން މަސައްކަތެއް ނުކުރާނަން. އަހަންނަށް އެކަމުގެ ހިތިކަން ލިބިއްޖެ. ކުށުގެ އަދަބު ލިބިގަންނަން އަހަރެން ތައްޔާރު. އެކަމަކު އޭރުން އަހަރެންގެ އެލިޒެތް… އެލިޒެތް…" ހެންރީއަށް އެލިޒެތްގެ ހަނދާން އާވެ ރޮވެން ފެށުނެވެ. އޭނާގެ ކުށެއްގެ ސަބަބުން އެލިޒެތްގެ ފުރާނަ ނުރައްކަލަކަށް އެވަނީ ހުށައެޅިފައެވެ. އެހެންނަމަވެސް، މިއަދު އޭނާ ހުރީ ކުރެވުނު ކުށަށް އަދަބު ލިބިގަންނަން ތައްޔާރުވެގެންނެވެ. އޭރުން އެލިޒެތްވެސް ފަހަރުގައި އޭނާާއަށް މާފުކޮށްފާނެއެވެ. ލޯބިވާ މީހާގެ މައާފަކީ ކޮންމެ މީހަކަށްވެސް ވަރަށް މުހިންމު އެއްޗެކެވެ. ހެންރީއަށް ވެސް ވެފައިވަނީ އެފަދަ ގޮތެކެވެ. އެލިޒެތް އެކްސިޑެންޓްވެ އެ ޙާލަތަށް ދިޔައިރު، ހުރީ އޭނާ ދެކެ ނުރުހުންވެފައިކަން އެނގޭތީ އޭނާގެ ހިތަށް ކުޑަ ވެސް ތަސައްލީއެއް ނުލިބެއެވެ. މިހާރު އޭނާ ބޭނުންވަނީ އެ ކުށްވެރި އިޙްސާސުން މިންޖުވުމަށެވެ.
"ރާދިން.. ފުލުހަށް ގުޅާ…" މުނީރަށް ބުނެވުނެވެ.
"އަހަރެން އަމިއްލައަށް ވެސް ހަވާލުވާނަން. އަހަރެންގެ އެލިޒެތް ސަލާމަތް ކޮށްދީ…" ހެންރީ އާދޭސް ކުރަން ފެށިއެވެ.
"ކަލޭއަށް ކޯޓުގައި ފުއާދާ ދެކޮޅަށް ހެކިބަސް ދޭން ކެރޭނެތަ؟" މުނީރު ސުވާލުކޮށްލިއެވެ. ކިތަންމެ ރުޅި އައި ނަމަވެސް މިއީ ވިސްނައިގެން ކަންތައް ކުރަން ޖެހޭ ވަގުތު ކަން އޭނާއަށް އެނގެއެވެ.
"ފުއާދު އަހަރެން ވެސް މަރާލާނެ. އޭނާާ އަކީ ނުބައި މީހެއް. އަމިއްލަ ހިތުގެ މުރާދު ހާސިލް ކުރަން ކޮންމެ ފަދަ ދަރަޖައަކަށްވެސް ވެއްޓިދާނެ." ހެންރީ ބުންޏެވެ.
"ކަލޭއަށް ހެކިބަސް ދޭން ކެރޭނެހޭ؟" މުނީރު ސުވާލުކޮށްލިއެވެ. ރާދިންއަށް ވެސް އިރުއިރުކޮޅަކާ ފުން ނޭވާއެއް ލެވެއެވެ. ހީވަނީ އައިސްފައި ހުރި ރުޅިގަނޑު ކޮންޓްރޯލް ކުރަން އުނދަގޫވެގެން އުޅޭހެންނެވެ.
އެރޭ ރާދިންއާއި މުނީރާ ދެމީހުން ހެންރީ ފުލުހުންނާ ހަވާލުކުރިއެވެ. ފުލުހުން ހެންރީއާއި މުނިރުމެންގެ ބަޔާން ނެގިއެވެ. އަދި އެމީހުން މައާލްއާ ވާހަކަ ދައްކަން ބޭނުންކަމަށާއި މައާލްގެ ބަޔާން ނަގަން ބޭނުންވާކަމަށް ވެސް ބުންޏެވެ. އެރޭ ތަންކޮޅެއް ލަސްވެފައި ހުރުމުންނާއި މައާލްއަށް ކިޔައިދޭން ޖެހޭ ވާހަކަތައް ހުރުމާއެކު، ޖެހިގެން އަންނަ ދުވަހު މައާލް ގޮވައިގެން އަންނަން ނިންމާފައި މުނީރާ ރާދިންއާ ދެމީހުން ދިޔައީ ގެއަށެވެ. އެމީހުން ނިންމީ މައާލްއަށް ހަޤީގަތްތައް ކިޔައިދޭށެވެ. އިތުރަށް ލަސްކުރެވެން ނެތްކަން ދެމީހުންނަށް ވެސް އެނގުނެވެ. އަދި މާދަލާ ފުލުހުންގެ އިދާރާއަށް ދާއިރު، ހަޤީގަތް މައާލްއަށް އެނގިފައި އޮތުމުގެ މުހިންމުކަންވެސް ދެމީހުންނަށް އިޙްސާސްވިއެވެ.
"އެކަމަކު ބައްޕާ… މައާލްއަށް މައާލްގެ އަސްލު ބައްޕައަކީ ކާކުކަން އަންގައިދޭން ޖެހޭނީ މައާލްގެ ބައްޕަ ހުރެގެނެއްނު. އެއީ އެއްނު އެންމެންގެ ވަސިއްޔަތަކީ،" ރާދިން އަށް ބުނެވުނެވެ.
"ބައްޕަވެސް މި ވިސްނަނީ ތިކަމާ…" މުނީރަށް ވެސް ބުނެވުނެވެ. އެފަދަ ވާހަކަތަކެއްގައި ތިބެ ދެމީހުން ގޮސް ގެއަށް ވަތްއިރު އެގާރަ ޖަހާ ބޮޑުވެއްޖެއެވެ. ރޭގަނޑުކަމުން ފިނިކަން އިންތިހާއަށް ފަަަޒާގައި ހިފާލާފައި ހުރުމުން ގޭތެރެއަށް ވެސް ފިނީގެ އަސަރު ކޮށްފައިވުމާއެކު މައާލް ހުރީ ހީޓަރުވެސް ޖައްސާލައިގެންނެވެ. ސޯފާގައި އޮށޯވެލައިގެން އޮތް މައާލްއަށް ރާދިންއާ މުނީރު ފެނުމާއެކު، ކުޑަކޮށް ތެދުވެލިއެެވެ.
"މައާލް ނުނިދަންދޯ." އެހެން ބުނެލާފައި މުނީރު ސޯފާގައި އިށީނދެލިއެވެ. ރާދިންވެސް ވަކިން ހުރި ގޮނޑީގައި އިށީނދެލިއެވެ. އޭނާ މުނީރަށް ބަލާލާފައި އިންތިޒާރުކުރަމުން ދިޔައީ މުނީރު ވާހަކަ ދައްކަން ފަށާނެ އިރަކަށެވެ.
"މައާލް. ދަރިފުޅާ…" މައާލްއަށް ބަލައިލުމަށްފަހު މުނީރު ގޮވާލިއެވެ. އެގޮވާލުމުގައި ހުރި އަސަރަކުން މައާލްގެ ހިތަށް ގޮތެއްވެގެން ދިޔައެވެ. އޭނާ "ލައްބައޭ" ބުނެ ބޯ ޖަހާލިއެވެ.
(ނުނިމޭ)